ນະຄອນຫລວງພະບາງ ເປີດງານໂລະລາດໃນງານບຸນຫໍ່ເຂົ້າປະດັບດິນ ມີຜູ້ເຂົ້າຮ່ວມຢ່າງຄຶກຄື້ນ

ວັນທີ 1 ກັນຍາ 2024, ອົງການປົກຄອງນະຄອນຫລວງພະບາງ ໄດ້ຈັດງານໂລະລາດ ຫລື ລົງຕະຫລາດນັດແບບມວນຊົນ ເນື່ອງໃນໂອກາດບຸນຫໍ່ເຂົ້າປະດັບດິນ ຊ່ວງເຮືອເດືອນເກົ້າ ປະຈຳປີ ພສ 2567 ຄສ 2024, ມີ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ທ່ານ ສົມສະຫວາດ ເລັ່ງສະຫັວດ ອະດິດຮອງນາຍົກລັດຖະມົນຕີ, ພ້ອມດ້ວຍການນຳຂັ້ນແຂວງ, ຂັ້ນນະຄອນ-ເມືອງ, ມວນຊົນທັງພາຍໃນ ແລະ ຕ່າງປະເທດ ເຂົ້າຮ່ວມ ເປັນຈຳນວນຫລວງຫລາຍ ເຕັມໄປດ້ວຍບັນຍາກາດຟົດຟື້ນມ່ວນຊື່ນ.

ທ່ານ ບຸນເລື່ອມ ມະນີວົງ ຮອງເຈົ້າແຂວງຫລວງພະບາງ ປະທານຈັດງານບຸນຫໍ່ເຂົ້າປະດັບດິນ ຊ່ວງເຮືອເດືອນເກົ້າ ຫໍ່ເຂົ້າປະດັບດິນ ທີ່ນະຄອນຫລວງພະບາງ ປະຈຳປີ ພສ 2567 ຄສ 2024 ໄດ້ໃຫ້ສຳພາດວ່າ: ໃນປີນີ້ ອົງການປົກຄອງແຂວງ ກໍຄືນະຄອນຫລວງພະບາງ ໄດ້ເປີດກວ້າງການຈັດງານບຸນດັ່ງກ່າວ ໂດຍເຊີນເອົາເຮືອຊ່ວງ ແລະ ສີພາຍຈາກຕ່າງແຂວງເຂົ້າຮ່ວມແຂ່ງຂັນ, ສ່ວນການໂລະລາດ ໄດ້ປຸກລະດົມໃຫ້ປະຊາຊົນ ນຳເອົາສິນຄ້າ ມາວາງຂາຍໃຫ້ຫລາຍ ທັງໄດ້ມີການຄຸ້ມຄອງ ແລະ ຈັດສັນ ໃຫ້ເປັນລະບຽບຮຽບຮ້ອຍເຊິ່ງບັນດາກິດຈະກຳໄດ້ມີຂຶ້ນແຕ່ວັນທີ 24 ສິງຫາ ເປັນຕົ້ນມາ ເຊິ່ງທຸກກິດຈະກຳລ້ວນແຕ່ເປັນປະເພນີສືບທອດກັນມາແຕ່ເຫີງນານ.

ງານໂລະລາດ ຫລື ລົງຕະຫລາດນັດແບບມວນຊົນ ໂອກາດບຸນຫໍ່ເຂົ້າປະດັບດິນໃນປີນີ້ ໄດ້ຈັດຢູ່ຖະໜົນສີ ສະຫວ່າງວົງ (ເສັ້ນທາງກາງເມືອງ) ເລີ່ມແຕ່ 3 ແຍກບ້ານຈູ້ມຄ້ອງ (ໜ້າຫໍພະບາງ) ຫາ 3 ແຍກ ພະແນກໂຍທາທິການ ແລະ ຂົນສົ່ງແຂວງ, ມີ ບັນດາພໍ່ຄ້າ, ແມ່ຄ້າ-ຊາວຂາຍ ທັງພາຍໃນ, ແຂວງອ້ອມຂ້າງ ແລະຕ່າງປະເທດ ພ້ອມດ້ວຍປະຊາຊົນພາຍໃນແຂວງຫລວງພະບາງ ໄດ້ນຳເອົາສິນຄ້າກະສິກຳ ແລະ ຜະລິດຕະພັນ ສີໄມ້ລາຍມືຂອງຕົນ ມາວາງສະແດງຂາຍ ເປັນຕົ້ນ ເຄື່ອງຫັດຖະກຳ, ອຸດສາຫະກຳ, ເຄື່ອງນຸ່ງຫົ່ມ, ເຄື່ອງປ່າຂອງດົງ, ເຄື່ອງອຸປະໂພ-ບໍລິໂພກ, ເຄື່ອງໃຊ້ໃນຄົວເຮືອນ, ອາຫານ-ເຄື່ອງກິນດື່ມ ແລະໝາກໄມ້ຊະນິດຕ່າງໆ ທີ່ນຳມາປະກອບເປັນເຂົ້າຫໍ່ໂປ້ ຫລື ເຂົ້າປະດັບດິນ.

ພາຍຫລັງສຳເລັດການໂລະລາດ ປະຊາຊົນບັນດາເຜົ່າ ຈະໄດ້ກະກຽມເຄື່ອງວັດຖຸທານ ເປັນຕົ້ນ ເຮັດເຂົ້າຕົ້ມ-ເຂົ້າໜົມ ພິເສດແມ່ນເຮັດເຂົ້າຫໍ່ໂປ້ ຫລື ຫໍ່ເຂົ້າປະດັບດິນ ເພື່ອປະກອບພິທີໃນມື້ບຸນຫໍ່ເຂົ້າປະດັບດິນ. ມື້ແຮມ 14 ຄໍ່າ ກົງກັບວັນທີ 2 ກັນຍາ ເຊິ່ງເປັນມື້ບຸນຫໍ່ເຂົ້າປະດັບດິນ, ເລີ່ມແຕ່ຕອນເຊົ້າ ເວລາ 6 ໂມງເຊົ້າ ການນໍາພັກ-ລັດ ຈະໄດ້ຮ່ວມກັນໃສ່ບາດແດ່ພຣະສົງ ສາມະເນນ ທີ່ໜ້າວັດແສນສຸຂາຣາມ ຈາກນັ້ນເວລາ 9 ໂມງ ຈະໄດ້ເຕົ້າໂຮມແຂກ-ມວນຊົນ ແລະເຮືອຊ່ວງທີ່ເຂົ້າຮ່ວມແຂ່ງຂັນ ທີ່ຜາມໄຊເຮືອຊ່ວງ ບ້ານຊຽງທອງ-ຄີລີ ເພື່ອຈັດງານບຸນຊ່ວງເຮືອປະເພນີ ແລະ ດຳເນີນການຊ່ວງເຮືອຕະຫລອດວັນ.