ພາຍຸເບບິນກາພັດຂຶ້ນຝັ່ງນະຄອນຊຽງໄຮ້ ຮຸນແຮງທີ່ສຸດໃນຮອບ 75 ປີ
ພາຍຸເບບິນກາພັດຂຶ້ນຝັ່ງນະຄອນຊຽງໄຮ້ຂອງຈີນ ດ້ວຍຄວາມຮຸນແຮງທີ່ສຸດ ນັບແຕ່ປີ 1949.
ວັນທີ 16 ກັນຍາ, ສະຖານີວິທະຍຸໂທລະພາບກາງແຫ່ງປະເທດຈີນ (CCTV) ລາຍງານວ່າ: ພາຍຸເບບິນກາພັດຂຶ້ນຝັ່ງນະຄອນຊຽງໄຮ້ ດ້ວຍຄວາມໄວລົມສູງສຸດ 151 ກິໂລແມັດຕໍ່ຊົ່ວໂມງ ໃນຕອນເຊົ້າວັນທີ 16 ກັນຍານີ້ ຕາມເວລາທ້ອງຖິ່ນ ຖືເປັນພາຍຸມີຄວາມຮຸນແຮງທີ່ສຸດທີ່ພັດຂຶ້ນຝັ່ງມະຫານະຄອນແຫ່ງນີ້ ນັບແຕ່ພາຍຸກໍເຣຍ ໃນປີ 1949.
ເບື້ອງຕົ້ນຍັງບໍ່ມີການຢືນຢັນຄວາມເສຍຫາຍ ແລະ ການສູນເສຍທີ່ເກີດຂຶ້ນຕໍ່ຊີວິດ ແລະ ຊັບສິນຂອງປະຊາຊົນຢ່າງເປັນທາງການ. ຂະນະທີ່ເທສະບານນະຄອນຊຽງໄຮ້ ເຕືອນປະຊາຊົນໃນພື້ນທີ່ປະມານ 25 ລ້ານຄົນລ່ວງໜ້າ ໃຫ້ຫລີກລ່ຽງການອອກນອກເຄຫາສະຖານ. ສ່ວນສະຖານທີ່ປະກອບການຂະໜາດໃຫຍ່ເກືອບທຸກແຫ່ງປິດໃຫ້ບໍລິການ ລວມທັງສະໜາມບິນທັງສອງແຫ່ງໃນນະຄອນຊຽງໄຮ້ ໂຈະຖ້ຽວບິນທັງໝົດ, ສ່ວນບໍລິການເຮືອໂດຍສານ ແລະ ລົດໄຟ ຢຸດໃຫ້ບໍລິການເປັນສ່ວນຫລາຍ.
ທັງນີ້, CCTV ຄາດຄະເນເສັ້ນທາງຂອງພາຍຸເບບິນກາວ່າ: ຈະມຸ້ງໜ້າຂຶ້ນໄປທາງຕາເວັນຕົກສຽງເໜືອ ແລະ ເຕືອນໃຫ້ປະຊາຊົນໃນມົນທົນຈຽງຊູ, ມົນທົນເຈີຈ້ຽງ ແລະ ມົນທົນອານຮຸຍ ລະມັດລະວັງອັນຕະລາຍຈາກຝົນຕົກໜັກ ແລະ ກະແສລົມແຮງ.
ກ່ອນໜ້ານັ້ນ, ພາຍຸເບບິນກາພັດຂຶ້ນຝັ່ງທາງພາກກາງ ແລະ ພາກໃຕ້ຂອງຟີລິບປິນ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 6 ຄົນ ແລະ ພັດຜ່ານໝູ່ເກາະອາມາມິຂອງຍີ່ປຸ່ນ.
