ຫັນທີ່ດິນເປັນທຶນ: ບົດຮຽນທີ່ແສບກະດໍ້!

ໂດຍ : ມຶກບໍ່ແຫ້ງ

ທີ່ດິນແມ່ນຊັບສົມບັດຂອງວົງຄະນະຍາດແຫ່ງຊາດ ແຕ່ການນຳໃຊ້ ແລະຄຸ້ມຄອງທີ່ດິນ ໃນໄລຍະຜ່ານມານັ້ນຍັງມີຫຼາຍອັນທີ່ພວກເຮົາຄວນຮຽນຮູ້ ແລະຫຼີກລ່ຽງຂໍ້ຜິດພາດໃນອະນາຄົດ.

ເນື່ອງຈາກ ນະໂຍບາຍ “ເປີດ” ຂອງພວກເຮົາ ໂດຍສະເພາະການດຶງດູດການລົງທຶນພາຍໃນ ແລະຕ່າງປະເທດ ເຊິ່ງໃນນັ້ນ ຊັບພະຍາກອນທີ່ດິນແມ່ນໄດ້ກາຍເປັນສິ່ງດຶງດູດໃຈໃນການລົງທຶນຢ່າງກວ້າງຂວາງ ຕາມແນວທາງ “ ຫັນຊັບສິນເປັນທຶນ ” ທີ່ບາງກຸ່ມຄົນໄດ້ສວຍໃຊ້ໄປທາງທີ່ຜິດ ເຊິ່ງກໍ່ໃຫ້ເກີດບັນຫາທີ່ດິນກາຍເປັນສິ່ງຍາກຍິ່ງທີ່ຈະເຂົ້າໃຈ.

ຈາກບົດຄົ້ນຄວ້າຂອງລັດຖະບານແຫ່ງສປປລາວ ຮ່ວມກັບຄູ່ຮ່ວມພັດທະນາ ກ່ຽວກັບໃຫ້ເຊົ່າ ແລະສຳປະທານທີ່ດິນ ປີ 2013 ນັ້ນໄດ້ບົ່ງບອກວ່າ ໃນໄລຍະ 1 ທົດສະຫວັດຜ່ານມາ ການອະນຸມັດ ການລົງທຶນໃສ່ຊັບພະຍາກອນທີ່ດິນຢູ່​ລາວໄດ້ເພີ່ມຂຶ້ນຢ່າງໄວວາ ເຊິ່ງກວມເອົາເນື້ອທີ່ 1,1 ລ້ານເຮັກຕາ ນັບແຕ່ປີ 2000 ເປັນຕົ້ນມາ, ເມື່ອປຽບທຽບແລ້ວເນື້ອທີ່ດິນທີ່ພວກເຮົາໄດ້ອະນຸມັດເພື່ອການສຳປະທານ ແລະໃຫ້ເຊົ່ານັ້ນ ຫຼາຍກວ່າເນື້ອທີ່ ທີ່ພວກເຮົານຳ​ໃຊ້​ເຂົ້າ​ໃນ​ການປູກເຂົ້າທັງໝົດທົ່ວປະເທດ  ມີພຽງປະມານ 0.97 ລ້ານເຮັກຕາ.

ເຖິງແມ່ນວ່າຊັບພະຍາກອນທີ່ດິນຂອງພວກເຮົາຈະດຶງດູດນັກລົງທຶນທັງພາຍໃນ ແລະຕ່າງປະເທດ ໄດ້ເປັນຢ່າງດີ ເຊິ່ງນຳຜົນໄດ້ຮັບທີ່ດີ ຄື ການພັດທະນາພື້ນຖານໂຄງລ່າງ, ການປະກອບສ່ວນແກ່ການຫຼຸດຜ່ອນ ຄວາມທຸກຍາກ ແລະກະຕຸ້ນຜະລິດຕະພັນກໍຕາມ ແຕ່ການຫັນທີ່ດິນເປັນທຶນນີ້ພັດຖືກສວຍໃຊ້ໄປໃນທາງ ທີ່ຜິດຢ່າງຫຼວງຫຼາຍ ຕົວຢ່າງ ໃນປີ 2008 ຢູ່ແຂວງໄຊຍະບູລີ, ລັດຖະບານໄດ້ອະນຸມັດໃຫ້ບໍລິສັດໜຶ່ງ ສຳປະທານທີ່ດິນເນື້ອທີ່ 500 ເຮັກຕາ ເພື່ອປູກຢາງພາລາ ເຊິ່ງເນື້ອທີ່ດັ່ງກ່າວ ພັດຕິດຈອດກັບ ຂອບເຂດປ່າສະຫງວນຂອງແຂວງ, ພາຍຫຼັງບຸກເບີກເນື້ອທີ່  ແລະປູກເບ້ຍຢາງພາລາໃສ່ແລ້ວ, ບໍລິສັດດັ່ງກ່າວຍັງໄດ້ຕັ້ງໂຮງເລື່ອຍຂຶ້ນ ເຊິ່ງໃນສັນຍາສຳປະທານນັ້ນບໍ່ໄດ້ອະນຸຍາດໃນການກະທຳດັ່ງກ່າວ. ​ແຕ່ບໍລິສັດ ໄດ້ເລີ່ມຂຸດຄົ້ນໄມ້ທັງໃນຂອບເຂດການໃຫ້ສຳປະທານ ແລະເຂດປ່າສະຫງວນໄປພ້ອມໆກັນ, ເຖິງແມ່ນໜ່ວຍງານທີ່ກ່ຽວຂ້ອງຂອງແຂວງ ແລະເມືອງໄດ້ໄປກວດສອບ ແລະສັ່ງປິດໂຮງເລື່ອຍ ແຕ່ບໍລິສັດດັ່ງກ່າວຍັງສືບຕໍ່ຕັດໄມ້ຢູ່.

