ມີຜູ້ເສຍຊີວິດຫລາຍກວ່າ 100 ຄົນ ຈາກອຸທົກກະໄພຄັ້ງໃຫຍ່ຢູ່ມຽນມາ
ມີຜູ້ເສຍຊີວິດຈາກອຸທົກກະໄພຄັ້ງໃຫຍ່ຢູ່ມຽນມາເພີ່ມເປັນ 100 ກວ່າຄົນ ຕາມການເປີດເຜີຍຢ່າງເປັນທາງການໂດຍລັດຖະບານທະຫານ.
ວັນທີ 16 ກັນຍາ, ກະຊວງຂ່າວສານມຽນມາອອກຖະແຫລງການວ່າ: ຈໍານວນຜູ້ເສຍຊີວິດຈາກອຸທົກກະໄພຄັ້ງໃຫຍ່ພາຍໃນປະເທດ ເຊິ່ງເປັນອິດທິພົນຂອງພາຍຸຢາກິເພີ່ມເປັນຢ່າງໜ້ອຍ 113 ຄົນ ແລະ ມີຜູ້ໄດ້ຮັບບາດເຈັບຢ່າງໜ້ອຍ 14 ຄົນ, ແຕ່ຍັງມີຜູ້ສູນຫາຍອີກຢ່າງໜ້ອຍ 64 ຄົນ ຈຶ່ງມີຄວາມເປັນໄປໄດ້ສູງວ່າຈໍານວນຜູ້ເສຍຊີວິດຈະເພີ່ມຂຶ້ນອີກ.
ຂະນະດຽວກັນ, ປະຊາຊົນ 320,000 ກວ່າຄົນ ຈາກປະມານ 78,000 ຄອບຄົວ ຕ້ອງອົບພະຍົບອອກຈາກບ່ອນຢູ່ອາໄສ. ສ່ວນກົມອຸຕຸນິຍົມວິທະຍາແຫ່ງຊາດມຽນມາລາຍງານວ່າ: ລະດັບນໍ້າໃນແມ່ນໍ້າສະໂຕງ ແລະ ແມ່ນໍ້າພະໂຄ ເຊິ່ງໄຫລຜ່ານພາກກາງ ແລະ ພາກໃຕ້ຂອງປະເທດຍັງສູງຢູ່ໃນລະດັບອັນຕະລາຍ ແລະ ມີຄວາມສ່ຽງລົ້ນຕາຝັ່ງໄຫລເຂົ້າຖ້ວມບ້ານເຮືອນປະຊາຊົນ, ໜ່ວຍງານຫລາຍແຫ່ງເຕືອນໄພປະຊາຊົນໃນພື້ນທີ່ສ່ຽງໃຫ້ຂົນຍ້າຍສິ່ງຂອງຂຶ້ນທີ່ສູງ ແລະ ອົບພະຍົບ.
ທັງນີ້, ພົນເອກ ມິນ ອ່ອງ ຫລ່າຍ ຜູ້ບັນຊາການທະຫານສູງສຸດ ແລະ ຜູ້ນໍາລັດຖະບານທະຫານມຽນມາ ມີຄໍາສັ່ງໃຫ້ເຈົ້າໜ້າທີ່ໜ່ວຍງານລັດຕິດຕໍ່ປະສານງານໜ່ວຍງານຕ່າງປະເທດ ເພື່ອຂໍການສະໜັບສະໜູນດ້ານກູ້ໄພ ແລະ ການມອບການຊ່ວຍເຫລືອໃຫ້ປະຊາຊົນໃນພື້ນທີ່ປະສົບອຸທົກກະໄພ.
