ດັບເພີງຊີ້ແຈງກໍລະນີໄຟໃໝ້ເຮືອນປະຊາຊົນຢູ່ບ້ານທົ່ງຂັນຄໍາເສຍຫາຍຫລາຍຫລັງ

- Untitled design - ດັບເພີງຊີ້ແຈງກໍລະນີໄຟໃໝ້ເຮືອນປະຊາຊົນຢູ່ບ້ານທົ່ງຂັນຄໍາເສຍຫາຍຫລາຍຫລັງ

ພາຍຫລັງເກີດເຫດການໄຟໃໝ້ເຮືອນປະຊາຊົນຢູ່ບ້ານທົ່ງຂັນຄໍາ, ເມືອງຈັນທະບູລີ, ນະຄອນຫລວງວຽງຈັນຢ່າງຮຸນແຮງໃນເວລາປະມານ 11:00 ໂມງຂອງວັນທີ 31 ມີນາຜ່ານມາ, ໂດຍເຈົ້າໜ້າທີ່ໄດ້ລະດົມກໍາລັງ ແລະ ລົດນໍ້າຈໍານວນຫລາຍຄັນເຂົ້າຊ່ວຍເຫລືອກວ່າ 3 ຊົ່ວໂມງຈິ່ງສາມາດຄວບຄຸມໄຟໄວ້ໄດ້, ເຊິ່ງມີເຮືອນ 5 ຫລັງຖືກໄຟໃໝ້ເສຍຫາຍກ້ຽງ ແລະ ອີກ 5 ຫລັງຢູ່ໃກ້ຄຽງຖືກໄຟລວກ, ຊຶ່ງລວມມູນຄ່າເສຍຫາຍຫລາຍກວ່າຕື້ກີບ, ສ່ວນສາເຫດຍັງຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່, ແຕ່ແນວໃດກໍຕາມ, ຫລັງຈາກເຫດການດັ່ງກ່າວໄດ້ເກີດຂຶ້ນກໍມີມວນຊົນທີ່ເຫັນເຫດການໃກ້ຄຽງໄດ້ຖ່າຍພາບ ແລະ ວີດີໂອແລ້ວເຜີຍແຜ່ໃນສື່ສັງຄົມອອນລາຍຢ່າງກວ້າງຂວາງ, ເຮັດໃຫ້ມີຄົນເຂົ້າມາສະແດງຄວາມເຫັນໃຈຕໍ່ຜູ້ທີ່ໄດ້ຮັບເສຍຫາຍຈາກເຫດການໄຟໃໝ້ຄັ້ງນີ້, ຂະນະດຽວກັນກໍມີຄໍາຖາມຈາກສັງຄົມຕາມມາວ່າ: ເປັນຫຍັງຈຶ່ງມີຄວາມເສຍຫາຍຫລາຍທັງໆທີ່ຈຸດເກີດເຫດ ແລະ ບ່ອນລົດດັບເພິງປະຈໍາການຢູ່ນັ້ນກໍບໍ່ໄກກັນ?. ຕໍ່ປະເດັນດັ່ງກ່າວເຈົ້າໜ້າທີ່ມອດໄຟຊີ້ແຈງວ່າ: ຄືດັ່ງຫລາຍຄັ້ງຜ່ານມາ, ເມື່ອມີເຫດການເພີງໃໝ້ເກີດຂຶ້ນສັງຄົມມັກຈະຕໍານິວິຈານການປະຕິບັດໜ້າທີ່ຂອງເຈົ້າໜ້າທີ່ດັບເພີງວ່າມາຊ່ວຍເຫລືອຊັກຊ້າ ແລະ ອື່ນໆ, ແຕ່ໃນຄວາມເປັນຈິງແລ້ວມັນມີຫລາຍປັດໃຈທີ່ເຮັດໃຫ້ມີຄວາມຫຍຸ້ງຍາກຄື: ລົດມອດໄຟໄປຮອດສະຖານທີ່ແຕ່ເບື້ອງໄຟຟ້າພັດຍັງບໍ່ຕັດໄຟດັ່ງນັ້ນກໍບໍ່ສາມາດສີດນໍ້າໄດ້ ແລະ ອີກອັນໜຶ່ງແມ່ນເສັ້ນທາງຄັບແຄບແອອັດລົດມອດໄຟບໍ່ສາມາດເຂົ້າເຖິງຈຸດເກີດເຫດໄດ້ ຫລື ໃນຈຸດເກີດເຫດໄກຈາກແຫລ່ງສະໜອງນໍ້າກໍມີຄວາມຫຍຸ້ງຍາກໃນການລໍາລຽງຂົນສົ່ງນໍ້າມາດັບມອດໄຟ ແລະ ບັນຫາອື່ນໆ.

