ກຸ່ມແຮັດໂບລາຍິງຈະຫລວດໂຈມຕີພາກເໜືອຂອງອິດສະລາແອນ ເອົາຄືນເຫດການເຄື່ອງມືສື່ສານລະເບີດ

      ກຸ່ມແຮັດໂບລາຍິງຈະຫລວດ ແລະ ລູກສອນໄຟຈໍານວນຫລາຍ ໂຈມຕີເປົ້າໝາຍຫລາຍແຫ່ງຢູ່ພາກເໜືອຂອງອິດສະລາແອນ ເພື່ອຕອບໂຕ້ເຫດການອຸປະກອນສື່ສານລະເບີດຄັ້ງໃຫຍ່.

     ກຸ່ມແຮັດໂບລາອອກຖະແຫລງການວ່າ: ໄດ້ຍິງຈະຫລວດຫລາຍສິບລູກ ແລະ ລູກສອນໄຟຄັດຢູຊາ ໂຈມຕີສູນອຸດສາຫະກໍາທາງທະຫານຣາຟາເອລ ຢູ່ພາກເໜືອຂອງອິດສະລາແອນ ເພື່ອຕອບໂຕ້ເບື້ອງຕົ້ນຕໍການທີ່ອິດສະລາແອນຢູ່ເບື້ອງຫລັງ ເຫດການເພຈເຈີ ແລະ ວິທະຍຸສື່ສານຈໍານວນຫລາຍຂອງກຸ່ມແຮັດໂບລາ ລະເບີດພ້ອມກັນ ໃນວັນທີ 17 ກັນຍາ ແລະ 18 ກັນຍາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 37 ຄົນ ແລະ ມີຜູ້ໄດ້ຮັບບາດເຈັບ 3,000 ກວ່າຄົນ.

    ຂະນະດຽວກັນ, ກຸ່ມແຮັດໂບລາກ່າວວ່າ: ມີການຍິງຈະຫລວດ ແລະ ລູກສອນໄຟຈໍານວນປະມານດຽວກັນ ໂຈມຕີຖານທັບອາກາດ ແລະ ສະໜາມບິນຣາມັດ ເດວິດ ຢູ່ພາກເໜືອຂອງອິດສະລາແອນ ຫ່າງຈາກຊາຍແດນທາງພາກໃຕ້ຂອງລີບັງປະມານ 45-50 ກິໂລແມັດ ເພື່ອຕອບສະໜອງການທີ່ອິດສະລາແອນໂຈມຕີຫລາຍແຫ່ງຂອງລີບັງ ແລະ ສັງຫານຜູ້ບໍລິສຸດຈໍານວນຫລາຍ.

     ທັງນີ້, ການຍິງຈະຫລວດໃສ່ຖານທັບອາກາດຣາມັດ ເດວິດ ຂອງກຸ່ມແຮັດໂບລາ ຖືເປັນການໂຈມຕີເລິກເຂົ້າມາໃນອິດສະລາແອນຫລາຍທີ່ສຸດຄັ້ງໜຶ່ງ.

     ສ່ວນກອງທັບອິດສະລາແອນອອກຖະແຫລງການວ່າ: ກຸ່ມແຮັດໂບລາຍິງຈະຫລວດ ແລະ ລູກສອນໄຟຂ້າມແດນ ລວມ 100 ກວ່າລູກ ໃນຕອນເຊົ້າວັນທີ 22 ກັນຍາ ຕາມເວລາທ້ອງຖິ່ນ ພາຍຫລັງເຮືອບິນຮົບຂອງກອງທັບອາກາດອິດສະລາແອນໂຈມຕີເປົ້າໝາຍທີ່ກ່ຽວຂ້ອງກັບກຸ່ມແຮັດໂບລາ ປະມານ 400 ແຫ່ງ ຢູ່ລີບັງ ໃນວັນທີ 21 ກັນຍາຜ່ານມາ ສ່ວນຫລາຍເປັນແທ່ນຍິງຈະຫລວດ.

      ນອກຈາກນັ້ນ, ສູນບັນຊາການການຮົບສ່ວນໜ້າອິດສະລາແອນປະກາດຄໍາສັ່ງ ມີຜົນສໍາລັບປະຊາຊົນຢູ່ພາກເໜືອຂອງປະເທດ ລວມທັງເມືອງໄຮຟາວ່າ: ກິດຈະກໍາທີ່ລວມທັງການຮຽນ ແລະ ການເຮັດວຽກ ຈະເກີດຂຶ້ນໄດ້ເມື່ອມີຫ້ອງລົບໄພຢູ່ໃກ້ ແລະ ທຸກຄົນສາມາດເຂົ້າສູ່ພື້ນທີ່ໄດ້ພາຍໃນເວລາທີ່ໄວ ເມື່ອມີສັນຍານເຕືອນເທົ່ານັ້ນ, ສ່ວນການລວມກຸ່ມນອກສະຖານທີ່ໃນເວລານີ້ຈໍາກັດບໍ່ເກີນ 30 ຄົນ ແລະ ການລວມກຸ່ມພາຍໃນອາຄານຈໍາກັດຈໍານວນບໍ່ເກີນ 300 ຄົນ.