ເດືອນກັນຍາ 2024 ນີ້ ລັດຖະບານ ຈະເລັ່ງແກ້ໄຂ 6 ບັນຫາເຄັ່ງຮ້ອນ, ບຸກບືນປະຕິບັດໃຫ້ບັນລຸ 9 ຄາດໝາຍສູ້ຊົນ

ກອງປະຊຸມສະໄໝສາມັນ ລັດຖະບານ ປະຈໍາເດືອນສິງຫາ 2024 ທີ່ດຳເນີນ ໄປໃນວັນທີ 26-27 ສິງຫາ 2024 ນີ້, ໄດ້ກຳນົດວ່າ: ແຕ່ນີ້ຮອດທ້າຍເດືອນກັນຍາ ແມ່ນ ສືບຕໍ່ສຸມໃສ່ປະຕິບັດແຜນວຽກຈຸດສຸມ 6 ເດືອນທ້າຍປີ 2024 ທີ່ໄດ້ກຳນົດໄວ້ ໃນມະຕິກອງປະຊຸມລັດຖະບານ ເປີດກວ້າງ ຄັ້ງທີ I ປີ 2024 ກໍຄືຄຳເຫັນທີ່ເລຂາທິ ການໃຫຍ່, ປະທານປະເທດ ໄດ້ຊີ້ນໍາກ່ຽວກັບການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ, ມາດຕະການແກ້ໄຂໃໝ່ ເພື່ອແກ້ໄຂ 6 ບັນຫາເຄັ່ງຮ້ອນ, ບຸກບືນປະຕິບັດໃຫ້ບັນລຸ 9 ຄາດໝາຍສູ້ຊົນ ໂດຍເອົາໃຈໃສ່ 5 ວິທີເຮັດວຽກແບບບຸກທະລຸ. ໃນນັ້ນ, ວຽກຕົວຈິງ ຮີບດ່ວນຈໍານວນໜຶ່ງ ທີ່ຕ້ອງໄດ້ສຸມໃສ່ ຄື:

ສືບຕໍ່ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍສະເພາະການປ້ອງກັນ, ຮັກສາຄວາມສະຫງົບ ແລະ ຮັກສາຄວາມເປັນລະບຽບຮຽບຮ້ອຍ ໃນໄລຍະກະກຽມກອງປະຊຸມສຸດຍອດອາຊຽນ. ພ້ອມນີ້ ໃຫ້ເອົາໃຈໃສ່ຊີ້ນໍາການຮັກຄວາມຄວາມເປັນລະບຽບຮຽບຮ້ອຍການຈາລະຈອນຕາມຖະໜົນ ໃນໄລຍະອາທິດທຳອິດຂອງການເປີດສົກຮຽນໃໝ່; ສືບຕໍ່ແກ້ໄຂປະກົດການຫຍໍ້ທໍ້ໃນສັງຄົມ ໂດຍສະເພາະບັນຫາຢາເສບຕິດ, ກຸ່ມແກ້ງສໍ້ໂກງທາງໂທລະຄົມ ຫລື ຄອນເຊັນເຕີ.

ສືບຕໍ່ປະຕິບັດຕາມແຜນວຽກຈຸດສຸມ ຂອງຄະນະສະເພາະກິດ 19/ກມສພ ໂດຍສະເພາະ ແກ້ໄຂບັນຫາເງິນເຟີ້, ຄຸ້ມຄອງອັດຕາແລກປ່ຽນ ແລະ ລາຄາສິນຄ້າ, ໃນນີ້ ສຸມໃສ່ສະກັດກັ້ນການຄ້ານອກລະບົບ, ການຄ້າຊາຍແດນທີ່ບໍ່ຖືກຕ້ອງຕາມລະບຽບກົດໝາຍ; ຊຸກຍູ້ຜູ້ນຳເຂົ້າ-ສົ່ງອອກ ໃຫ້ຈົດທະບຽນ ແລະ ຊໍາລະສະສາງຜ່ານລະບົບທະນາຄານ; ຊຸກຍູ້ການນຳໃຊ້ເງິນກີບ ໃນທົ່ວສັງຄົມ ແລະ ເດັດຂາດບໍ່ໃຫ້ຮັບເງິນຕາ; ດຶງເອົາເງິນຢູ່ນອກລະບົບ ເຂົ້າສູ່ລະບົບເພື່ອເພີ່ມຄັງສໍາຮອງ; ສຸມໃສ່ແກ້ໄຂບັນຫາໜີ້ສິນ ດ້ວຍການເຈລະຈາປັບໂຄງສ້າງໜີ້ ແລະ ຂະຫຍາຍໄລຍະເວລາຊຳລະໜີ້, ແກ້ໄຂເດັດຂາດໂຄງການກູ້ຢືມບໍ່ເກີດດອກອອກຜົນ; ເລັ່ງທວງໜີ້ ຈາກບັນດາບໍລິສັດ ຢ່າງເຂັ້ມງວດ ແລະ ເດັດຂາດ; ສຸມໃສ່ຈັດຕັ້ງປະຕິບັດ ການຄຸ້ມຄອງຄຳ ແລະ ທຸລະກິດຄຳ.

