ສະພາແຫ່ງຊາດຮັບຮອງເອົາກົດໝາຍວ່າດ້ວຍການຖ່າຍທອດເຕັກໂນໂລຊີ

- advert banner 728 90 728x90 - ສະພາແຫ່ງຊາດຮັບຮອງເອົາກົດໝາຍວ່າດ້ວຍການຖ່າຍທອດເຕັກໂນໂລຊີ

ໃນວາລະດໍາເນີນກອງປະຊຸມສະໄໝສາມັນສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII, ໃນວັນທີ 8 ພະຈິກນີ້, ສະມາຊິກສະພາແຫ່ງຊາດ ໄດ້ພ້ອມກັນປະກອບຄຳຄິດເຫັນຢ່າງກົງໄປກົງມາໃສ່ຮ່າງກົດໝາຍວ່າດ້ວຍການຖ່າຍທອດເຕັກໂນໂລຊີ ສະບັບສ້າງໃໝ່ ໃຫ້ມີເນື້ອໃນຄົບຖ້ວນສົມບູນ ແລະ ຮັດກຸມແທດເໝາະກັບຕົວຈິງຂອງປະເທດ ແລະ ເຫັນດີຮັບຮອງເອົາກົດໝາຍສະບັບນີ້ດ້ວຍຄະແນນສຽງສ່ວນຫຼາຍ, ຊຶ່ງກົດໝາຍດັ່ງກ່າວປະກອບມີ 11 ພາກ, 5 ໝວດ ແລະ 61 ມາດຕາ.

- new3 - ສະພາແຫ່ງຊາດຮັບຮອງເອົາກົດໝາຍວ່າດ້ວຍການຖ່າຍທອດເຕັກໂນໂລຊີ

ທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ໄດ້ຂຶ້ນສະເໜີຮ່າງກົດໝາຍດັ່ງກ່າວ ຕໍ່ກອງປະຊຸມວ່າ: ເພື່ອຊຸກຍູ້ສົ່ງເສີ່ມການນໍາໃຊ້ວິທະຍາສາດ ແລະ ເຕັກໂນໂລຊີ ໃນການພັດທະນາເສດຖະກິດ-ສັງຄົມຂອງປະເທດ. ແຕ່ປັດຈຸບັນນີ້ລາວເຮົາ ຍັງບໍທັນມີນິຕິກໍາເພື່ອຄຸ້ມຄອງ, ກວດກາການນໍາເຂົ້າ ແລະ ຖ່າຍທອດເຕັກໂນໂລຊີຢູ່ໃນປະເທດເຮົາ. ເພື່ອຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ແລະ ວິໄສທັດການພັດທະນາເຖິງປີ 2030 ນັ້ນ, ການນໍາເຕັກໂນໂລຊີເຂົ້າມາລາວນັບມື້ຫຼາຍຂຶ້ນ, ເປັນຕົ້ນແມ່ນບັນດານັກລົງທຶນ, ຜູ້ປະກອບການທັງພາຍໃນ ແລະ ຕ່າງປະເທດ ໄດ້ນໍາເຂົ້າເຕັກໂນໂລຊີໃໝ່ຫຼາຍຢ່າງຈາກຕ່າງປະເທດເຂົ້າມາເພື່ອລົງທຶນ ແລະ ບໍລິການຢູ່ໃນຫຼາຍຂົງເຂົດວຽກງານ ຊຶ່ງເຮັດໃຫ້ເສດຖະກິດ-ສັງຄົມຂອງປະເທດມີການຂະຫຍາຍຕົວ ແລະ ລວມຍອດຜະລິດຕະພັນພາຍໃນ (GDP) ກໍເຕີບໂຕຂຶ້ນ. ແຕ່ຄຽງຄູ່ກັນນັ້ນ, ຍ້ອນບໍ່ທັນມີນິຕິກໍາເພື່ອຄຸ້ມຄອງ ແລະ ຕິດຕາມກວດກາການນໍາເຂົ້າເຕັກໂນໂລຊີ ຈຶ່ງເກີດມີຫຼາຍກໍລະນີ ທີ່ນໍາເຕັກໂນໂລຊີລ້າສະໄໝຢູ່ປະເທດອື່ນ ແລ້ວເຂົ້າມາປະເທດເຮົາ ເຮັດໃຫ້ເກີດມົນລະຜິດຕໍ່ສິ່ງແວດລ້ອມ, ປະສິດທິຜົນຂອງການຜະລິດຕໍ່າ, ຜະລິດຕະພັນບໍ່ມີຄຸນນະພາບສູງ ແລະ ບໍ່ໄດ້ຕາມມາດຕະຖານສາກົນ. ການນໍາເຂົ້າເຕັກໂນໂລຊີສ່ວນຫຼາຍ ຍັງເປັນພຽງແຕ່ການນໍາເຂົ້າເຄື່ອງຈັກ ແລະ ພາຫະນະການຜະລິດ, ແຕ່ຍັງບໍ່ຕິດພັນກັບການຖ່າຍທອດຄວາມຮູ້ ແລະ ການພັດທະນາຊັບພະຍາກອນມະນຸດໃຫ້ລາວ. ສະນັ້ນຫຼາຍໂຄງການລົງທຶນ ຕ້ອງໄດ້ນໍາໃຊ້ຊ່ຽວຊານ ແລະ ວິຊາການຂອງຕ່າງປະເທດ, ສ່ວນແຮງງານທີ່ເປັນຄົນລາວຊໍ້າພັດບໍ່ໄດ້ຮັບການຝຶກອົບຮົມ ແລະ ຍົກລະດັບສີມືແຮງງານ, ຊຶ່ງທັງໝົດເຫຼົ່ານີ້ ເປັນການກົດໜ່ວງຖ່ວງດຶງການພັດທະນາປະເທດໄປຕາມທິດແບບຢືນຍົງ.

