ລາວ-ບຣູໄນ ຮັດແໜ້ນຄວາມສາມັກຄີໃນຖານະທີ່ເປັນ “ຄູ່ຮ່ວມຍຸດທະສາດ”
ວັນທີ 28 ສິງຫາ 2024 ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ຄັ້ງນີ້ ເຊິ່ງຖືເປັນຂີດໝາຍສໍາຄັນສໍາລັບການພົວພັນ ແລະ ການຮ່ວມມືຢ່າງໃກ້ຊິດ ກໍຄື ໄມຕີຈິດມິດຕະພາບທີ່ດີ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ໃນຖານະທີ່ເປັນ “ຄູ່ຮ່ວມຍຸດທະສາດ”. ພ້ອມນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ຝາກຄວາມຢື້ຢາມຖາມຂ່າວອັນອົບອຸ່ນໄປຍັງ ສົມເດັດ ຊຸນຕານ ຮາຈິ ຮັດຊານານ ໂບນເກຍ (His Majesty Sultan Haji Hassanal Bolkiah) ແຫ່ງ ບຣູໄນ ດາຣູຊາລາມ ແລະ ສະແດງຄວາມຊົມເຊີຍວັນຄ້າຍວັນພະຣາຊະສົມພົບ ຂອງ ສົມເດັດ ຊຸນຕານ ແຫ່ງ ບຣູໄນ ດາຣູຊາລາມ ຄົບຮອບ 78 ພັນສາ ໃນເດືອນກໍລະກົດ 2024 ຜ່ານມາ.
ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມປິຕິຍິນດີທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນເຕັມໄປດ້ວຍໝາກຜົນ ລະຫວ່າງ ສປປ ລາວ ແລະ ບຣູໄນ ດາຣູຊາລາມ ຕະຫລອດໄລຍະ 3 ທົດສະວັດ ທີ່ຜ່ານມາ ໄດ້ຮັບການພັດທະນາຢ່າງຕໍ່ເນື່ອງ ແລະ ແໜ້ນແຟ້ນຍິ່ງໆຂຶ້ນ, ພ້ອມທັງໄດ້ສະແດງຄວາມຊົມເຊີຍຕໍ່ຜົນສໍາເລັດຂອງການປະຊຸມຄະນະກໍາມາທິການຮ່ວມ ວ່າດ້ວຍ ການຮ່ວມມືສອງຝ່າຍ ລາວ-ບຣູໄນ ຄັ້ງທີ 4 (JCBC-4) ທີ່ໄດ້ຈັດຂຶ້ນໃນມື້ນີ້ ຢູ່ ນະຄອນຫລວງວຽງຈັນ ແລະ ຍັງໄດ້ຊຸກຍູ້ໃຫ້ຂະແໜງການກ່ຽວຂ້ອງຂອງສອງຝ່າຍ ໂດຍສະເພາະ ສອງກະຊວງການຕ່າງປະເທດ ລາວ ແລະ ບຣູໄນ ສືບຕໍ່ປະສານສົມທົບກັນຢ່າງໃກ້ຊິດ ເພື່ອຊຸກຍູ້ການຈັດຕັ້ງປະຕິບັດບັນດາແຜນງານ ແລະ ທິດທາງການຮ່ວມມືຂອງສອງລັດຖະບານ ລາວ ແລະ ບຣູໄນ ໃຫ້ສໍາເລັດຜົນຕາມຄາດໝາຍ ເພື່ອຜັນຂະຫຍາຍການເປັນ “ຄູ່ຮ່ວມຍຸດທະສາດ” ລະຫວ່າງສອງປະເທດ ລາວ ແລະ ບຣູໄນ ໃຫ້ເປັນຮູບປະທໍາເທື່ອລະກ້າວ ໂດຍສະເພາະ ການສົ່ງເສີມການຮ່ວມມືທາງດ້ານການພັດທະນາຊັບພະຍາກອນມະນຸດ, ເສດຖະກິດ, ການຄ້າ, ພະລັງງານ, ການກະສິກໍາ, ການທ່ອງທ່ຽວ ແລະ ການຮ່ວມມືເພື່ອການພັດທະນາ ຂອງ ສອງປະເທດ ລາວ ແລະ ບຣູໄນ ໃນຕໍ່ໜ້າ. ໃນຕອນທ້າຍ, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ມາຍັງ ລັດຖະບານ ແລະ ປະຊາຊົນບຣູໄນ ທີ່ໄດ້ໃຫ້ການສະໜັບສະໜູນ ແລະ ຮ່ວມມືຊ່ວຍເຫລືອ ສປປ ລາວ ໃນໄລຍະຜ່ານມາ ໂດຍສະເພາະ ການເປັນປະທານອາຊຽນ 2024 ຂອງ ສປປ ລາວ.
ໃນຂະນະດຽວກັນ, ທ່ານ ດາໂຕະ ເອີຣິວານ ເປຮິນ ຢູຊອບ ລັດຖະມົນຕີກະຊວງການຕ່າງປະເທດ ຜູ້ທີ 2 ແຫ່ງ ບຣູໄນ ດາຣູຊາລາມ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ລາຍງານຜົນການພົບປະກັບຄູ່ຮ່ວມຕໍາແໜ່ງຝ່າຍລາວ ກໍຄື ຜົນຂອງກອງປະຊຸມ JCBC-4, ພ້ອມທັງໄດ້ຢືນຢັນຄວາມໝາຍໝັ້ນຂອງຕົນໃນການຮັດວຽກຮ່ວມກັບຄູ່ຮ່ວມຕໍາແໜ່ງຝ່າຍລາວຢ່າງໃກ້ຊິດ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ່ ກໍຄື ການເປັນຄູ່ຮ່ວມຍຸດທະສາດ ລະຫວ່າງ ບຣູໄນ ດາຣູຊາລາມ ແລະ ສປປ ລາວ ທີ່ໄດ້ຮັບການຍົກລະດັບໃນເດືອນຕຸລາ 2023 ຜ່ານມາ ໃຫ້ມີບາດກ້າວຂະຫຍາຍຕົວໃນຕໍ່ໜ້າ.
