7 ວິທີປະຢັດເງິນໄດ້ຫລາຍຂຶ້ນໂດຍການໃຊ້ຊີວິດແບບງ່າຍໆ

1. ນິຍາມຄຳວ່າ “ພໍ” ຂອງທ່ານໃໝ່ : ທ່ານມີທຸກຢ່າງທີ່ທ່ານຕ້ອງການຫລືຍັງ ? ທ່ານພໍໍໃຈກັບສິ່ງທີ່ທ່ານມີຫລືບໍ່ ? ວັດທະນະທຳສະໄໝໃໝ່ສ້າງຂຶ້ນຈາກການຊັກຈູງໃຫ້ທຸກຄົນມີຄວາມຕ້ອງການຫລາຍຂຶ້ນ ດ້ວຍເຫດຜົນທີ່ວ່າທ່ານເໝາະສົມກັບມັນ ແລະ ນອກຈາກທີ່ທ່ານຈະໄດ້ມັນມາຄອບຄອງແລ້ວ ທ່ານຍັງຕ້ອງຍົກລະດັບເພື່ອໃຫ້ສິ່ງນັ້ນມີຄວາມທັນສະໄໝຍິ່ງຂຶ້ນຕະຫລອດເວລາ ເຊິ່ງກໍເປັນເລື່ອງປົກກະຕິທີ່ທ່ານຈະໃຊ້ຈ່າຍຫລາຍຂຶ້ນເພື່ອຕອບສະໜອງຕໍ່ຄວາມສະດວກສະບາຍຕ່າງໆ ແຕ່ມັນອາດເປັນສິ່ງທີ່ທ່ານຍັງບໍ່ພໍ.

ເພື່ອປັບນິໄສການໃຊ້ຈ່າຍຂອງທ່ານ ຈົ່ງນິຍາມວ່າຄຳ “ພໍໍ”  ຂອງທ່ານເບິ່ງໃໝ່ອີກເທື່ອໜຶ່ງ ແລ້ວມັນຈະເຮັດໃຫ້ທ່ານປະຢັດ ຂຶ້ນ ແລະ ມີຄວາມສຸກໃນຊີວິດຫລາຍຂຶ້ນໄດ້ ຢ່າໃຫ້ໃຜມາບອກວ່າທ່ານຄວນເພີ່ມ ຫລື ຫລຸດຫຍັງ ເພາະທ່ານເທົ່ານັ້ນທີ່ເປັນຄົນກຳນົດມັນຂຶ້ນມາເອງ.

2. ຖອດປັ໊ກສິ່ງທີ່ບໍ່ຈຳເປັນ : ໝາຍເຖິງການຕັດຄ່າໃຊ້ຈ່າຍລາຍເດືອນທີ່ບໍ່ຈຳເປັນຂອງທ່ານອອກໄປ, ລອງຄຳນວນເບິ່ງວ່າ ທ່ານໝົດຄ່າໃຊ້ຈ່າຍລາຍເດືອນກັບຄວາມບັນເທີງໃດໄປແດ່ ບໍ່ວ່າຈະແມ່ນແພັກເກັດເຄເບິນລາຄາແພງ, ແພັກເກັດອິນເຕີເນັດລາຄາແພງ ຫລື ແພັກເກັດຟັງເພງອອນລາຍທີ່ໝົດໄປຕັ້ງບໍ່ຮູ້ເທົ່າໃດ ໂດຍຫລາຍໆຄົນຈຶ່ງຫັນມາໃຊ້ເວັບໄຊ ຫລື ແອັບພລິເຄຊັນສະຕຣີມມິງອອນລາຍລາຄາຖືກ ເຊັ່ນ : ອິນເຕີເນັດບໍ່ຈຳກັດ ຫລື ອາດປ່ຽນຈາກຟັງເພງອອນລາຍມາຟັງຜ່ານເວັບໄຊ ດັ່ງ Youtube ແທນການຊື້ແພັກເກັດຕ່າງໆໃນລາຄາທີ່ແພງກັນແລ້ວ. ຫາກທ່ານເປັນຄົນບໍ່ໄດ້ເບິ່ງຮູບເງົາ, ເບິ່ງໂທລະພາບ ຫລື ຟັງເພງຕະຫລອດ ນີ້ກໍແມ່ນວິທີທີ່ທ່ານສາມາດຫລຸດຄ່າໃຊ້ຈ່າຍໄດ້. ນອກຈາກນີ້ ໂທລະສັບຕັ້ງໂຕະກໍຍັງເປັນອີກໜຶ່ງຢ່າງທີ່ບໍ່ຈຳເປັນ ປານໃດ ເນື່ອງຈາກໃນປະຈຸບັນຜູ້ຄົນໃຊ້ໂທລະສັບມືຖືເປັນເຄື່ອງມືຕິດຕໍ່ຫລັກໄປແລ້ວ ດັ່ງນັ້ນ ບໍລິການຫຍັງແດ່ທີ່ບໍ່ຈຳເປັນກໍຖອດ ປັ໊ກອອກເພີ່ມເວລາໃນຊີວິດ ແລະ ເພີ່ມເງິນໃຫ້ກະເປົ໋າທ່ານດີກ່ວາ.
3. ລອງປ່ຽນກິດຈະວັດປະຈຳວັນງ່າຍໆ : ອາຫານທີ່ທ່ານກິນທຸກມື້ນີ້ທ່ານກິນຢູ່ໃສ, ຮ້ານອາຫານຫລືບໍ່ ? ຂີ້ເຫຍື້ອທີ່ທ່ານຖິ້ມ ເຄີຍເອົາມາໝູນໃຊ້ໃໝ່ແດ່ບໍ່ ? ແນ່ນອນວ່າຄວາມສະດວກເຮັດໃຫ້ຊີວິດເຮົາງ່າຍຂຶ້ນ ແຕ່ຍັງມີອີກຫລາຍວິທີທີ່ທ່ານສາມາດປ່ຽນ ການດຳລົງຊີວິດໄດ້ງ່າຍໆ ທັງປະຢັດຄ່າໃຊ້ຈ່າຍໄດ້ຫລາຍຂຶ້ນ ເຊັ່ນ: ການລອງປູກຜັກສວນຄົວກິນເອງ ການລອງເຮັດອາຫານກິນເອງຢູ່ເຮືອນເພື່ອເອົາໄປກິນບ່ອນເຮັດວຽກ ຫລື ລອງເອົາສິ່ງຂອງທີ່ບໍ່ໃຊ້ແລ້ວມາໝູນໃຊ້ໃໝ່ ເຊິ່ງສິ່ງເຫລົ່ານີ້ບໍ່ໄດ້ໃຊ້ເວລາດົນດັ່ງທີ່ຄິດເລີຍ ແລະ ທ່ານຈະຮູ້ສຶກພູມໃຈຫລາຍທີ່ໄດ້ລອງລົງມືເຮັດສິ່ງໃໝ່ໆດ້ວຍໂຕທ່ານເອງ.
4. ຫລຸດຄ່າໃຊ້ຈ່າຍບໍ່ຈຳເປັນເພື່ອເພີ່ມອິດສະຫລະໃຫ້ຊີວິດ : ຊັບສິນຈອງທ່ານກຳລັງຄອບຄອງທ່ານຢູ່ຫລືບໍ່ ? ເຮືອນ ແລະ ດິນຕ້ອງການຄ່າບຳລຸງຮັກສາຢ່າງຕໍ່ເນື່ອງ ຕັ້ງແຕ່ການເຮັດຄວາມສະອາດຈົນເຖິງການບຳລຸງຮັກສາລົດລາຄາແພງຕ້ອງການບຳລຸງຮັກສາເປັນຢ່າງດີ ແຕ່ລອງຄິດເບິ່ງວ່າຊັບສິນທີ່ກຳລັງກັດກິນຄວາມຮັ່ງມີທາງການເງິນ, ຮ່າງກາຍ ແລະ ອາລົມຂອງທ່ານຢູ່່ແດ່ ທ່ານຕ້ອງຫາເງິນຫລວງຫລາຍເພື່ອເອົາມາບຳລຸງຮັກສາສິ່ງຕ່າງໆທີ່ບໍ່ຈຳເປັນຢູ່ຫລືບໍ່ ? ເພາະຊີວິດທ່ານກໍຕ້ອງການໆບຳລຸງຮັກສາທີ່ມີຄຸນນະພາບຄືກັນ ດັ່ງນັ້ນ ຫລຸດຄ່າໃຊ້ຈ່າຍທີ່ບໍ່ຈຳເປັນເພື່ອເພີ່ມ ອິດສະຫລະໃຫ້ທ່ານໄດ້ຫັນມາເບິ່ງແຍງດູແລໂຕເອງແດ່.