ແຕ່ແນວໃດກໍຕາມ, ເພື່ອປົກປັກຮັກສາຊີວິດ ແລະ ຊັບສີນຂອງປະຊາຊົນ ກໍຄືຮັກສາຄວາມສະຫງົບປອດໄພຂອງສັງຄົມໃຫ້ຫລຸດຜ່ອນລົງໃນຕໍ່ໜ້ານີ້, ກອງບັນຊາການ ປກສ ນະຄອນຫລວງວຽງຈັນໄດ້ມີແຈ້ງການໃຫ້ທຸກພາກສ່ວນສັງຄົມຈັດຕັ້ງປະຕິບັດຢ່າງເຂັ້ມງວດຄື: ການນໍາໃຊ້ໄຟຟ້າເຂົ້າໃນການຜະລິດ, ການດໍາລົງຊີວິດປະຈໍາວັນ ຫລື ວຽກງານອື່ນໆຕ້ອງປະຕິບັດຕາມຂໍ້ກໍານົດ ແລະ ຫລັກການຂອງບໍລິສັດໄຟຟ້າວາງອອກຢ່າງເຂັ້ມງວດ, ເອົາໃຈໃສ່ກວດກາສາຍໄຟຟ້າ, ອຸປະກອນ-ເຄື່ອງໃຊ້ໄຟຟ້າໃຫ້ມີສະພາບສົມບູນ ແລະ ຮັບປະກັນ, ຖ້າເຫັນວ່າເກົ່າແກ່ຊຸດໂຊມບໍ່ຮັບປະກັນຕ້ອງປ່ຽນໃໝ່ທັນທີ, ທຸກຄັ້ງທີ່ໃຊ້ຟືນໄຟ ແລະ ເຄື່ອງໃຊ້ໄຟຟ້າຕ່າງໆສໍາເລັດ ຫລື ກ່ອນອອກຈາກເຮືອນ, ສະຖານທີ່ເຮັດວຽກ, ບ່ອນຄ້າຂາຍ ແລະ ສະຖານທີ່ອື່ນໆ ຕ້ອງກວດກາລະບົບໄຟຟ້າໃຫ້ດີ ເຊັ່ນ: ມອດໄຟ, ຖອດປັກສຽບ, ປິດເຕົາແກັສ ແລະ ການໃຕ້ທູບທຽນບູຊາຕ້ອງຮັບປະກັນຄວາມປອດໄພ, ຮ້ານບູຊາຕ້ອງເຮັດດ້ວຍວັດຖຸທີ່ບໍ່ໄວໄຟ, ຫ່າງໄກຈາກບ່ອນທີ່ມີ້ເຊື້ອໄຟ ແລະ ທຸກຄັ້ງທີ່ສໍາເລັດການບູຊາແລ້ວຕ້ອງດັບມອດທຽນໃຫ້ດີ. ນອກຈາກນີ້ກໍຫ້າມຈູດຂີ້ເຫຍື້ອ, ປ່າ, ຫຍ້າແບບຊະຊາຍ, ຊຶ່ງອາດເປັນຕົ້ນເຫດຂອງການເກີດອັກຄີໄພຕາມມາ.

- Wave100S AD to Website 2020 0 - ດັບເພີງຊີ້ແຈງກໍລະນີໄຟໃໝ້ເຮືອນປະຊາຊົນຢູ່ບ້ານທົ່ງຂັນຄໍາເສຍຫາຍຫລາຍຫລັງ

 

- WhatsApp Image 2020 05 27 at 5 - ດັບເພີງຊີ້ແຈງກໍລະນີໄຟໃໝ້ເຮືອນປະຊາຊົນຢູ່ບ້ານທົ່ງຂັນຄໍາເສຍຫາຍຫລາຍຫລັງ
- WhatsApp Image 2020 05 27 at 5 - ດັບເພີງຊີ້ແຈງກໍລະນີໄຟໃໝ້ເຮືອນປະຊາຊົນຢູ່ບ້ານທົ່ງຂັນຄໍາເສຍຫາຍຫລາຍຫລັງ
error: Alert: ເນື້ອຫາຂ່າວມີລິຂະສິດ !!