ປິດເສັ້ນທາງ ຢູ່ຈຸດປະຕູນໍ້າຫ້ວຍໝາກຮຽວ ເມືອງປາກງື່ມ ນະຄອນຫລວງວຽງຈັນ ຊົ່ວຄາວ ເລີ່ມວັນທີ 27 ສິງຫາ ຫາ 4 ກັນຍາ 2024
ວັນທີ 27 ສິງຫາ 2024 ນີ້, ເຈົ້າເມືອງໆປາກງື່ມ ໄດ້ອອກແຈ້ງປິດເສັ້ນທາງ ຢູ່ຈຸດປະຕູນໍ້າຫ້ວຍໝາກຮຽວ ຊົ່ວຄາວ ເພື່ອປ້ອງກັນບໍ່ໃຫ້ນໍ້າຖ້ວມຕົວເມືອງວຽງຈັນ, ການປິດເສັ້ນທາງຊົ່ວຄາວ ເລີ່ມແຕ່ວັນທີ 27 ສິງຫາ ຫາ 4 ກັນຍາ 2024 ແລະ ຈຸດທີ່ຈະປິດເສັ້ນທາງແມ່ນ ຈາກ 3 ແຍກ ບ້ານ ໝາກຮຽວ ໄປຫາ ບ້ານ ນາລ້ອງ ເມືອງ ຫາດຊາຍຟອງ ເພື່ອຕິດຕັ້ງເຄື່ອງຈັກເພື່ອດູດນໍ້າຈາກຫ້ວຍໝາກຮຽວ (ຄອງນໍ້າວຽງຈັນ) ລົງສູ່ນໍ້າຂອງດ້ວຍການນໍາໃຊ້ທໍ່ຂ້າມທາງ ເພື່ອຮັບປະກັນບໍ່ໃຫ້ນໍ້າຖ້ວມຕົວເມືອງວຽງຈັນ, ສ່ວນເວລາເປິດຈັກທໍາງານ ຄື: 09:00-15:00 ໂມງ ແລະ 19:00-22:00 ໂມງ,
ສຳລັບຜູ້ທີ່ຈະໄປ-ມາ ນໍາໃຊ້ເສັ້ນທາງແຕ່ 3 ແຍກ ບ້ານ ໝາກຮຽວ ຫາ ບ້ານ ນາລ້ອງ ລຽບແຄມຂອງໄປສາງທ່ານາແລ້ງ ເມືອງ ຫາດຊາຍຟອງ ແມ່ນອະນຸຍາດຜ່ານໄດ້ແຕ່ລົດຈັກ, ລົດເກັ່ງ, ລົດກະບະ (ປະເພດເບົາ) ໄປໄດ້ໃນ ເວລາບໍ່ໄດ້ເປີດເຄື່ອງຈັກດູດນໍ້າ, ສ່ວນລົດບັນທຸກຫນັກທຸກຊະນິດ, ທຸກປະເພດ ແມ່ນບໍ່ສາມາດໄປມາໄດ້ ແລະ ໃຫ້ຫລີກເວັ້ນໄປນໍາໃຊ້ເສັ້ນທາງ 13 ໃຕ້ ສາກ່ອນ.