ນັ້ນກໍແມ່ນຕົວຢ່າງໜຶ່ງຂອງບົດຄົ້ນຄວ້າຂອງລັດຖະບານ ສົມທົບກັບຄູ່ຮ່ວມພັດທະນາ ແລະພາກສ່ວນ ທີ່ກ່ຽວຂ້ອງເຊິ່ງມັນເປັນຕົວຢ່າງອັນນ້ອຍໆອັນໜຶ່ງເທົ່ານັ້ນ ແລະຍັງອີກຫຼາຍຮ້ອຍ ຫຼືເປັນພັນກໍລະນີ ກໍຍິ່ງຮ້າຍແຮງໄປກວ່ານີ້  ພໍເຮົາສະດຸ້ງໄດ້ ຊັບພະຍາກອນທີ່ມີຄ່ານັ້ນກໍໝົດກ້ຽງໄປບໍ່ໜ້ອຍແລ້ວ, ເພາະສະນັ້ນ ມາຮອດວັນທີ 23 ຕຸລາ 2017 ທີ່ຜ່ານມາ ທ່ານ ທອງລຸນ ສີສຸລິດ ນາຍົກແຫ່ງສປປລາວ ໄດ້ອະທິບາຍກ່ຽວກັບ ບັນຫາທີ່ດິນ ໃນກອງປະຊຸມສະໄໝສາມັນເທື່ອທີ 3 ສະພາແຫ່ງຊາດຊຸດທີ VIII ວ່າ ໃນໄລຍະຜ່ານມານັ້ນ ການຄຸ້ມຄອງທີ່ດິນ ແມ່ນມີຫຼາຍອັນຜິດພາດແທ້ ເຊິ່ງໃນປັດຈຸບັນລັດຖະບານເຮົາເພິ່ນກໍກຳລັງຂຸ້ນຂ້ຽວແກ້ໄຂ ໂດຍເລີ່ມຈາກ ການສ້າງຍຸດທະສາດ ກ່ຽວກັບການຄຸ້ມຄອງນຳໃຊ້ທີ່ດິນ ແລະໄດ້ຜ່ານຄະນະບໍລິຫານງານສູນກາງ ພັກເປັນທີ່ຮຽບຮ້ອຍແລ້ວ ໂດຍແນ່ໃສ່ ປິດສາກການສວຍໃຊ້ຄຳວ່າ “ຫັນດິນເປັນທຶນ” ແລະສ້າງກົນໄກ ແລະລະບຽບການອື່ນໆເພື່ອເຮັດໃຫ້ການຄຸ້ມຄອງນຳໃຊ້ທີ່ດິນ ມີປະສິດທິຜົນຫຼາຍຂຶ້ນກວ່າເກົ່າ.

ບັດນີ້ລະ ບົດຮຽນອັນເຈັບແສບເຫຼົ່ານັ້ນຈະສ້າງຄວາມເຂັ້ມແຂງແກ່ພວກເຮົາ ແລະເປັນໂອກາດແກ່ ພວກເຮົາທຸກຄົນໃນການແລກປ່ຽນຂໍ້ມູນຈາກຫຼາຍແຫຼ່ງ ເພື່ອສະໜອງແກ່ລັດຖະບານໃນການສ້າງ ນະໂຍບາຍທີ່ຄັກແນ່ກວ່າເກົ່າ.

error: Alert: Content is protected !!