ປະມວນພາບຄວາມເສຍຫາຍຈາກພາຍຸຍາກິພັດຖະຫລົ່ມຫວຽດນາມ ຮຸນແຮງສຸດໃນຮອບ 30 ປີ
ຫວຽດນາມຜະເຊີນພາຍຸຮຸນແຮງທີ່ສຸດໃນຮອບ 30 ປີ ເຮັດໃຫ້ເກີດຄວາມເສຍຫາຍຢ່າງໜັກທົ່ວພາກເໜືອຂອງປະເທດ ສົ່ງຜົນເຮັດໃຫ້ປະຊາຊົນ 1.5 ລ້ານກວ່າຄົນບໍ່ມີໄຟຟ້າໃຊ້ ເຖິງວ່າປັດຈຸບັນນີ້ພາຍຸຫົວນີ້ຈະອ່ອນກໍາລັງລົງເປັນພາຍຸເຂດຮ້ອນແລ້ວ, ແຕ່ທາງການຍັງເຕືອນວ່າ: ພາຍຸຍາກິອາດເຮັດໃຫ້ເກີດຄວາມເສຍຫາຍເພີ່ມອີກຂະນະທີ່ກໍາລັງເຄື່ອນທີ່ໄປທາງທິດຕາເວັນຕົກ.
ມີລາຍງານວ່າ: ຂົວຟົງເຈົ່າ (Phong Chau Brigde) ຂ້າມແມ່ນໍ້າແດງຢູ່ແຂວງຟູເຖາະທາງພາກເໜືອຂອງຫວຽດນາມ ເຊິ່ງປົກກະຕິແລ້ວຈະມີລົດສັນຈອນຕະຫລອດ ພັງຖະຫລົ່ມລົງຈາກອິດທິພົນພາຍຸ ເຮັດໃຫ້ລົດ 10 ຄັນ ແລະ ລົດຈັກ 2 ຄັນຕົກລົງໄປໃນແມ່ນໍ້າ ໂດຍທ່ານ ໂຮ ດັກ ຟຸກ ຮອງນາຍົກລັດຖະມົນຕີຫວຽດນາມ ກ່າວວ່າ: ມີລົດບັນທຸກຄັນໜຶ່ງຕົກລົງສູ່ແມ່ນໍ້າຂະນະທີ່ຂົວພັງລົງ ໂດຍຄົນຂັບບໍ່ມີເວລາຢຸດລົດ ເຊິ່ງເຫດການນີ້ຖືກບັນທຶກວິດິໂອໄວ້. ເບື້ອງຕົ້ນມີຜູ້ໄດ້ຮັບການຊ່ວຍເຫລືອຈາກແມ່ນໍ້າຢ່າງໜ້ອຍ 3 ຄົນ.
ນອກຈາກນີ້, ພາຍຸດັ່ງກ່າວຍັງເຮັດໃຫ້ປະຊາຊົນ 240 ກວ່າຄົນໄດ້ຮັບບາດເຈັບ ຖືເປັນພາຍຸຮຸນແຮງທີ່ສຸດໃນອາຊີຂອງປີນີ້. ກະຊວງກະສິກໍາ ແລະ ການພັດທະນາຊົນນະບົດລະບຸວ່າ: ມີຜູ້ເສຍຊີວິດຢ່າງໜ້ອຍ 44 ຄົນຈາກເຫດການດິນເຈື່ອນ ແລະ ນໍ້າປ່າໄຫລຊຸ.
ທັງນີ້, ໄຕ້ຝຸ່ນຍາກິຍັງພັດຫລັງຄາເຮືອນປິວອອກ, ຕົ້ນໄມ້ຫັກຫລາຍຕົ້ນ ແລະ ສ້າງຄວາມເສຍຫາຍຢ່າງຮຸນແຮງຕໍ່ໂຄງລ່າງພື້ນຖານ ແລະ ໂຮງງານຢູ່ພາກເໜືອ ໂດຍຮູບຖ່າຍຈາກສໍານັກຂ່າວ Reuters ເຜີຍໃຫ້ເຫັນວ່າ: ກໍາແພງໂຮງງານ LG ໃນເມືອງຮາຍຟອງພັງລົງ.
ສ່ວນຢູ່ແຂວງອຽນບາຍ ລະດັບນໍ້າຖ້ວມສູງເຖິງ 1 ແມັດໃນວັນທີ 9 ກັນຍາ ເຮັດໃຫ້ 2,400 ກວ່າຄອບຄົວຕ້ອງອົບພະຍົບໄປຢູ່ບ່ອນປອດໄພ. ຂະນະທີ່ປະຊາຊົນເກືອບ 50,000 ຄົນໄດ້ຮັບການອົບພະຍົບອອກຈາກເມືອງ ເຊິ່ງທາງການຍັງອອກຄໍາເຕືອນໃຫ້ປະຊາຊົນໃນພື້ນທີ່ອື່ນໆທີ່ໄດ້ຮັບຜົນກະທົບຢູ່ແຕ່ໃນເຮືອນ, ສ່ວນໂຮງຮຽນໃນ 12 ແຂວງພາກເໜືອ ລວມທັງນະຄອນຫລວງຮ່າໂນ້ຍ ຖືກສັ່ງປິດຊົ່ວຄາວ.
ກ່ອນພາຍຸໄຕ້ຝຸ່ນຍາກິຈະເຄື່ອນທີ່ພັດຖະຫລົ່ມຫວຽດນາມ, ພາຍຸຫົວນີ້ໄດ້ຂ້າຊີວິດປະຊາຊົນໄປແລ້ວ 24 ຄົນຢູ່ຈີນຕອນໃຕ້ ແລະ ຟີລິບປິນ. ຂະນະທີ່ສະພາບໂລກຮ້ອນມີສ່ວນເຮັດໃຫ້ພາຍຸທະວີຄວາມຮຸນແຮງຂຶ້ນ ທັງຄວາມໄວລົມ ແລະ ປະລິມານນໍ້າຝົນ.
ອ້າງອີງ:
