ຄະນະປະຈຳສະພາແຫ່ງຊາດ ພິຈາລະນາບັນຫາສໍາຄັນພື້ນຖານຂອງຊາດ
ວັນທີ 3-4 ກັນຍາ 2024, ຄະນະປະຈໍາສະພາແຫ່ງຊາດ ໄດ້ຈັດກອງປະຊຸມປະຈໍາເດືອນສິງຫາ 2024, ເພື່ອປຶກສາຫາລື ແລະ ພິຈາລະນາບັນຫາສໍາຄັນພື້ນຖານຂອງປະເທດຊາດ, ປະທານຂອງ ທ່ານ ໄຊສົມພອນ ພົມວິຫານ ປະທານຄະນະປະຈໍາສະພາແຫ່ງຊາດ.
ໃນກອງປະຊຸມໄດ້ພິຈາລະນາບັນຫາສໍາຄັນພື້ນຖານຂອງປະເທດຊາດ ຕາມຂອບເຂດສິດ ແລະ ໜ້າທີ່ຂອງຄະນະປະຈໍາສະພາແຫ່ງຊາດ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ເປັນຕົ້ນ ໜັງສືສະເໜີຂອງລັດຖະບານ ກ່ຽວກັບການດັດແກ້ສັນຍາສຳປະທານ ໂຄງການເຂື່ອນໄຟຟ້າດອນສະໂຮງ; ໜັງສືສະເໜີຂອງລັດຖະບານ ກ່ຽວກັບການຍົກເວັ້ນການຄິດໄລ່ອາກອນລາຍໄດ້ສຳລັບການເພີ່ມເງິນອຸດໜູນຄ່າຄອງຊີບໃຫ້ແກ່ພະນັກງານ-ລັດຖະກອນ, ທະຫານ, ຕຳຫລວດ, ພະນັກງານບຳນານ ແລະ ຜູ້ເສຍອົງຄະ; ຮ່າງແຜນຈັດສັນງົບປະມານການລົງທຶນຂອງລັດ ປະຈຳປີ 2025; ໜັງສືສະເໜີຂອງຄະນະປະຈໍາ ສະພາປະຊາຊົນນະຄອນຫລວງວຽງຈັນ ກ່ຽວກັບການຂໍໃຫ້ປຶກສາຫາລືຮ່ວມກັບ ລັດຖະບານໃນການພິຈາລະນາທົບທວນການອະນຸມັດສຳຫລວດ, ຊອກຄົ້ນ ແລະ ຂຸດຄົ້ນແຮ່ເກືອແຮ່ໂປຕາສ ຢູ່ນະຄອນຫລວງວຽງຈັນ.
ນອກນີ້, ຍັງໄດ້ຮັບຟັງການລາຍງານຜົນການຮຽບຮຽງ ເນື້ອໃນກົດໝາຍຂົງເຂດສະພາແຫ່ງຊາດ 3 ສະບັບ ຄື: ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ລາຍງານຄືນຜົນການປັບປຸງເນື້ອໃນ ຮ່າງກົດໝາຍວ່າດ້ວຍການສົ່ງເສີມການລົງທຶນ; ລາຍງານຄວາມຄືບໜ້າດ້ານຕ່າງໆໃນການກະກຽມເປັນເຈົ້າພາບຈັດກອງປະຊຸມສະ ມັດຊາໃຫຍ່ລັດຖະສະພາລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45 ແລະ ກອງປະຊຸມພົບປະລະຫວ່າງຜູ້ນຳອາຊຽນ ແລະ ຜູ້ນຳໄອປາ, ພ້ອມທັງທິດທາງແຜນການວຽກງານໃນຕໍ່ໜ້າ; ພິຈາລະນາຄຳຮ້ອງຂໍຄວາມເປັນທຳ 3 ເລື່ອງ.
ຂ່າວ: ສພຊ
