ລັດກໍານົດຫລາຍມາດ​ຕະການກະຕຸ້ນການເກັບລາຍຮັບປີ 2018 ໃຫ້ບັນລຸແຜນ

ກະຊວງການເງິນ ໃຫ້ຮູ້ວ່າ: ຄາດໝາຍລວມຂອງການຈັດຕັ້ງປະຕິບັດແຜນງົບປະມານປີ 2018 ຈະສູ້ຊົນໃຫ້ບັນລຸຫລາຍກວ່າ 25.450 ຕື້ກີບ, ໃນນີ້ລາຍຮັບພາຍໃນໃຫ້ໄດ້ຫລາຍກວ່າ 22.700 ຕື້ກີບ, ລາຍຮັບຈາກການຊ່ວຍເຫລືອລ້າຂອງຕ່າງປະເທດໃຫ້ໄດ້ປະມານ 2.750 ກວ່າຕື້ກີບ. ຂະນະທີ່ລາຍຈ່າຍແມ່ນບໍ່ໃຫ້ເກີນ 32.760 ກວ່າຕື້ກີບ. ໝາຍວ່າຈະມີຕົວເລກຂາດດຸນໃນຈໍານວນ 7.310 ກວ່າຕື້ກີບ. ສະນັ້ນເພື່ອຮັບປະກັນໃຫ້ແຜນງົບປະມານດັ່ງກ່າວໄປຕາມແຜນການວາງໄວ້, ລັດຖະບານໄດ້ກໍານົດມາດຕະການຫລາຍດ້ານຄື: (1) ກະຊວງການເງິນ​ໄດ້​ແຕ່ງຕັ້ງ 4 ໜ່ວຍ​ງານຂຶ້ນ, ​ໂດຍ​ແມ່ນ​ຄະນະ​ນຳ​ກະຊວງ​ການ​ເງິນ (ຮອງ​ລັດຖະມົນຕີ) ​ແຕ່ລະ​ທ່ານ​ລົງ​ເລິກ​ຊີ້​ນຳ ​ແລະ ​ເຮັດ​ວຽກ​ກັບ​ບັນດາ​ກະຊວງ, ອົງການ​ທົ່ວ​ສູນ​ກາງ ​ເພື່ອ​​ໄຈ້​ແຍກ​ລະອຽດ​ແຜນການ​ສະ​ເໜີ​ຂອງ​ແຕ່ລະ​ຂະ​ແໜງ ລວມທັງ​ການຈັດ​ສັນ​ໃຫ້​ຂະ​ແໜງ​ການ​ຢູ່​ທ້ອງ​ຖິ່ນ ​ແລະ ນະຄອນຫລວງ​ວຽງ​ຈັນ ​ແນ​ໃສ່​ໃຫ້​ສາມາດ​ໄຈ້​ໃຫ້​ເຫັນ​ຄວາມ​ຈຳ​ເປັນ​ຕົວ​ຈິງ, ບໍ່​ໃຫ້​ມີ​ການ​ຊ້ຳຊ້ອນ ​ແລະ ​ໃຫ້​ປະຢັດລາຍ​ຈ່າຍ​ທີ່​ບໍ່​ຈຳ​ເປັນ​ລົງ. ນອກ​ນັ້ນ ກໍ​ຈະ​ໄດ້​ປຶກສາ​ຫາລືກ່ຽວ​ກັບ​ການຈັດ​ສັນ​ແຜນ​ລາຍ​ຮັບ-ລາຍ​ຈ່າຍ​ຄ່າ​ບໍລິການ​ທາງ​ດ້ານ​ວິຊາການ ​ເພື່ອ​ໃຫ້​ກຳນົດ​ໄດ້​ລະອຽດ ​ແລະ ບໍ່​ໃຫ້​ກະທົບ​​ດ້ານ​ລາຍ​ຮັບ-ລາຍ​ຈ່າຍ​ຂອງ​ແຜນ​ປີ. (2) ສຳລັບ​ມາດ​ຕະການ​​ດ້ານ​ລາຍ​ຮັບ​ໃນ​ປີ 2018 ​ຍັງ​ຈະ​ສືບ​ຕໍ່​ບັນດາ​ມາດ​ຕະການ​ທີ່​ໄດ້​ປະຕິບັດ​ໃນ​ປີ 2017 ​ແລະ ຜັນ​ຂະຫຍາຍ​ໃຫ້​ກວ້າງຂວາງ​ເຂັ້ມງວດ​ຫລາຍກວ່າ​ເກົ່າ ​ເປັນຕົ້ນ: ການ​ເກັບ​ກຳ​ຖານ​ຂໍ້​ມູນ​ລາຍ​ຮັບ ​ແລະ ປັບປຸງ​ຖານ​ຂໍ້​ມູນ​ລາຍ​ຮັບ​ຂຶ້ນ​ໃຫ້​ແທດ​ເໝາະ​ກັບ​ສະພາບຕົວ​ຈິງ, ​ເກັບ​ກຳ​ບັນຊີ​ຫົວໜ່ວຍ​ໃຫ້​ຊັດ​ເຈນ​ຖືກຕ້ອງ​ໃນ​ດ້ານ​ຈຳນວນ ​ແລະ ຂໍ້​ມູນ​ພັນທະ​ທີ່​ຕ້ອງ​ມອບ, ຂະ​ຫຍາ​ຍການ​ຕິດຕັ້ງ​ເຄື່ອງ​ຈັກ​ເກັບ​ເງິນ​ທີ່​ທັນ​ສະ​ໄໝ​ໃຫ້​ທົ່ວ​ເຖິງໃນ​ນະຄອນຫລວງ ​ແລະ ຂະຫຍາຍ​ໄປສູ່​ແຂວງ​ອື່ນໆ, ​ໂດຍ​ສະ​ເພາະ​ແຂວງ​ທີ່ໃຫຍ່, ​ເລັ່ງລັດ​ການ​ປັບປຸງ​ລະບົບ​ຄຸ້ມ​ຄອງ ​ແລະ ບໍລິການ​ຫົວໜ່ວຍ​ທຸລະ​ກິດ​ເຊັ່ນ: ການ​ຂຶ້ນທະບຽນ​ອາກອນ, ການ​ແຈ້ງມອບ​ຜ່ານ​ທະນາຄານ ​ແລະ ອື່ນໆ. ສືບ​ຕໍ່ປັບປຸງ ​ແລະ ສ້າງນິຕິ​ກຳ​ດ້ານ​ລາຍ​ຮັບ​ຈຳນວນ​ໜຶ່ງ​ເພີ່ມ​ຕື່ມ ​ເພື່ອ​ເປັນ​ພື້ນຖານ​ໃຫ້​ສາມາດ​ເກັບ​ລາຍ​ຮັບ​ເພີ່ມ​ຂຶ້ນ ​ແລະ ມີ​ປະສິດທິ​ຜົນ​ສູງ​ກວ່າ​ເກົ່າ ​ເປັນຕົ້ນ: ລາຍ​ຮັບ​ຈາກ​ທີ່​ດິນ, ​ຈາກ​ຊັບພະຍາກອນ​ທຳ​ມະ​ຊາດ, ​ແກ້​ໄຂ​ຂອດ​ທີ່​ຍັງ​ຊ້ຳຊ້ອນ ​ແລະ ມີ​ຊ່ອງ​ຫວ່າງ​ໃຫ້​ຂາດ​ຕົວ. (3). ດ້ານ​ລາຍ​ຈ່າຍ​ແມ່ນ​ຈະ​ໄດ້​ສືບ​ຕໍ່​ປະຕິບັດ​ບັນດາ​ມາດ​ຕະການ​ປະ​ຢັດ​ຕາມ​ຄຳ​ສັ່ງ​ເລກທີ 09/ນຍ ​ໃຫ້​ປະກົດ ຜົນ​ເປັນ​ຈິງ​ແທ້, ​ແກ້​ໄຂ​ການ​ປະຕິບັດ​ລາຍ​ຈ່າຍ​ວິຊາ​ການ​ໃຫ້​ຄ່ອງ​ໂຕ, ລວມສູນ​ບັນດາ​ລາຍ​ຈ່າຍ​ທີ່​ຕິດ​ພັນ​ກັບ​ລາຍ​ຮັບ, ກອງ​ທຶນ, ຜັນ​ຂະຫຍາຍກົດໝາຍ​ກ່ຽວ​ກັບ​ການຈັດ​ຊື້ ​ແລະ ການ​ຄຸ້ມ​ຄອງ​ໜີ້​ສິນ​ພາກ​ລັດ​ທີ່​ສະ​ເໜີ​ຜ່ານ​ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 8 ​ລວມທັງ​ເລັ່ງຄົ້ນຄວ້າ​ອອກ​ນິຕິ​ກຳ​ລຸ່ມ​ກົດໝາຍ​ເພີ່ມ​ຕື່ມ ກໍ​ຄື​ການ​ເລັ່ງຄົ້ນຄວ້າ​ປັບປຸງ​ກົດໝາຍ​ທີ່​ມີ​ຜົນ​ຕໍ່​ການ​ເກັບ​ລາຍ​ຮັບ​ໃຫ້​ໄວ​ຂຶ້ນ, ສືບ​ຕໍ່​ຜັນ​ຂະຫຍາຍ​ລົງ​ເລິກ​ການ​ເບີກຈ່າຍ​ເງິນ​ເດືອນ-ອຸດ​ໜູນ ​ແລະ ​ເງິນ​ນະ​ໂຍບາຍ​ໃຫ້​ຄ່ອງ​ໂຕ​ຂຶ້ນກວ່າ​ເກົ່າ, ​ໂດຍ​ສະ​ເພາະ​ຢູ່​ຂັ້ນ​ເມືອງ, ປັບປຸງ​ລະບົບ​ຄຸ້ມ​ຄອງ​ລາຍ​ຈ່າຍ ​ເຊັ່ນ: ລະບົບ GFIS, ລະບົບ​ການ​ລາຍ​ງານ ​ແລະ ການ​ກວດກາ​ຕິດຕາມ. (4) ​ເອົາ​ໃຈ​ໃສ່​ການຈັດ​ສັນ​ງົບປະມານ​ໃຫ້​ທ້ອງ​ຖິ່ນ​ໃຫ້​ມີ​ຄວາມ​ຊັດ​ເຈນ ​ແລະ ຄົບ​ຖ້ວນ, ການຈັດ​ສັນ​ງົບປະມານ​ໃຫ້​ຂະ​ແໜງ​ສຶກສາ ​ແລະ ສາທາລະນະ​ສຸກ​ໃຫ້​ສາມາດ​ສັງ​ລວມ​ໄດ້​ໝົດ​ທຸກ​ແຫ​ລ່ງ​ເງິນ​ທີ່​ສະໜອງ​ເຂົ້າ​ໃຫ້​ສອງ​ຂະ​ແໜງ​ດັ່ງກ່າວ ​ເພື່ອ​ໃຫ້​ສາມາດ​ບັນລຸ​ໄດ້​ຕາມ​ອັດຕາ​ສ່ວນ​ຈັດ​ສັນ​ທີ່​ກຳນົດ. (5) ຄົ້ນຄວ້າ, ສັງ​ລວມ ​ແລະ ຈັດ​ສັນ​ແຜນ​ລາຍ​ຈ່າຍ​ທີ່​ນຳ​ໃຊ້​ທຶນ​ຊ່ວຍ​ເຫລືອ, ກູ້​ຢືມ​ຈາກ​ພາຍ​ໃນ ​ແລະ ຕ່າງປະ​ເທດ (ODA) ​ແຍກ​ເປັນ​ແຕ່ລະ​ແຂວງ ​ແລະ ສູນ​ກາງ​ໃຫ້​ຈະ​ແຈ້ງ, ຄົບ​ຖ້ວນ ​ແລະ ສອດຄ່ອງ​ກັນ. (6) ​ເພີ່ມ​ທະວີ​ວຽກ​ງານ​ກວດກາຕິດຕາມ​ການ​ປະຕິບັດ​ແຜນ​ລາຍ​ຮັບ-ລາຍ​ຈ່າຍ​ງົບປະມານ​ໃຫ້​ໄປ​ຕາມ​ລະບຽບກົດໝາຍ​ຢ່າງ​ເຂັ້ມງວດ. (7) ສືບ​ຕໍ່​ປະສານ​ສົມທົບ​ກັບ​ຂະ​ແໜງ​ການ​ກ່ຽວຂ້ອງ​ໃນ​ການ​ສັງ​ລວມໜີ້​ສິນ​ພາຍ​ໃນ ​ແລະ ຕ່າງປະ​ເທດ ລວມທັງ​ໜີ້​ສິນ​ການ​ລົງທຶນ​ຂອງ​ລັດ ​ເພື່ອ​ຄົ້ນຄວ້າ​ວາງ​ມາດ​ຕະການ​ໃນ​ການ​ຄຸ້ມ​ຄອງ ​ແລະ ​ແກ້​ໄຂ​ຢ່າງ​ເປັນ​ລະບົບ​ໃຫ້​ຮັບປະກັນ​ຄວາມ​ຍືນ​ຍົງ ​ແລະ ຄວາມ​ໝັ້ນທ່ຽງ​ທາງ​ດ້ານ​ເສດຖະກິດ​ມະຫາ​ພາກ. (8) ສຳລັບ​ບັນດາ​ໂຄງການ​ທີ່​ນຳ​ໃຊ້​ເງິນ​ຊ່ວຍ​ເຫລືອ​ລ້າ ​ແລະ ​ເງິນ​ກູ້​ຢືມ​ຈາກ​ຕ່າງປະ​ເທດ​ທີ່​ມີ​ແຜນ​ຈະ​ຮັບ​ເອົາ​ແລ້ວ ແຕ່​ຈະ​ໄດ້​ກວດກາ​ເບິ່ງ​ລະອຽດ​ມີ​ຄວາມ​ຈຳ​ເປັນ ​ແລະ ຈະ​ມີ​ປະສິດທິ​ຜົນ​ແນວ​ໃດ​ຕື່ມ ​ເພື່ອ​ຄັດ​ຈ້ອນ​ອັນ​ທີ່​ມີ​ຄວາມ​ສຳຄັນ ​ແລະ ຈຳ​ເປັນ​ແທ້ ບໍ່​ໃຫ້​ເປັນ​ການ​ສ້າງ​ໜີ້​ຂຶ້ນຕື່ມ. (9) ຍູ້​ແຮງ​ການ​ຫັນ​ເປັນ​ທັນ​ສະ​ໄໝ ທັງ​ໃນ​ດ້ານ​ລາຍ​ຮັບ ​ແລະ ລາຍ​ຈ່າຍ ຮອງ​ຮັບ​ໃຫ້​ແກ່​ການຈັດຕັ້ງປະຕິບັດ​ໃຫ້​ມີ​ປະສິດທິ​ຜົນ​ສູງ ​ແລະ ສອດຄ່ອງ​ຕາມ​ມາດຖານ​ສາກົນ​ເທື່ອ​ລະ​ກ້າວ. (10) ດຳ​ເນີນ​ການ​ປະຕິ​ຮູບ​ວຽກ​ງານ​ການ​​ເງິນ, ​ໂດຍ​ຜັນ​ຂະຫຍາຍ​ຍຸດ​ທະ​ສາດ ​ແລະ ວິ​ໄສ​ທັດ​ຮອດ​ປີ 2030 ທີ່​ໄດ້​ກຳນົດ​ໄວ້ ​ໂດຍ​ສົມທົບ​ກັບ​ບັນດາ​ສະ​ຖາ​ບັນ​ການ​ເງິນ​ສາກົນ (WB, EU, ADB, ອື່ນໆ) ​ແລະ ບັນດາ​ປະ​ເທດ​ໃກ້​ຄຽງ. (11) ປັບປຸງ​ກົນ​ໄກ, ຂັ້ນຕອນ ​ແລະ ວິທີ​ການ​ໃນ​ການ​ປະສານ​ສົມທົບ​ລະຫວ່າງ​ກະຊວງ​ການ​ເງິນ, ຂະ​ແໜງ​ການ​ເງິນ​ໃນ​ຂອບ​ເຂດ​ທົ່ວ​ປະ​ເທດ​ກັບ​ສະພາ​ແຫ່ງ​ຊາດ, ສະພາ​ປະຊາຊົນ​ແຂວງ​ໃຫ້​ເປັນ​ປົກກະຕິ, ມີ​ຄວາມ​ຄ່ອງ​ຕົວ ​ແລະ ສອດຄ່ອງ​ຕາມ​ສິດ​ໜ້າ​ທີ່ ​ແລະ ຄວາມ​ຮັບຜິດຊອບ​ຕາມ​ທີ່​ກົດໝາຍ​ກຳນົດ. (12) ສືບ​ຕໍ່​ສົມທົບ​ແໜ້ນ ​ແລະ ດຳ​ເນີນ​ການ​ປະສານ​ງານ, ປຶກສາ​ຫາລື​ເປັນ​ປົກກະຕິ​ລະຫວ່າງ​ກະຊວງ​ການ​ເງິນ ​ແລະ ອົງການ​ກວດ​ສອບ​ແຫ່ງ​ລັດ​ໃນ​ການ​ຕິດຕາມ​ກວດກາ​ການ​ປະຕິບັດ​ຜົນ​ຂອງ​ການກວດ​ສອບ, ການ​ແກ້​ໄຂ​ບັນຫາ​ຄົງ​ຄ້າງ ​ແລະ ຄົ້ນຄວ້າ​ມາດ​ຕະການ​ປ້ອງ​ກັນ​ບໍ່​ໃຫ້​ມີ​ການລະ​ເມີດ​ກົດໝາຍ, ມະຕິ​ສະພາ​ແຫ່ງ​ຊາດ ​ແລະ ວິ​ໄນ​ທາງ​ດ້ານ​ແຜນການ-ການ​ເງິນ ແລະ ອັນສໍາຄັນກະຊວງການເງິນໄດ້ສະເໜີລັດຖະບານ​ສືບ​ຕໍ່​ຮັກສາ​ດັດຊະນີ​ເງິນ​ເດືອນ​ພື້ນຖານ 7.200 ກີບ​ຕໍ່​ດັດຊະນີ​ໄວ້​ຄື​ເກົ່າ ​ເພື່ອ​ບໍ່​ໃຫ້​ລາຍ​ຈ່າຍ​ເພີ່ມ​ຂຶ້ນສູງ ​ແລະ ບໍ່​ໃຫ້​ຂາດ​ດຸນ​ເພີ່ມ, ພ້ອມທັງສະ​ເໜີ​ຄົ້ນຄວ້າ​ກຳນົດ​ເພດານ​ໂກ​ຕ້າ​ຮັບ​ພະນັກງານ​ລັດຖະກອນ​ໃໝ່ (ຂະ​ແໜງ​ປົກຄອງ) ​ໃນ​ຂອບ​ເຂດ​ທົ່ວ​ປະ​ເທດບໍ່ໃຫ້​ເກີນ 3.000 ຄົນ ​ເພື່ອ​ທົດ​ແທນ​ພະນັກງານ​ທີ່​ຮອດ​ກຳນົດ​ອາຍຸ​ກະສຽນ​ຮັບ​ບຳນານ, ສ່ວນ​ຕົວ​ເລກ​ຮັບກໍາລັງ​ເພີ່ມ​ຂອງ​ພາກສ່ວນປ້ອງ​ກັນ​ຄວາມ​ສະຫງົບ ​ແລະ ປ້ອງ​ກັນ​ປະ​ເທດ ແມ່ນສະ​ເໜີ​ພິຈາລະນາ​ແຕ່​ຫົວທີ ​ເພື່ອ​ກະກຽມ​ໃຫ້​ທັນ​ເວລາ ທັງ​ເປັນ​ການ​ຫລີກ​ເວັ້ນບໍ່​ໃຫ້​ມີ​ການ​ດັດ​ແກ້​ໃນ​ກາງ ຫລື ທ້າຍ​ປີ, ພ້ອມນີ້, ​ສະ​ເໜີ​ໃຫ້​ຄົ້ນຄວ້າຫັນ​ການ​ເບີກ​ຈ່າຍ​ເງິນ​ເດືອນ ​ແລະ ​ເງິນ​ອຸດ​ໜູນ​ໃຫ້​ແກ່​ພະນັກງານ​ຂອງ 2 ກຳລັງ, ສະ​ເພາະພາກສ່ວນ​ທີ່​ບໍ່​ເປັນຄວາມ​ລັບ​ຂອງ​ຊາດໃຫ້​ເຂົ້າ​ໃນ​ລະບົບ​ການ​ເບີກ​ຈ່າຍ​ຜ່ານ​ບັດ ATM ​ເພື່ອ​ສ້າງ​ຄວາມ​ໂປ່​ງ​ໃສ ​ແລະ ສະດວກ​ໃນ​ການ​ປະຕິບັດ ​ແລະ ຄຸ້ມ​ຄອງ.

error: Alert: Content is protected !!