ສະນັ້ນ ເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ໃຫ້ປະກົດຜົນເປັນຈິງ, ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ່ VIII (2016-2020) ແລະ ວິໄສທັດຮອດປີ 2030 ຂອງລາວນັ້ນ ເຫັນວ່າທ່າອ່ຽງການນໍາເຂົ້າເຕັກໂນໂລຊີໃໝ່ທັນສະໄໝ ເພື່ອພັດທະນາປະເທດຊາດ ຍັງຈະເພີ່ມຂຶ້ນຢ່າງຫຼວງຫຼາຍ ຊຶ່ງມີຄວາມຈໍາເປັນທີ່ສຸດຕ້ອງໄດ້ສ້າງກົດໝາຍ ເພື່ອກວດກາຄຸ້ມຄອງການນໍາເຂົ້າ ແລະ ຖ່າຍເຕັກໂນໂລຊີເຫຼົ່ານີ້ຢ່າງເປັນເຈົ້າການ, ດັ່ງນັ້ນ ກະຊວງວິທະຍາສາດ ແລະ ເຕັກໂນໂລຊີ ຈຶ່ງສ້າງກົດໝາຍວ່າດ້ວຍ ການຖ່າຍທອດເຕັກໂນໂລຊີສະບັບນີ້ຂຶ້ນ, ເພື່ອເປັນເຄື່ອງມືທາງດ້ານນິຕິກໍາ ຮັບໃຊ້ໃຫ້ການຄຸ້ມຄອງ ແລ ຕິດຕາມກວດກາການເຄື່ອນໄຫວວຽກງານຕ່າງໆ ທາງດ້ານເຕັກໂນໂລຊີຢູ່ລາວ. ຮ່າງກົດໝາຍສະບັບນີ້ໄດ້ກໍານົດຫຼັກການ, ລະບຽບການ ແລະ ມາດຕະການຕ່າງໆ ເພື່ອການຄຸ້ມຄອງ ແລະ ຊຸກຍູ້ສົ່ງເສີມວຽກງານການຖ່າຍທອດເຕັກໂນໂລຊີໃນລາວ ເພື່ອຮັບປະກັນໃຫ້ການລວມສູນຄຸ້ມຄອງວຽກງານເຕັກໂນໂລຊີໃນຂອບເຂດທົ່ວປະເທດ ທັງເປັນການສົ່ງເສີມດຶງດູດການລົງທຶນທັງພາຍໃນ ແລະ ຕ່າງປະເທດ ແລະ ເພື່ອເອື້ອຍອໍານວຍໃຫ້ຜູ້ຜະລິດສິນຄ້າມີຄຸນນະພາບ ສາມາດແຂ່ງຂັນ ແລະ ເຊື່ອມໂຍງກັບພາກພື້ນ ແລະ ສາກົນໄດ້.

error: Content is protected !!