ສານ ແຂວງຊຽງຂວາງ ຕັດສິນຈຳຄຸກຊາຍຕີເມຍ ຢູ່ບຸນກິນຈຽງ 3 ປີ 6 ເດືອນ ພ້ອມໃຫ້ປົວແປງຈິດໃຈຫລາຍກວ່າ 33 ລ້ານກີບ

ຂ່າວ ປກສ ແຂວງຊຽງຂວາງ ລາຍງານວ່າ: ວັນທີ 22 ສິງຫາ 2024, ສານປະຊາຊົນຂັ້ນຕົ້ນແຂວງຊຽງຂວາງ ໄດ້ຕັດສິນໂທດຕັດອິດສະຫລະພາບ 3 ປີ 6 ເດືອນ ແລະ ປັບໃໝ 10,000,000 ກີບ ພ້ອມທັງໃຫ້ເຮັດຂວັນປົວແປງຈິດໃຈ 33 ລ້ານກວ່າກີບ ຕໍ່ທ້າວ ກົວຫາ ອາຍຸ 20 ປີ ຢູ່ບ້ານ ໂງຍ ເມືອງແປກ ໃນຂໍ້ຫາທຳຮ້າຍຮ່າງກາຍທາລຸນແມ່ຍິງ ແລະ ເດັກ ເຊິ່ງຜູ້ກ່ຽວຖືກກັກຕົວເມື່ອວັນທີ 14 ມັງກອນຜ່ານມາ ຢູ່ໃນງານບຸນກິນຈຽງ ທີ່ບ້ານຍວນ.

ຕົ້ນເຫດແມ່ນຍ້ອນຜູ້ຍິງ ອາຍຸ 16 ປີ (ເມຍຜູ້ກ່ຽວ) ໄດ້ໄປຫລິ້ນບຸນກິນຈຽງກັບນ້ອງສາວ ແລ້ວມີຜູ້ບ່າວມາຂໍເບີ ແຕ່ຝ່າຍຍິງບອກວ່າມີຜົວແລ້ວ ແລະ ບັງເອີນໝູ່ຂອງຜົວມາເຫັນລົມກັບຜູ້ບ່າວເລີຍໄປຟ້ອງທ້າວກົວຫາ, ທັນທີນັ້ນເມື່ອຜູ້ເປັນຜົວມາຮອດງານບຸນ ໂດຍທີ່ບໍ່ໄດ້ຖາມກົກປາຍສາເຫດແນວໃດ ກໍ່ໄດ້ລົງມືທຳຮ້າຍຮ່າງກາຍຜູ້ເປັນເມຍໂລດ ຕາມທີ່ເຫັນຄລິບວີດີໂອທີ່ເຜີຍແຜ່ອອກໄປໃນອອນລາຍ.