ອິດສະລາແອນພົບສົບ 6 ຕົວປະກັນໃນອຸໂມງກາຊາ ທ່ານ ເນທັນຢາຮູ ກ່າວວ່າ ຮາມັດຕ້ອງຮັບຜິດຊອບ
ຝ່າຍຄວາມໝັ້ນຄົງຂອງອິດສະລາແອນຢືນຢັນ ການພົບສົບຕົວປະກັນຜູ້ຊາຍ ແລະ ຜູ້ຍິງລວມກັນ 6 ຄົນ ພາຍໃນອຸໂມງແຫ່ງໜຶ່ງຂອງເຂດກາຊາ, ສ່ວນຜູ້ນໍາອິດສະລາແອນກ່າວວ່າ: ຈະເອົາຄືນກຸ່ມຮາມັດ.
ວັນທີ 1 ກັນຍາ, ສໍານັກຂ່າວຕ່າງປະເທດລາຍງານວ່າ: ກອງທັບອິດສະລາແອນອອກຖະແຫລງການກ່ຽວກັບການພົບສົບຕົວປະກັນ 6 ຄົນ ແບ່ງເປັນຜູ້ຊາຍ 4 ຄົນ ແລະ ຜູ້ຍິງ 2 ຄົນ ພາຍໃນອຸໂມງແຫ່ງໜຶ່ງໃນເມືອງຣາຟາ ທາງຕອນໃຕ້ຂອງອິດສະລາແອນ ທັງໝົດເປັນຊາວອິດສະລາແອນ ໂດຍມີສອງຄົນຖືສັນຊາດອາເມລິກາ ແລະ ສັນຊາດຣັດເຊຍ.
ພົນຕີ ດານຽວ ຮາກາຣີ ໂຄສົກກອງທັບອິດສະລາແອນ ກ່າວວ່າ: ຕົວປະກັນທັງ 6 ຄົນຖືກກຸ່ມຮາມັດລັກພາຕົວໄປໃນວັນທີ 7 ຕຸລາ 2023 ແລະ ຖືກຄາດຕະກໍາຢ່າງໂຫດຫ້ຽມພາຍໃນເວລາບໍ່ດົນ ກ່ອນເຈົ້າໜ້າທີ່ຈະສາມາດເຂົ້າເຖິງຕົວປະກັນກຸ່ມນີ້.
ຂະນະທີ່ນາຍົກລັດຖະມົນຕີ ເບັນຈາມິນ ເນທັນຢາຮູ ຜູ້ນໍາອິດສະລາແອນ ກ່າວວ່າ: ການຄາດຕະກໍາຕົວປະກັນທັງ 6 ຄົນ ສະແດງໃຫ້ເຫັນວ່າ: ອີກຝ່າຍບໍ່ຕ້ອງການບັນລຸຂໍ້ຕົກລົງຢຸດຍິງ ແລະ ຢືນຢັນວ່າ: ອິດສະລາແອນຈະເອົາຄືນຢ່າງສາສົມ.
ທັງນີ້, ຕົວປະກັນທັງ 6 ຄົນທີ່ເສຍຊີວິດ ຢູ່ໃນກຸ່ມຕົວປະກັນ 251 ຄົນ ທີ່ກຸ່ມຮາມັດລັກພາຕົວໄປໄລຍະຕົ້ນຂອງສົງຄາມ ຈົນຮອດຕອນນີ້ມີການປະເມີນວ່າ: ຍັງເຫລືອຕົວປະກັນອີກ 97 ຄົນ, ແຕ່ໃນຈໍານວນນີ້ຢ່າງໜ້ອຍ 33 ຄົນ ເສຍຊີວິດ ຫລື ອາດເສຍຊີວິດແລ້ວ.
