ອົງການອະນາໄມໂລກອະນຸມັດ ມາດຕະຖານວັກຊີນປ້ອງກັນພະຍາດໝາກສຸກລີງເປັນຄັ້ງທໍາອິດ
ອົງການອະນາໄມໂລກ (WHO) ອອກກໍານົດສ່ວນປະກອບເບື້ອງຕົ້ນຂອງວັກຊີນປ້ອງກັນພະຍາດໝາກສຸກລີງ MVA-BN ເປັນຄັ້ງທໍາອິດ ເພື່ອກໍານົດມາດຕະຖານ ແລະ ຫລຸດຕົ້ນທຶນການທົດສອບວັກຊີນໃນປະເທດລາຍໄດ້ໜ້ອຍ ແລະ ເລັ່ງການຈັດຫາວັກຊີນໃນຫລາຍພື້ນທີ່.
ວັນທີ 14 ກັນຍາ, ທ່ານ ເທດຣອສ ແອດຮານອມ ເກເບຣເຢຊຸສ ຜູ້ອໍານວຍການ WHO ກ່າວວ່າ: ການກໍານົດຄຸນສົມບັດເບື້ອງຕົ້ນຂອງວັກຊີນປ້ອງກັນພະຍາດໝາກສຸກລີງ MVA-BN ຜະລິດໂດຍບໍລິສັດບາວາຣຽນ-ນໍດິກ ຂອງດານມາກ ຖືເປັນບາດກ້າວສໍາຄັນຂອງການຕໍ່ສູ້ການແຜ່ລະບາດຂອງພະຍາດດັ່ງກ່າວໃນທະວີບອາຟຣິກາ ແລະ ແຫ່ງອື່ນໃນອະນາຄົດ.
ທ່ານເນັ້ນເຖິງການເລັ່ງຈັດຫາ, ບໍລິຈາກ ແລະ ເປີດຕົວວັກຊີນຢ່າງຮີບດ່ວນ ເພື່ອໃຫ້ໝັ້ນໃຈວ່າ: ໂລກຈະສາມາດເຂົ້າເຖິງວັກຊີນໄດ້ຢ່າງເທົ່າທຽມກັນ ເພື່ອປ້ອງກັນການຕິດເຊື້ອ, ຢຸດການແຜ່ລະບາດ ແລະ ຊ່ວຍຊີວິດ.
ທັງນີ້, ລາຍການສ່ວນປະກອບເບື້ອງຕົ້ນຂອງວັກຊີນປ້ອງກັນພະຍາດໝາກສຸກລີງຈາກ WHO ຈະຖືກໃຊ້ເພື່ອປະເມີນຄຸນນະພາບ, ຄວາມປອດໄພ ແລະ ປະສິດທິພາບຂອງຜະລິດຕະພັນ ເຊິ່ງຈະຊ່ວຍໃຫ້ສະຫະປະຊາຊາດ (UN) ແລະ ໜ່ວຍງານສາກົນແຫ່ງອື່ນ ສາມາດຈັດຫາຜະລິດຕະພັນເຫລົ່ານີ້ໄດ້. ຂະນະທີ່ປະເທດທີ່ມີລາຍໄດ້ໜ້ອຍ ເຊິ່ງບໍ່ມີທຶນໃນການທົດສອບ ສາມາດນໍາໄປໃຊ້ເພື່ອເລັ່ງອະນຸມັດການຈັດຫາໄດ້.
ຮອດປັດຈຸບັນນີ້, ຄອງໂກ ເຊິ່ງເປັນສູນກາງການແຜ່ລະບາດຂອງພະຍາດໝາກສຸກລີງຮອບປັດຈຸບັນ ໄດ້ຮັບວັກຊີນຈາກສະຫະພາບເອີຣົບ (EU) ແລ້ວປະມານ 200,000 ໂດສ ແລະ ປະມານ 50,000 ໂດສ ຈາກອາເມລິກາ.