5. ຢຸດການຊື້ເຄື່ອງຕາມແຟຊັນ : ກະແສ ຫລື ແຟຊັນ ມີການເຄື່ອນໄຫວຢ່າງຕໍ່ເນື່ອງ ແລະ ຍາກທີ່ຈະຕິດຕາມໄດ້ ສິ່ງຂອງທີ່ ກຳລັງຢູ່ໃນກະແສລາຄາສູງຂຶ້ນຢ່າງວ່ອງໄວ ຄຳຖາມຄື ເປັນຫຍັງທ່ານຕ້ອງຊື້ເຄື່ອງໃໝ່ໆທຸກລະດູການ ຫລື ທຸກປີ ? ຢ່າໃຫ້ແຟຊັນ ຫລື ເຄື່ອງມີີຍີ່ຫໍ້ມາຄວບຄຸມທ່ານ ຈົ່ງມີຮູບແບບທີ່ໂຕທ່ານເປັນເອງ ເຄື່ອງນຸ່ງທີ່ນຸ່ງບໍ່ຈຳເປັນຕ້ອງແພງຫລາຍສະເໝີໄປ ລອງຫາເຄື່ອງນຸ່ງດີໆ ລາຄາບໍ່ແພງ ມາປະສົມປະສານກໍເປັນຄວາມຄິດທີ່ດີຄືກັນ ຊ່ວຍໃຫ້ທ່ານປະຢັດຫລາຍຂຶ້ນ.
6. ໃຊ້ລະບົບຈ່າຍບິນອັດຕະໂນມັດ : ກະຕິກາຂອງການຈ່າຍບິນກໍຄື ທ່ານຕ້ອງຈ່າຍໃຫ້ກົງເວລາ ທ່ານຕ້ອງຈື່ມື້ຄົບກຳນົດໃຫ້ໄດ້ ບໍ່ດັ່ງນັ້ນທ່ານກໍຈະຈ່າຍລ່າຊ້າ ແລະ ເສຍຄ່າປັບຕື່ມນີ້ອາດເປັນເລື່ອງງ່າຍຫາກທ່ານບໍ່ຕ້ອງຈ່າຍບິນ 5 – 6 ບິນໃນແຕ່ລະຮອບ ເດືອນ. ການໃຊ້ລະບົບອັດຕະໂນມັດຈ່າຍບິນນັ້ນຊ່ວຍຫລຸດທັງຄ່າທຳນຽມ ແລະ ຫລຸດເວລາຂອງທ່ານໄດ້ນຳອີກ ເຊິ່ງຜູ້ໃຫ້ບໍລິການຫລາຍເຈົ້າກໍມີໂປຣໂມຊັນຫລຸດຄ່າທຳນຽມ ຫລື ອາດມີການສົ່ງເສີມການຂາຍພິເສດ ຫາກທ່ານຈ່າຍບິນອັດຕະໂນມັດເຊັ່ນກັນ ເຊັ່ນ : ການຊຳລະຄ່າໂທລະສັບ ຫລື ຄ່າແພັກເກັດອິນເຕີເນັດລາຍເດືອນຕ່າງໆຜ່ານຊ່ອງທາງອັດຕະໂນມັດຢ່າງສະໝໍ່າສະເໝີ.

7. ເລືອກໃຊ້ສິ່ງຂອງອະເນກປະສົງ (ດີ ແລະ ສະດວກ) : ຫາກທ່ານເນັ້ນໃສ່ຄວາມງ່າຍນັ້ນ ການເລືອກເຟີນິເຈີ ຫລື ສິນຄ້າອະເນກປະສົງທີ່ສ້າງຂຶ້ນຢ່າງລົງໂຕ ຈະຊ່ວຍໃຫ້ເຮືອນ ຫລື ຫ້ອງຂອງທ່ານມີພື້ນທີ່ໃຊ້ສອຍຫລາຍຂຶ້ນໄດ້ ເຮັດໃຫ້ຫ້ອງເບິ່ງເປີດກ້ວາງ ແລະ ເຮັດໃຫ້ບໍ່ອຶດອັດ ນອກຈາກນີ້ຍັງຊ່ວຍຫລຸດງົບປະມານໃນການຕົກແຕ່ງໂດຍເຄື່ອງແພງໆ ແຕ່ພັດບໍ່ຄ່ອຍມີປະໂຫຍດຫຍັງຫລາຍປານໃດ. ການຮັກສາຄວາມງ່າຍໃນຊີວິດນັ້ນລ້ວນຊ່ວຍເພີ່ມເວລາ ແລະ ຄວາມສາມາດໃນການໃຊ້ຊີວິດໃຫ້ຫລາຍຂຶ້ນ, ຫລຸດຄວາມເຄັ່ງຄຽດລົງ, ຕື່ມຊີວິດໃຫ້ເຕັມອີ່ມຢູ່ສະເໝີດ້ວຍສິ່ງງ່າຍໆ ບໍ່ວຸ້ນວາຍ ທັງຍັງຊ່ວຍໃຫ້ທ່ານປະຢັດເງິນໄດ້ຫລາຍຂຶ້ນນຳອີກ.