ນ້ຳຂອງ ໄຫລເຂົ້າຖ້ວມໃຈກາງເມືອງໜອງຄາຍ ປະເທດໄທ ບາງຈຸດສູງເກືອບ 2 ແມັດ

ວັນທີ 14 ກັນຍາ 2024, ສໍານັກຂ່າວປະເທດໄທລາຍງາຍວ່າ: ສະຖານະການນໍ້າຖ້ວມໃນພື້ນທີ່ ຈັງຫວັດໜອງຄາຍ ປະເທດໄທ ທີ່ຢູ່ຝັ່ງກົງກັນຂ້າມນະຄອນຫຼວງວຽງຈັນ ສປປ ລາວ ລະດັບນໍ້າຂອງຍັງສືບຕໍ່ເພີ່ມຂຶ້ນສູງ ວັດແທກລະດັບນໍ້າຢູ່ສູນອຸທົກກະສາດໜອງຄາຍ ໃນເວລາ 9:00 ໂມງ, ວັດແທກໄດ້ 13.67 ແມັດ ເພີ່ມຂຶ້ນຈາກມື້ວານ (ວັນທີ 13 ກັນຍາ 2024) 57 ຊັງຕີແມັດ ສູງກວ່າແຄມຝັ່ງ 1 ແມັດ 47 ຊັງຕີແມັດ, ສ່ວນປະລິມານນໍ້າຝົນແທກໄດ້ຫລາຍກວ່າ 156 ມິນລີແມັດ.

ລະດັບນໍ້າຍັງມີທ່າອ່ຽງເພີ່ມຂຶ້ນຈົນໄປເຖິງວັນທີ 16 ກັນຍາ 2024 ນີ້.

ໃນຄືນຜ່ານມາມີຝົນຕົກໜັກ ຈົນມາເຖິງຕອນເຊົ້າມື້ນີ້ກໍຍັງຄົງຕົກຢ່າງຕໍ່ເນື່ອງ ເຮັດໃຫ້ນໍ້າຂອງຍຶ່ງຂຶ້ນໄຫຼຊູເຂົ້າຕົວເມືອງໜອງຄາຍຕັ້ງແຕ່ເສັ້ນທາງແຄມຂອງ ໄຫຼທັ່ງໃສ່ເສັ້ນທາງມີໄຊ ແລະ ເສັ້ນທາງປະຈັກສິລະປາຄົມ ໃຈກາງເຂດເສດຖະກິດຂອງ ຈັງຫວັດໜອງຄາຍ.