ກຸ່ມຕິດອາວຸດໂຈມຕີແຄວ້ນບາລູຈິສະຖານ ມີຜູ້ເສຍຊີວິດ 60 ກວ່າຄົນ
ເຈົ້າໜ້າທີ່ປາກິດສະຖານລາຍງານວ່າ: ມີຜູ້ເສຍຊີວິດຫລາຍກວ່າ 60 ຄົນ ຢູ່ແຄວ້ນບາລູຈິສະຖານ ທາງຕາເວັນຕົກສຽງໃຕ້ຂອງປະເທດ ພາຍຫລັງກຸ່ມຕິດອາວຸດແບ່ງແຍກດິນແດນໂຈມຕີສະຖານີຕໍາຫລວດ, ທາງລົດໄຟ ແລະ ທາງຫລວງ. ຂະນະທີ່ກອງກໍາລັງຄວາມໝັ້ນຄົງ ເປີດປະຕິບັດການຕອບໂຕ້ເພື່ອປາບປາມຜູ້ກໍ່ເຫດ.
ວັນທີ 27 ສິງຫາ, ສໍານັກຂ່າວຕ່າງປະເທດລາຍງານວ່າ: ການໂຈມຕີດັ່ງກ່າວຖືເປັນການໂຈມຕີທີ່ກວ້າງຂວາງທີ່ສຸດໃນຮອບຫລາຍປີ ໂດຍກຸ່ມຕິດອາວຸດຊາດພັນກໍ່ຄວາມບໍ່ສະຫງົບມາຫລາຍທົດສະວັດ ເພື່ອແຍກແຄວ້ນບາລູຈິສະຖານ ເຊິ່ງອຸດົມໄປດ້ວຍຊັບພະຍາກອນ ແລະ ເປັນທີ່ຕັ້ງຂອງໂຄງການສໍາຄັນເຊັ່ນ: ທ່າເຮືອທາງຍຸດທະສາດ ລວມທັງບໍ່ຄໍາ ແລະ ທອງແດງ.
ທ່ານ ໂມຊິນ ນັກວີ ລັດຖະມົນຕີກະຊວງປ້ອງກັນປະເທດຂອງປາກິດສະຖານ ກ່າວວ່າ: ການໂຈມຕີເຫລົ່ານີ້ເປັນແຜນການທີ່ຄິດມາຢ່າງດີ ເພື່ອສ້າງຄວາມວຸ້ນວາຍຢູ່ປາກິດສະຖານ. ກອງກໍາລັງຄວາມໝັ້ນຄົງຂອງປະເທດ ສາມາດສັງຫານຜູ້ກໍ່ຄວາມບໍ່ສະຫງົບໄດ້ 12 ຄົນ ພາຍຫລັງເກີດການໂຈມຕີໃນວັນທີ 25 ແລະ 26 ສິງຫາຜ່ານມາ.
ສ່ວນກອງທັບປາກິດສະຖານລະບຸວ່າ: ທະຫານ ແລະ ຕໍາຫລວດ 14 ຄົນ ລວມທັງຜູ້ກໍ່ເຫດ 21 ຄົນ ເສຍຊີວິດໃນການຕໍ່ສູ້ຄັ້ງນີ້ ພາຍຫລັງການໂຈມຕີຄັ້ງໃຫຍ່ທີ່ສຸດ ເຊິ່ງມຸ້ງເປົ້າໃສ່ລົດເມ ແລະ ລົດບັນທຸກຢູ່ທາງຫລວງ, ແຕ່ຍັງບໍ່ແນ່ນອນວ່າ: ຕົວເລກດັ່ງກ່າວນັບລວມຜູ້ເສຍຊີວິດ 12 ຄົນ ທີ່ກະຊວງປ້ອງກັນປະເທດປາກິດສະຖານຢືນຢັນ ຫລື ບໍ່.
ຂະນະດຽວກັນ, ເຈົ້າໜ້າທີ່ທ້ອງຖິ່ນກ່າວວ່າ: ມີຜູ້ເສຍຊີວິດຢ່າງໜ້ອຍ 23 ຄົນ ຈາກເຫດໂຈມຕີຢູ່ທາງຫລວງ ເຊິ່ງກຸ່ມຄົນຮ້າຍຕິດອາວຸດໄດ້ກວດສອບບັດປະຈໍາຕົວຂອງຜູ້ໂດຍສານ ກ່ອນຈະຍິງພວກເຂົາຫລາຍຄົນ ແລະ ຈູດໄຟເຜົາລົດ. ອີກທັງກຸ່ມກໍ່ຄວາມບໍ່ສະຫງົບຍັງມຸ້ງເປົ້າໂຈມຕີສະຖານີຕໍາຫລວດ ແລະ ທາງລົດໄຟຢູ່ເມືອງເຄວຕາ ເຊິ່ງເປັນເມືອງເອກຂອງແຄວ້ນບາລູຈິສະຖານ.
ກອງທັບປົດປ່ອຍບາລູ (BLA) ອ້າງວ່າເປັນຜູ້ກໍ່ເຫດໂຈມຕີໃນວັນທີ 26 ສິງຫາຜ່ານມາ, ເຖິງວ່າຍັງບໍ່ມີການຢືນຢັນຈາກທາງການປາກິດສະຖານ. ຂະນະທີ່ນາຍົກລັດຖະມົນຕີ ເຊບາ ຊາຣີຟ ຜູ້ນໍາປາກິດສະຖານ ໃຫ້ຄໍາໝັ້ນວ່າ: ກອງກໍາລັງຄວາມໝັ້ນຄົງຈະດໍາເນີນການຕອບໂຕ້ ແລະ ນໍາເອົາຜູ້ກະທໍາຜິດມາລົງໂທດ.
