ຫລາຍແຂວງໄດ້ຮັບການຄຸ້ມຄອງ ແລະ ນໍາໃຊ້ເງິນກອງທຶນຄຸ້ມຄອງໄພພິບັດ ຊ່ວຍເຫລືອຜູ້ປະສົບໄພນໍ້າຖ້ວມ ຫລາຍຕື້ກີບ

ວັນທີ 18 ກັນຍາ 2024, ທ່ານ ລີປາວ ຢ່າງ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ປະທານສະພາບໍລິຫານ ກອງທຶນຄຸ້ມຄອງໄພພິບັດຂັ້ນສູນກາງ ໄດ້ຖະແຫລງຂ່າວຕໍ່ສື່ມວນຊົນວ່າ: ນັບແຕ່ວັນທີ 29 ສິງຫາ- 17 ກັນຍາ 2024 ໄດ້ມີພາກລັດ, ຫົວໜ່ວຍທຸລະກິດພາກລັດ-ເອກະຊົນ, ບຸກຄົນ, ນິຕິບຸກຄົນ ໃຫ້ການຊ່ວຍເຫລືອເຄື່ອງອຸປະໂພກ-ບໍລິໂພກ ແລະ ບໍລິຈາກເປັນເງິນ ເພື່ອຊ່ວຍແບ່ງເບົາຄວາມຫຍຸ້ງຍາກຂອງປະຊາຊົນຜູ້ປະສົບໄພພິບັດ ຢູ່ບັນດາແຂວງໂດຍຜ່ານຄະ ນະ ກໍາມະການຄຸ້ມຄອງໄພພິບັດຂັ້ນສູນກາງ ລວມມີ 39 ພາກສ່ວນ, ເປັນເງິນທັງໝົດ 32 ຕື້ 465 ລ້ານກວ່າກີບ.

ປັດຈຸບັນ ໄດ້ອະນຸມັດມອບເງິນກອງທຶນຄຸ້ມຄອງໄພພິບັດຈໍານວນ 1 ຕື້ກີບ ໃຫ້ 6 ແຂວງ ເພື່ອນໍາໃຊ້ເຂົ້າໃນການຕອບໂຕ້ສຸກເສີນ, ໄດ້ຊ່ວຍເຫລືອເຄື່ອງອຸປະໂພກ-ບໍລິໂພກໃຫ້ບັນດາແຂວງ ແລະ ນະຄອນ ຫລວງວຽງຈັນ ທີ່ໄດ້ຮັບຜົນກະທົບຈາກໄພພິບັດລວມມູນຄ່າ 5 ຕື້ກວ່າກີບ ແລະ ໄດ້ສົ່ງທີມງານປະເມີນລົງຮ່ວມກັບແຂວງດໍາເນີນການປະເມີນຜົນກະທົບ, ຜົນເສຍຫາຍ, ຄວາມຕ້ອງການຟື້ນ ຟູຮີບດ່ວນ ແລະ ຟື້ນຟູຫຼັງໄພພິບັດ ສໍາເລັດ 4 ແຂວງຄື: ແຂວງຫຼວງພະບາງ, ຫົວພັນ, ຊຽງຂວາງ ແລະ ໄຊຍະບູລີ.

ການນໍາໃຊ້ເງິນກອງທຶນໃນການແກ້ໄຂໄພພິບັດແມ່ນແຍກເປັນ 2 ສ່ວນ ຄື: ໂຄງການຟື້ນຟູຫລັງໄພພິບັດ ແມ່ນນໍາໃຊ້ເງິນໃນບ້ວງງົບປະມານໂຄງການລົງທຶນຂອງລັດທີ່ເອົາເຂົ້າແຜນງົບປະມານການລົງທຶນໃນແຕ່ລະປີຕາມກົດໝາຍ ແລະ ໂຄງການແກ້ໄຂໄພພິບັດສຸກເສີນ ແມ່ນນໍາໃຊ້ເງິນຈາກກອງທຶນຄຸ້ມຄອງໄພພິບັດ ຕາມມາດຕາ 47 ຂອງກົດໝາຍວ່າດ້ວຍການຄຸ້ມຄອງໄພພິບັດ ແລະ ມາດຕາ 5 ຂອງ ດໍາລັດວ່າດ້ວຍກອງທຶນຄຸ້ມຄອງໄພພິບັດ ຊຶ່ງມີງົບປະມານທີ່ລັດຖະບານຈັດສັນໃຫ້ແຕ່ລະປີ,
ສ່ວນເປົ້າໝາຍການນໍາໃຊ້ກອງທຶນການຊ່ວຍເຫລືອສຸກເສີນ ລວມມີ ບ່ອນຢູ່ອາໃສຊົ່ວຄາວ, ອາຫານ, ນໍ້າດື່ມ, ນໍ້າໃຊ້, ການບໍລິການແພດສຸກເສີນ, ເຄື່ອງນຸ່ງຫົ່ມ ແລະ ອື່ນໆ ໃຫ້ຜູ້ປະສົບໄພພິບັດ ແລະ ສ້ອມແປງໂຄງລ່າງພື້ນຖານທີ່ຈໍາເປັນ: ເຂັ້ນທາງ, ຂົວ, ໄຟຟ້າ, ໂທລະຄົມມະນາຄົມ, ນໍ້າສະອາດ, ໂຮງໝໍ ແລະ ສຸຂະນາໄມ; ປະເມີນຜົນເສຍຫາຍ ແລະ ຄວາມຕ້ອງການຮີບດ່ວນເບື້ອງຕົ້ນ.
ສປປ ລາວ ໄດ້ຮັບຜົນກະທົບຈາກພາຍຸ 3 ຫົວ ຄື: ພາຍຸດີເປຣຊັນ, ພາຍຸໝູນເຂດຮ້ອນ ພຣະພິຣູນ ແລະ ພາຍຸໄຕ້ຝຸ່ນ ຢາກິ ສົ່ງຜົນກະທົບຕໍ່ 15 ແຂວງ, ເຮັດໃຫ້ບ້ານເຮືອນຂອງປະຊາຊົນເປ່ເພເສຍຫາຍໜັກ, ພື້ນທີ່ທຳການຜະລິດ, ສັດລ້ຽງ, ຊົນລະປະທານ ແລະ ພື້ນຖານໂຄ່ງລ່າງ ເສຍຫາຍເປັນຈຳນວນມະຫາສານ.