ເລື່ອງປ້າຍບັນຫາຊ້ຳເຮື້ອ

- advert banner 728 90 728x90 - ເລື່ອງປ້າຍບັນຫາຊ້ຳເຮື້ອ

​ ​ໂດຍ: ທ່ຽງ​ທຳ

- new3 - ເລື່ອງປ້າຍບັນຫາຊ້ຳເຮື້ອ

ສະບາຍດີ ​ເພື່ອນ​ຜູ້​ອ່ານ​ທີ່​ຮັກ​ແພງ, ຫລາຍ​ຄົນ​ກໍ​ອາດ​ຈະ​ໄດ້​ເຫັນ ຖ້າ​ເວົ້າ​ເລື່ອງ​ປ້າຍ ນັບ​ທັງ​ປ້າຍ​ບົ່ງ​ບອກ​ບໍລິສັດ, ຫ້າງ​ຮ້ານ, ສຳນັກງານ​ອົງການ​ຕ່າງໆ ຕະຫລອດ​ຮອດ​ປ້າຍ​ໂຄສະນາ​ສິນຄ້າ​ອື່ນໆ ​ໂດຍ​ສ່ວນ​ຫລາຍ​ແລ້ວ​ແມ່ນ​ຈະ​ເຮັດ​ຕາມ​ໃຈ​ຂອງ​ຜູ້​ເປັນ​ເຈົ້າຂອງ ​ແລະ ການ​ອອກ​ແບບ, ​ເບິ່ງ​ຢ່າງ​ໜຶ່ງ​ຄື​ວ່າ​ບໍ່​ມີ​ລະບຽບ​ການ​ຄຸ້ມ​ຄອງ​ໃດໆ ທັງໆ​ທີ່​ລະບຽບ​ການ​ດັ່ງກ່າວ​ກໍ​ມີ​ໄວ້​ຢ່າງ​ຫລວງຫລາຍ ນັບ​ແຕ່​ຮູບ​ແບບ ​ແລະ ຂະໜາດ​ຂອງ​ປ້າຍ, ຕົວ​ໜັງສື​ລາວ​ຕ້ອງ​ຂຽນ​ໄວ້​ຂ້າງ​ເທິງ ​ແລະ ອື່ນໆ ກໍ​ໄດ້​ກຳນົດ​ແຈ້ງ, ​ແຕ່​ຕົວ​ຈິງ​ແລ້ວ​ຄື​ພຽງ​ຢູ່​ໃນ​ນະຄອນຫລວງ​ວຽງ​ຈັນ ພວກ​ເຮົາ​ກໍ​ຈະ​ເຫັນ​ກັນ​ຫລາຍ​ທີ່​ຜູ້​ເປັນ​ເຈົ້າຂອງ​ປ້າຍ​ບໍ່​ໄດ້​ເອົາ​ຫົວຊາ​ຕໍ່​ລະບຽບ​ການ​ດັ່ງກ່າວ, ຕົວ​ໜັງສື​ລາວ​ຢາກ​ຂຽນ​ແນວ​ໃດ​ກໍ​ຂຽນ, ບາງ​ອັນ​ບໍ່​ຖືກ​ຮອດ​ໄວຍາກອນ ​ແລະ ຕົວ​ໜັງສື​ສາກົນ​ກໍ​ເຮັດ​ໄປ​ຕາມ​ໃຈ, ບາງ​ບ່ອນ​ມີ​ແຕ່​ປ້າຍ​ເປັນ​ຕົວ​ໜັງສື​ຂອງ​ປະ​ເທດ​ຜູ້​ເປັນ​ເຈົ້າຂອງ​ກິດຈະການ​ເທົ່າ​ນັ້ນ, ມີ​ເພື່ອນ​ຫລາຍ​ຄົນ​ມາ​ຈາກ​ຖິ່ນ​ອື່ນໆ​ໃຫ້​ຂໍ້​ສັງ​ເກດ​ວ່າ: ປ້າຍ​ໂຄສະນາ ​ແລະ ຫ້າງ​ຮ້ານ​ຕ່າງໆ​ຢູ່​ບາງ​ເສັ້ນທາງ​ຫລັກ​ໃນ​ຕົວ​ເມືອງ​ວຽງ​ຈັນ ​ເມື່ອ​ຫລຽວ​ເບິ່ງ​ຄັກໆ​ແລ້ວ​ເກືອບ​ຈະ​ບໍ່​ຮູ້​ວ່າ​ນີ້​ເປັນ​ເມືອງ​ລາວ ​ໂດຍ​ສະ​ເພາະ​ຢູ່​ເສັ້ນທາງ​ T2 ​ແລະ ອື່ນໆ.

​ເອົາລະ ​ເວົ້າມາ​ກໍ​ຫລາຍ​ໃນ​ເລື່ອງ​ລະບຽບ​ປ້າຍ ​ແຕ່​ຈົນ​ເຖິງ​ປັດຈຸບັນ​ກໍ​ບໍ່​ມີ​ການ​ປ່ຽນ​ແປງ​ໃດໆ. ດັ່ງນັ້ນ ​ໃນ​ບົດ​ຂຽນ​ນີ້​ຢາກ​ສ່ອງ​ແສງ​ໃຫ້​ພາກສ່ວນ​ກ່ຽວຂ້ອງ​ຜູ້​ຄຸ້ມ​ຄອງ​ບັນຫາ​ດັ່ງກ່າວ​ຈົ່ງ​ໄດ້​ຮີບ​ຮ້ອນ​ກວດກາ​ແກ້​ໄຂ​ໃຫ້​ເດັດຂາດ ​ເພື່ອ​ຄວາມ​ເປັນ​ລະບຽບ​ຮຽບຮ້ອຍ​ແທດ​ເໝາະ​ກັບ​ລະບຽບ​ການ ​ແລະ ວັດທະນະທຳ​ເຮົາ ​ແລະ ​ເຮັດ​ແນວ​ໃດ​ໃຫ້​ຜູ້​ມາ​ທ່ຽວ​ລາວ​ໃນ​ປີ​ທ່ອງ​ທ່ຽວ​ນີ້​ໄດ້​ໃຫ້​ເຂົາ​ຍົກຍ້ອງ​ປະ​ເທດ​ເຮົາ.

error: Content is protected !!