ອົງການການເງິນສາກົນ ຮ່ວມມືກັບກະຊວງໂຍທາ ໃຫ້ຄຳປຶກສາການລົງທຶນປັບປຸງສະໜາມບິນສາກົນຫລວງພະບາງໃຫ້ທັນສະໄໝ

ວັນທີ 4 ກັນຍາ 2024,​ ອົງການການເງິນສາກົນ (IFC) ແລະ ກະຊວງໂຍທາທິການ ແລະ ຂົນສົ່ງ ໄດ້ລົງນາມໃນສັນຍາຮ່ວມມືການໃຫ້ບໍລິການທີ່ປຶກສາ ເພື່ອປັບປຸງສະໜາມບິນສາກົນຫລວງພະບາງໃຫ້ມີຄວາມທັນສະໄໝ ດ້ວຍຮູບແບບການລົງທຶນຮ່ວມ ລະຫວ່າງ ພາກລັດ ແລະ ເອກະຊົນ ຫລື PPP.

ການລົງນາມດັ່ງກ່າວ, ອົງການການເງິນສາກົນ ຈະເປັນທີ່ປຶກສາຫລັກ ສໍາລັບການລົງທຶນຮ່ວມ ລະຫວ່າງ ພາກລັດ ແລະ ເອກະຊົນ ເຊິ່ງມີຈຸດປະສົງເພື່ອຍົກລະດັບ ແລະ ຂະຫຍາຍສະໜາມບິນສາກົນຫລວງພະບາງ ຄຽງຄູ່ກັບການປັບປຸງ ຄວາມປອດໄພ ແລະ ປະສິດທິພາບຂອງສະໜາມບິນ ພາຍໃຕ້ສັນຍາສໍາປະທານໄລຍະຍາວ. ປັດຈຸບັນ, ສະໜາມບິນສາກົນຫລວງພະບາງ ຮອງຮັບຜູ້ໂດຍສານໄດ້ 1,3 ລ້ານຄົນຕໍ່ປີ ຊຶ່ງນຳໃຊ້ອາຄານຜູ້ໂດຍສານຫລັງດຽວ ສຳລັບຖ້ຽວບິນທັງພາຍໃນ ແລະ ຕ່າງປະເທດ. ເມື່ອໂຄງການລົງທຶນຮ່ວມ ລະຫວ່າງ ພາກລັດ ແລະ ເອກະຊົນ ນີ້ສໍາເລັດ, ສະໜາມບິນແຫ່ງນີ້ ຄາດວ່າຈະໃຫ້ບໍລິການຜູ້ໂດຍສານສາກົນຫລາຍກວ່າ 4 ລ້ານຄົນ ແລະ ຜູ້ໂດຍສານພາຍໃນ 500.000 ຄົນຕໍ່ປີ, ພ້ອມທັງຍົກລະດັບການເຊື່ອມຈອດຂອງ ສປປ ລາວ ກັບພາກພື້ນອາຊີຕາເວັນອອກສຽງໃຕ້ ແລະ ສາກົນ.

ທ່ານ ນາງ ວັນ ດີລະພັນ ຫົວໜ້າກົມແຜນການ ແລະ ການເງິນ, ກະຊວງໂຍທາທິການ ແລະ ຂົນສົ່ງ ກ່າວວ່າ: ແຂວງຫລວງພະບາງ ແມ່ນປະຕູສູ່ການທ່ອງທ່ຽວແຫ່ງສຳຄັນຂອງ ສປປ ລາວ, ສະຫນາມບິນສາກົນ ຫລວງພະບາງ ມີຜູ້ໂດຍສານເດີນທາງໜາແໜ້ນທີ່ສຸດອັນດັບ 2 ຂອງປະເທດ ແລະ ເຮັດໜ້າທີ່ເປັນສູນກາງເຊື່ອມຈອດລະດັບພາກພື້ນກັບ ນະຄອນຫລວງບາງກອກ, ແຂວງຊຽງໃໝ່ (ຣາຊະອານາຈັກໄທ), ແຂວງຊຽມລຽບ (ຣາຊະອານາຈັກກຳປູເຈຍ), ນະຄອນຫລວງວຽງຈັນ ແລະ ແຂວງອື່ນໆພາຍໃນປະເທດ. ການຮ່ວມມືໃນຄັ້ງນີ້, ແມ່ນປະຕິປັດຕາມການເຫັນດີຂອງ ລັດຖະບານ ໃນການນໍາໃຊ້ຄວາມຊ່ຽວຊານລະດັບໂລກຂອງ IFC ແລະ ຄົ້ນຫາທາງ ເລືອກທີ່ດີທີ່ສຸດ ເພື່ອນຳເອົາພາກເອກະຊົນມາມີສ່ວນຮ່ວມໃນການພັດທະນາໂຄງລ່າງພື້ນຖານ ດ້ານການທ່ອງທ່ຽວ.