ທ່ານ ເນທັນຢາຮູ ຢືນຢັນຮັກສາກອງກໍາລັງທະຫານຕາມຊາຍແດນກາຊາ-ອີຢິບຕໍ່ໄປ ຢ້ານເປັນອັນຕະລາຍຕໍ່ອິດສະລາແອນທົ່ວປະເທດ
ທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ບໍ່ສົນໃຈສຽງຄັດຄ້ານ ຢືນຢັນຮັກສາກອງກໍາລັງທະຫານຢູ່ບໍລິເວນຊາຍແດນກາຊາ-ອີຢິບຕໍ່ໄປ ພາຍຫລັງໃຫ້ເຫດຜົນວ່າ: ຖ້າອິດສະລາແອນຕັດສິນໃຈຖອນກໍາລັງອອກຈາກລະບຽງຟິລາເດວຟີ (Philadelphi Corridor) ເຊິ່ງເປັນຈຸດຍຸດທະສາດສໍາຄັນເຂດຊາຍແດນ ອາດເປັນຄວາມຜິດພາດຄັ້ງໃຫຍ່ ເຮັດໃຫ້ສະຖານະການຮ້າຍແຮງກວ່າເກົ່າ ແລະ ເປັນອັນຕະລາຍຕໍ່ທ້ອງຖິ່ນ ລວມທັງອິດສະລາແອນທົ່ວປະເທດ.
ການຕັດສິນໃຈດັ່ງກ່າວຂອງຜູ້ນໍາອິດສະລາແອນມີຂຶ້ນຫລັງຈາກພົບສົບ 6 ຕົວປະກັນທີ່ຖືກສັງຫານໂດຍກຸ່ມຮາມັດໃນທ້າຍອາທິດຜ່ານມາ ທ່າມກາງສຽງຕໍ່ຕ້ານລັດຖະບານ ແລະ ຮຽກຮ້ອງໃຫ້ທ່ານ ເນທັນຢາຮູ ລາອອກຈາກຕໍາແໜ່ງນາຍົກລັດຖະມົນຕີ ພາຍຫລັງຂະບວນການແລກປ່ຽນຕົວປະກັນ ລວມທັງການເຈລະຈາຢຸດຍິງໃນໄລຍະຜ່ານມາບໍ່ປະສົບຜົນສໍາເລັດ.
ທ່ານ ເນທັນຢາຮູ ຍັງເນັ້ນເຖິງເປົ້າໝາຍສໍາຄັນ 3 ປະການຂອງອິດສະລາແອນທີ່ຍັງບໍ່ປ່ຽນແປງຄື: ການທໍາລາຍລ້າງກຸ່ມຮາມັດ, ການປ່ອຍຕົວປະກັນທັງໝົດໃຫ້ເປັນອິດສະຫລະ ແລະ ການສ້າງຫລັກປະກັນວ່າກາຊາຈະບໍ່ກາຍເປັນໄພຄຸກຄາມຕໍ່ອິດສະລາແອນອີກໃນອະນາຄົດ. ເຖິງວ່າເປົ້າໝາຍເຫລົ່ານີ້ອາດໝາຍເຖິງການເປັນໄປໄດ້ຈະເຮັດໃຫ້ບໍ່ມີຂໍ້ຕົກລົງຢຸດຍິງລະຫວ່າງອິດສະລາແອນ ແລະ ກຸ່ມຮາມັດເກີດຂຶ້ນອີກກໍຕາມ.
