ອາກາດຍັງຈະສືບຕໍ່ເຢັນລົງ
ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ວັນທີ 8 ພະຈິກນີ້, ບໍລິເວນຄວາມກົດດັນສູງຂອງອາກາດໜາວເຢັນທີ່ມີກຳລັງປານກາງ ຈະປົກຄຸມຢູ່ທົ່ວທຸກພາກຂອງລາວ ແລະ ສົມທົບກັບກະແສລົມຕາເວັນອອກສ່ຽງເໜືອພັດປົກຄຸມເຂດພາກເໜືອເປັນສ່ວນໃຫຍ່, ສ່ວນພາກເໜືອ ແລະ ພາກໃຕ້ ກະແສລົມຕາເວັນອອກ-ຕາເວັນອອກສ່ຽງໃຕ້ພັດປົກຄຸມ, ຊຶ່ງຈະເຮັດໃຫ້ອາກາດໜາວເຢັນໃນເຂດພາກເໜືອແຂວງໄຊສົມບູນ ແລະ ເຂດພູພຽງບໍລິເວນ ແລະ ຈະມີຝົນຕົກໃນລະດັບຄ່ອຍຢູ່ເຂດດ້ານຕາເວັນອອກຂອງພາກກາງ ແລະ ພາກໃຕ້.
ພາກເໜືອດ້ານຕາເວັນອອກ: ອາກາດໜາວເຢັນ, ພ້ອມມີໝອກໜາປົກຫຸ້ມໃນຕອນເຊົ້າ, ໂດຍສະເພາະເຂດພູສູງ ແລະ ເນີນພູອາກາດໜາວເຢັນຫລາຍ; ພາກເໜືອດ້ານຕາເວັນຕົກ: ອາກາດເຢັນຫາໜາວເຢັນ, ພ້ອມມີໝອກໜາປົກຫຸ້ມໃນຕອນເຊົ້າ; ພາກກາງ: ອາກາດເຢັນ, ພ້ອມມີໝອກບາງປົກຫຸ້ມໃນຕອນເຊົ້າ ແລະ ຈະມີຝົນຕົກໃນລະດັບຄ່ອຍຢູ່ເຂດດ້ານຕາເວັນອອກຂອງພາກ, ໂດຍສະເພາະເຂດທີ່ຕິດຊາຍແດນກັບ ສສ ຫວຽດນາມ, ສະເພາະແຂວງໄຊສົມບູນ ອາກາດໜາວເຢັນ, ພ້ອມມີໝອກໜາປົກຫຸ້ມໃນຕອນກາງຄືນຫາຕອນເຊົ້າ; ພາກໃຕ້: ອາກາດເຢັນ, ພ້ອມມີໝອກບາງປົກຫຸ້ມໃນຕອນເຊົ້າ ແລະ ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນ; ນະຄອນຫລວງວຽງຈັນ: ອາກາດເຢັນ, ພ້ອມມີໝອກບາງປົກຫຸ້ມໃນຕອນເຊົ້າ.
