ທະນາຄານໂລກຄາດຄະເນ GDP ຂອງຫວຽດນາມຈະເຕີບໃຫຍ່ 6.1% ໃນປີນີ້ ເຕືອນເຝົ້າລະວັງບັນຫາໜີ້ເສຍ
ທະນາຄານໂລກຄາດຄະເນການເຕີບໃຫຍ່ຂອງລວມຍອດຜະລິດຕະພັນພາຍໃນ (GDP) ຂອງຫວຽດນາມໃນລະດັບ 6.1%. ພ້ອມເຕືອນວ່າ: ຄຸນນະພາບສິນຊັບຂອງທະນາຄານຍັງເປັນບັນຫາທີ່ຕ້ອງກັງວົນ.
ວັນທີ 27 ສິງຫາ, ສໍານັກຂ່າວຕ່າງປະເທດລາຍງານວ່າ: ຫວຽດນາມຕັ້ງເປົ້າການເຕີບໃຫຍ່ຂອງ GDP ປີນີ້ໄວ້ໃນລະດັບ 6.5% ຈາກການຟື້ນຕົວຂອງເສດຖະກິດພາຍນອກ ແລະ ການລົງທຶນພາກລັດທີ່ເພີ່ມຂຶ້ນ ເຊິ່ງເພີ່ມຂຶ້ນຈາກ 5.05% ຂອງປີຜ່ານມາ.
ທະນາຄານໂລກ ລາຍງານວ່າ: ຈາກການສົ່ງອອກທີ່ເຕີບໃຫຍ່ຢ່າງຕໍ່ເນື່ອງ ແລະ ສັນຍານການຟື້ນຕົວຂອງຂະແໜງອະສັງຫາລິມະຊັບ ອຸປະສົງໃນປະເທດມີທ່າອ່ຽງຈະຟື້ນຕົວຂຶ້ນໃນໄລຍະ 6 ເດືອນທ້າຍປີ 2024. ຂະນະທີ່ຄວາມເຊື່ອໝັ້ນຂອງນັກລົງທຶນ ແລະ ຜູ້ບໍລິໂພກປັບຕົວດີຂຶ້ນ.
ເຖິງຢ່າງໃດກໍຕາມ, ຄຸນນະພາບສິນຊັບກາຍເປັນບັນຫາສໍາຄັນໃນຂະແໜງທະນາຄານທ່າມກາງໜີ້ເສຍ (NPL) ແລະ ການຄຸ້ມຄອງການສູນເສຍສິນເຊື່ອທີ່ເພີ່ມຂຶ້ນ ໂດຍທະນາຄານໂລກລະບຸວ່າ: NPL ເຕີບໃຫຍ່ຈາກ 1.9% ໃນປີ 2022 ເປັນ 4.6% ຂອງສິນເຊື່ອທັງໝົດໃນປີ 2023, ຍິ່ງໄປກວ່ານັ້ນ ສິນເຊື່ອທີ່ມີບັນຫາໂດຍລວມອາດສູງເຖິງ 7.9% ຖ້າລວມສິນເຊື່ອທີ່ປັບໂຄງສ້າງໃໝ່ ແລະ ໜີ້ຂອງບໍລິສັດຈັດການສິນຊັບຫວຽດນາມ.
ສໍາລັບການຄາດຄະເນອັດຕາເງິນເຟີ້ທົ່ວໄປຂອງຫວຽດນາມຢູ່ລະດັບ 4.5% ໃນປີນີ້ ເຊິ່ງສູງກວ່າ 3.2% ໃນປີຜ່ານມາ ແລະ ຄາດວ່າລາຄາອາຫານຈະຍັງສູງຕໍ່ໄປ.
