ແຕ່ງຕັ້ງ ທ່ານ ປະເດີມພອນ ສົນທະນີ ເປັນຮອງເຈົ້າແຂວງສາລະວັນ

ວັນທີ 18 ກັນຍາ 2024 ນີ້, ແຂວງ ສາລະວັນ ໄດ້ຈັດພິທີປະກາດການແຕ່ງຕັ້ງ ທ່ານ ປະເດີມພອນ ສົນທະນີ ອະດີດຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເປັນຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງ ແຂວງສາລະວັນ ໂດຍມີ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ເຂົ້າຮ່ວມເປັນປະທານພິທີ.

ອີງຕາມຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ຢູ່ ແຂວງສາລະວັນ, ຄຳສັ່ງຂອງນາຍົກລັດຖະມົນຕີ ວ່າດ້ວຍ ການຍົກຍ້າຍພະນັກງານໄປຮັບໜ້າທີ່ໃໝ່ ໂດຍໄດ້ຍົກຍ້າຍ ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄປຮັບໜ້າທີ່ໃໝ່ຢູ່ແຂວງ ສາລະວັນ ແລະ ມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງ ທ່ານ ປະເດີມພອນ ສົນທະນີ ເປັນກຳມະການບໍລິຫານງານພັກແຂວງ, ກຳມະການຄະນະປະຈຳພັກແຂວງ, ເປັນຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງສາລະວັນ.

ໂອກາດດັ່ງກ່າວ, ພົນເອກ ຈັນສະໝອນ ຈັນຍາລາດ ໄດ້ຊີ້ນຳໃຫ້ເອົາໃຈໃສ່ພັດທະນາເສດຖະກິດ-ສັງຄົມຂອງແຂວງ ແລະ ຂຸດຄົ້ນທ່າແຮງບົ່ມຊ້ອນທີ່ມີຢູ່, ດຶງດູດເອົາການລົງທືນທັງພາຍໃນ ແລະ ຕ່າງປະເທດເພື່ອສ້າງແຫລ່ງລາຍຮັບໃຫ້ເພີ່ມຂຶ້ນ. ພ້ອມທັງຮຽກຮ້ອງມາຍັງບັນດາສະຫາຍໃນຄະນະບໍລິຫານງານພັກແຂວງ ແລະ ພະນັກງານຫລັກແຫລ່ງໃຫ້ການຊ່ວຍເຫລືອ ຮອງເລຂາຄະນະບໍລິຫານງານພັກແຂວງ ຮອງເຈົ້າແຂວງ ຜູ້ໃໝ່ ບົນພື້ນຖານເຮັດວຽກເປັນໝູ່ຄະນະ, ແບ່ງໃຫ້ບຸກຄົນຮັບຜິດຊອບ, ມີຄວາມເປັນເອກະພາບພາຍໃນຢ່າງໜັກແໜ້ນ ພ້ອມກັນພັດທະນາແຂວງສາລະວັນ ໃຫ້ຈະເລີນກ້າວໜ້າ ແລະ ເຕີບໃຫຍ່ເຂັ້ມແຂງ.