ແກ້ໄຂບັນຫາພາຫະນະລົດນຳເຂົ້າບໍ່ຖືກຕ້ອງ ແລະ ພາຫະນະຕົກຄ້າງ ຢູ່ເຂດພິເສດສາມຫລ່ຽມຄຳ; ສືບຕໍ່ຕິດຕາມ ການຈັດຕັ້ງປະຕິບັດບັນດາໂຄງການຂະໜາດໃຫຍ່ ເປັນຕົ້ນໂຄງການທາງດ່ວນ, ໂຄງການໄຟຟ້າເພື່ອສົ່ງຂາຍໄປກຳປູເຈຍ, ໂຄງການທາງລົດໄຟ; ສືບຕໍ່ສຸມໃສ່ແກ້ໄຂກ່ຽວກັບບັນດາຊັບສິນທີ່ລັດຢຶດໄດ້ຈາກຄະດີຕ່າງໆ.

ສຸມໃສ່ແກ້ໄຂຜົນກະທົບໄພທຳມະຊາດຈາກຝົນຕົກໜັກ, ເອົາໃຈໃສ່ການຊ່ວຍເຫລືອບັນເທົາທຸກໃຫ້ປະຊາຊົນທີ່ໄດ້ຮັບຜົນກະທົບ ເປັນຕົ້ນການຊ່ວຍເຫລືອສຸກເສີນເບື້ອງຕົ້ນ, ການປະເມີນຜົນກະທົບ ແລະ ສ້າງແຜນຟື້ນຟູ ໂດຍສະເພາະ ເລັ່ງຟື້ນຟູເຂດພື້ນທີ່ທໍາການຜະລິດຂອງປະຊາຊົນ. ພ້ອມນີ້ ກໍສືບຕໍ່ ຕິິດຕາມເຝົ້າລະວັງສະພາບດິນຟ້າອາກາດ ເພື່ອກຽມແຜນຮອງຮັບໄພພິບັດທີ່ອາດຈະເກີດຂຶ້ນໃຫ້ທັນການ; ສືບຕໍ່ກະກຽມຄວາມພ້ອມໃນການໄຂສົກຮຽນໃໝ່ໃຫ້ດີ; ສືບຕໍ່ແກ້ໄຂບັນຫາການຂາດແຄນຄູ, ການປະລະການຮຽນ ແລະ ອື່ນໆ ທີ່ຕິດພັນກັບສະຖາບັນການສຶກສາ ໃຫ້ດີຂຶ້ນ; ສືບຕໍ່ຕິດຕາມເຝົ້າລະວັງ, ປ້ອງກັນ ແລະ ແກ້ໄຂການລະບາດຂອງພະຍາດຕາມລະດູການອື່ນໆ.

ແຕ່ລະກະຊວງ, ອົງການ ຮີບຮ້ອນສົ່ງແຜນການສ້າງ ແລະ ປັບປຸງກົດໝາຍ 5 ປີ (2026-2030) ພ້ອມທັງນະໂຍບາຍໃນການສ້າງກົດໝາຍ ແລະ ບົດປະເມີນຜົນກະທົບຂອງນະໂຍບາຍໃນການສ້າງກົດໝາຍ ໃຫ້ກະຊວງຍຸຕິທຳ; ສືບຕໍ່ກະກຽມຄວາມພ້ອມຮອບດ້ານໃຫ້ແກ່ການເດີນທາງໄປຢ້ຽມຢາມ ແລະ ເຄື່ອນໄຫວວຽກງານຕ່າງປະເທດຂອງການນຳພັກ-ລັດ ໂດຍສະເພາະ ການຢ້ຽມຢາມລັດຖະກິດ ຢູ່ ສສ ຫວຽດນາມ ຂອງເລຂາທິການໃຫຍ່, ປະທານປະເທດ ແລະ ການເຂົ້າຮ່ວມກອງປະຊຸມສອງກົມການເມືອງ ລາວ-ຫວຽດນາມ ໃນເດືອນກັນຍາ; ສືບຕໍ່ສຸມໃສ່ກຽມຄວາມພ້ອມໃຫ້ແກ່ການເປັນເຈົ້າພາບກອງປະຊຸມສຸດຍອດອາຊຽນ.