ນາຍົກລັດຖະມົນຕີ ໄດ້ຮັບລາງວັນ ຜູ້ນໍາອາຊຽນດີເດັ່ນ ປະຈໍາປີ 2024
ໃນຕອນຄໍ່າວັນທີ 16 ກັນຍາ 2024 ໄດ້ມີພິທີມອບລາງວັນ “ຜູ້ນໍາອາຊຽນ ດີເດັ່ນປະຈໍາປີ 2024 ໃຫ້ແກ່ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໃນໂອກາດກອງປະຊຸມເວທີປຶກສາຫາລື ກ່ຽວກັບການເປັນຜູ້ນໍາ ແລະ ຄູ່ຮ່ວມມືອາຊຽນ ປະຈໍາປີ 2024 ທີ່ຈັດຂຶ້ນ ໃນວັນທີ 16-17 ກັນຍາ 2024 ທີ່ນະຄອນຫລວງວຽງຈັນ ເຊິ່ງເປັນລາງວັນຜູ້ນຳອາຊຽນດີເດັ່ນ ເປັນລາງ ວັນ ທີ່ມີຄວາມໝາຍສຳຄັນຂອງສະຖາບັນຍຸດທະສາດອາຊີ-ປາຊີຟິກ ມອບໃຫ້ຜູ້ນໍາຂອງອາຊຽນ ທີ່ມີຜົນງານໃນການປະຕິບັດໜ້າທີ່ຂອງຕົນ.
ທ່ານ ຕັນ ສຣິ ມາຈິດ ຄັນ (Tan Sri Majid Khan), ປະທານສະຖາບັນຍຸດທະສາດອາຊີ- ປາຊີຟິກ ໄດ້ຕາງໜ້າໃຫ້ກອງປະຊຸມປຶກສາຫາລື ກ່ຽວກັບການເປັນຜູ້ນໍາ ແລະ ຄູ່ຮ່ວມມືອາຊຽນ ປະຈໍາປີ 2024 ເປັນຜູ້ມອບລາງວັນ ຜູ້ນໍາອາຊຽນດີເດັ່ນ ປະຈໍາປີ 2024 ໃຫ້ແກ່ ທ່ານນາຍົກລັດຖະມົນຕີ ສອນໄຊ ສີພັນດອນ ເພື່ອຊົມເຊີຍຜົນງານຂອງທ່ານໃນການປະກອບສ່ວນສ້າງສາພັດທະນາ ສປປ ລາວ ແລະ ປະກອບສ່ວນເຂົ້າໃນວຽກງານອາຊຽນ ໃນໄລຍະຜ່ານມາ ລວມທັງການເປັນປະທານອາຊຽນຂອງ ສປປ ລາວ ໃນປີ 2024. ໃນປີ 2019, ທ່ານ ທອງລຸນ ສີສຸລິດ ໃນເວລານັ້ນເປັນນາຍົກລັດຖະມົນຕີ ແຫ່ງ ສປປ ລາວ ກໍໄດ້ຮັບລາງວັນ “ຜູ້ນໍາອາຊຽນ ທີ່ມີຜົນສໍາເລັດດີເດັ່ນ ເຊັ່ນດຽວກັນ.
ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຂອບໃຈຢ່າງຈິງໃຈຕໍ່ ສະຖາບັນຍຸດທະສາດອາຊີ-ປາຊີຟິກ ແລະ ສະໂມສອນເສດຖະກິດອາຊຽນ ທີ່ໄດ້ມອບລາງວັນທີ່ສໍາຄັນດັ່ງ ກ່າວ ເຊິ່ງບໍ່ພຽງແຕ່ເປັນລາງວັນທີ່ເປັນການຊົມເຊີຍຜົນງານຂອງ ທ່ານນາຍົກລັດຖະມົນຕີເທົ່ານັ້ນ, ແຕ່ຍັງເປັນລາງວັນທີ່ຮັບຮູ້ ແລະ ຊົມເຊີຍການປະກອບສ່ວນຂອງປະຊາຊົນລາວ ເຂົ້າໃນການສ້າງສາພັດ ທະນາ ສປປ ລາວ ແລະ ການສະໜັບສະໜູນຈາກບັນດາປະເທດສະມາຊິກອາຊຽນ ແລະ ຄູ່ຮ່ວມມືພາຍນອກຂອງອາຊຽນຕະຫລອດໄລຍະຜ່ານມາ. ພ້ອມນີ້, ທ່ານນາຍົກລັດຖະມົນຕີ ຍັງໄດ້ສະແດງຄວາມຂອບໃຈຢ່າງຈິງໃຈ ຕໍ່ສະຖາບັນຍຸດທະສາດອາຊີ-ປາຊີຟິກ ທີ່ໄດ້ໃຫ້ການສະໜັບສະໜູນວຽກງານອາຊຽນ ໂດຍສະເພາະ ການສະໜັບສະໜູນການເປັນປະທານອາຊຽນຂອງ ສປປ ລາວ ໃນປີ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”. ການຮ່ວມມື ແລະ ການສະໜັບສະໜູນດັ່ງກ່າວ ເປັນການປະກອບສ່ວນທີ່ສໍາຄັນ ເພື່ອເຮັດໃຫ້ການເປັນປະທານອາ ຊຽນ ຂອງ ສປປ ລາວ ໃນປີ 2024 ໄດ້ຮັບຜົນສໍາເລັດຢ່າງຈົບງາມ.
ພາບຂ່າວ: ສຳນັກຂ່າວສານປະເທດລາວ
