ປກສ ແຂວງບໍ່ແກ້ວ ທຳລາຍຊິ້ນສ່ວນລົດດັດແປງສະພາບເຕັກນິກລົດ ແລະ ປ້າຍລົດທີ່ບໍ່ຖືກຕ້ອງ ຫລາຍລາຍການ

ວັນທີ 6 ກັນຍາ 2024, ພະແນກຕຳຫລວດ ຈະລາຈອນ ປກສ ແຂວງບໍ່ແກ້ວ ໄດ້ທຳລາຍຊິ້ນສ່ວນລົດດັດແປງສະພາບເຕັກນິກລົດ ແລະ ປ້າຍລົດທີ່ບໍ່ຖືກຕ້ອງ ທີ່ພະແນກຈະລາຈອນປົດອອກຈາກລົດທີ່ນຳມາເສຍພາສີ, ໂອນມາຈາກຕ່າງແຂວງ ແລະ ບັນດາອຸປະກອນດັດແປງສະພາບເຕັກນິກທີ່ບໍ່ຖືກຕ້ອງທີ່ໄດ້ມາຈາກຜູ້ລະເມີດ ຄື: ປະເພດລົດໃຫຍ່ ປ້າຍເອກະຊົນລາວ (ປ້າຍເຫລືອງ) 150 ຄູ່, ປ້າຍທຸລະກິດ 100% (ປ້າຍຂາວ) 50 ຄູ່ ແລະ ອຸປະກອນດັດແປງສະພາບເຕັກນິກມີຄື: ຊົກອັບແຕ່ງລົດຈັກ 36 ອັນ, ລາງລົດຈັກ ລາງນ້ອຍ 110 ອັນ, ຢາງນ້ອຍ 110 ເສັ້ນ, ໄຟສີ 15 ດອກ, ທໍ່ດັງແຮງ 45 ອັນ ແລະ ຄານຊີ່ 4 ອັນ.

ໂອກາດນີ້, ພະແນກຕຳຫລວດຈະລາຈອນ ປກສ ແຂວງບໍ່ແກ້ວ ໄດ້ຮຽກຮ້ອງມາຍັງທຸກພາກສ່ວນໃນທົ່ວສັງຄົມຈົ່ງລະມັດລະວັງໃນການຂັບຂີ່ລົດ ສັນຈອນໄປມາຕາມທ້ອງຖະໜົນ, ປະຕິບັດກົດລະບຽບການສັນຈອນ, ບໍ່ລະເມີດກົດລະບຽບການສັນຈອນທາງບົກ ເປັນຕົ້ນ ການຂັບຂີ່ລົດໄວເກີນຂອບເຂດ, ຂັບຂີ່ລົດຈັກບໍ່ໃສ່ໝວກກັນກະທົບ, ຂັບຂີ່ລົດໂດຍປະໝາດ, ຈອດລົດຢູ່ເຂດຫ້າມຈອດ, ເມົາບໍ່ຂັບ, ຂັບຂີ່ລົດດັດແປງສະພາບ ເຊັ່ນ: ລົດແຕ່ງເຄື່ອງສຽງເປີດດັງເກີນຂອບເຂດ, ໃສ່ທໍ່ດັງເກີນຂອບເຂດ, ໃສ່ຢາງນ້ອຍ, ຕັດເບາະ, ໂຫລດຊົກອັບ ຖ້າພະແນກຕຳຫລວດຈະລາຈອນ ຫາກກວດພົບເຫັນ ກໍຈະໄດ້ປະຕິບັດຕາມລະບຽບ ກົດໝາຍ.