ເມືອງດາກຈຶງ ຮື້ຖອນປ້າຍບໍ່ຖືກຕ້ອງລະບຽບ ພ້ອມສຶກສາອົບຮົມເຈົ້າຂອງປ້າຍຮ້ານຄ້າ

ວັນທີ 10 ກັນຍາ 2024, ທ່ານ ນາງ ສາຍໃຈ ບຸດດາກກັງ ຮອງຫົວໜ້າຫ້ອງການ ຖວທ ເມືອງດາກຈຶງ ພ້ອມດ້ວຍຄະນະ ໄດ້ລົງຕິດຕາມ, ກວດກາ ແລະ ຮື້ຖອນ ປ້າຍໂຄສະນາຕ່າງໆທີ່ບໍ່ຖືກຕ້ອງຕາມລະບຽບກົດໝາຍ ຊຶ່ງພົບເຫັນປ້າຍໂຄສະນາຕິດຕັ້ງບໍ່ເປັນລະບຽບ, ຕິດຕັ້ງຊະຊາຍ, ປ້າຍບໍ່ມີເຈົ້າຂອງ, ມີການລັກຕິດຕັ້ງ, ປ້າຍບໍ່ໄດ້ມາດຕະຖານ ແລະ ບໍ່ຖືກຕ້ອງຕາມຫລັກການໃຊ້ພາສາລາວ, ປ້າຍທີ່ມີແຕ່ພາສາຕ່າງປະເທດ, ພາສາຕ່າງປະເທດໃຫຍ່ກວ່າພາສາລາວ ແລະ ບາງປ້າຍການອອກແບບ, ສີ, ຂະໜາດ ບໍ່ຖືກຕ້ອງຕາມລະບຽບ ຈຳນວນ 36 ປ້າຍ.

ໂອກາດນີ້,ຄະນະຮັບຜິດຊອບໄດ້ສຶກສາອົບຮົມ, ກ່າວເຕືອນຜູ້ປະກອບການ ແລະ ຮື້-ຖອນປ້າຍໂຄສະນາ ຈໍານວນດັ່ງກ່າວ, ພ້ອມທັງໄດ້ຮຽກຮ້ອງໃຫ້ຜູ້ປະກອບການທັງພາກລັດ ແລະ ເອກະຊົນ ທີ່ນໍາໃຊ້ປ້າຍຈົ່ງໃຫ້ການຮ່ວມມື ໃນການຕິດຕັ້ງປ້າຍໃຫ້ຖືກຕ້ອງຕາມລະບຽບ ເພື່ອເຮັດໃຫ້ເມືອງດາກຈຶງມີຄວາມງົດງາມ, ທັງນີ້ກໍເພື່ອເຮັດໃຫ້ການຄຸ້ມຄອງປ້າຍໂຄສະນາ ແລະ ບໍລິການຢູ່ເມືອງດາກຈຶງ ມີຄວາມເປັນລະບຽບຮຽບຮ້ອຍ ແລະ ຖືກຕ້ອງຕາມລະບຽບກົດໝາຍ.