ອິດສະລາແອນຖອນທະຫານອອກຈາກເວສແບງ ພາຍຫລັງສໍາເລັດປະຕິບັດການຄັ້ງໃຫຍ່

    ປະຕິບັດການທາງທະຫານຄັ້ງໃຫຍ່ທີ່ສຸດຄັ້ງໜຶ່ງຂອງອິດສະລາແອນໃນເຂດເວສແບງຢຸດລົງແລ້ວ ໂດຍມີການສັງຫານຜູ້ກໍ່ການຮ້າຍຢ່າງໜ້ອຍ 36 ຄົນ.

     ວັນທີ 7 ກັນຍາ, ກອງທັບອິດສະລາແອນຢືນຢັນການຖອນທະຫານອອກຈາກເມືອງເຈນິນ ໃນເຂດເວສແບງ ໃນວັນທີ 6 ກັນຍາຜ່ານມາ ພາຍຫລັງປະຕິບັດມາ 9 ວັນ ແລະ ເປັນຄັ້ງໃຫຍ່ທີ່ສຸດນັບແຕ່ປີ 2002.

     ປະຕິບັດການດ້ານຄວາມໝັ້ນຄົງດັ່ງກ່າວ ເຊິ່ງອິດສະລາແອນຢືນຢັນວ່າ: ເປັນການຕໍ່ຕ້ານການກໍ່ການຮ້າຍ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 36 ຄົນ ໃນຈໍານວນນີ້ຢ່າງໜ້ອຍ 21 ຄົນ ເປັນການເສຍຊີວິດຢູ່ເມືອງເຈນິນ ເຊິ່ງອິດສະລາແອນເນັ້ນວ່າ: ຜູ້ເສຍຊີວິດທັງໝົດເປັນສະມາຊິກກຸ່ມຫົວຮຸນແຮງ ແລະ ອິດສະລາແອນສູນເສຍທະຫານຈາກປະຕິບັດການຄັ້ງນີ້ນໍາ 1 ຄົນ, ແຕ່ກະຊວງສາທາລະນະສຸກປາແລັສຕິນກ່າວວ່າ: ມີເດັກລວມຢູ່ນໍາໃນບັນດາຜູ້ເສຍຊີວິດ.

      ທ່ານ ອິດສະລາແອນ ຄັດ ລັດຖະມົນຕີກະຊວງການຕ່າງປະເທດອິດສະລາແອນ ກ່າວວ່າ: ພາລະກິດດ້ານຄວາມໝັ້ນຄົງຂອງທະຫານຄັ້ງນີ້ມີຈຸດປະສົງເພື່ອທໍາລາຍໂຄງລ່າງພື້ນຖານດ້ານການກໍ່ການຮ້າຍທີ່ໄດ້ຮັບການສະໜັບສະໜູນຈາກອີຣານ.

     ຂະນະທີ່ກຸ່ມປາແລັສຕິນ ອິສລາມິກ ຈີຮັດ (PIJ) ເຊິ່ງເປັນກອງກໍາລັງຕິດອາວຸດຂະໜາດໃຫຍ່ອັນດັບສອງຂອງປາແລັສຕິນ ໂດຍເປັນພັນທະມິດກັບກຸ່ມຮາມັດ ແລະ ມີຖານທີ່ໝັ້ນຢູ່ທາງພາກເໜືອຂອງເຂດເວສແບງ ປະນາມອິດສະລາແອນຕ້ອງການເປີດເສິກຄູ່ຂະໜານກັບສົງຄາມຢູ່ເຂດກາຊາ.

     ທັງນີ້, ສະຖານະການຢູ່ເຂດເວສແບງທະວີຄວາມຮຸນແຮງ ຄວບຄູ່ໄປກັບສົງຄາມຢູ່ເຂດກາຊາ ເຊິ່ງຍືດເຍື້ອມາແຕ່ວັນທີ 7 ຕຸລາ 2023 ໂດຍມີຜູ້ເສຍຊີວິດຢູ່ເຂດເວສແບງແລ້ວເກືອບ 700 ຄົນ. ຂະນະທີ່ພົນລະເມືອງອິດສະລາແອນເສຍຊີວິດແລ້ວປະມານ 20 ຄົນ ສ່ວນຫລາຍເປັນທະຫານ.