ຈີນ ຢູ່ແຖວໜ້າການລົງທຶນດ້ານພະລັງງານ ແລະ ບໍ່ແຮ່ ໃນລາວ.
ປັດຈຸບັນ, ໄດ້ມີນັກທຸລະກິດຈາກ ສປຈີນ ເຂົ້າມາລົງທຶນຢູ່ ສປປ ລາວ ໃນຫລາຍຂົງເຂດ ແລະ ພົ້ນເດັ່ນທີ່ສຸດແມ່ນຂົງເຂດພະລັງງານ ແລະ ບໍ່ແຮ່, ເຊິ່ງມາຮອດປັດຈຸບັນມີມູນຄ່າການລົງທຶນແລ້ວຫລາຍກວ່າ 10 ຕື້ໂດລາສະຫະລັດ, ຖືວ່າຈັດຢູ່ແຖວໜ້າຂອງການລົງທຶນຢູ່ລາວ.
ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ສຳພາດວ່າ: ສປຈີນ ເປັນປະເທດເພື່ອນມິດທີ່ດີມາຍາວນານ ແລະ ທັງເປັນຄູ່ຮ່ວມມືຍຸດທະສາດກັບປະເທດເຮົາ. ສໍາລັບການຮ່ວມມືພັດທະນາໃນຂະແໜງພະລັງງານ ແລະ ບໍ່ແຮ່ເຫັນມີປະສິດທິຜົນສູງ ແລະ ໄດ້ປະກອບສ່ວນສໍາຄັນ ເຂົ້າໃນການພັດທະນາເສດຖະກິດ-ສັງຄົມຂອງລາວໃຫ້ນັບມື້ເຕີບໃຫຍ່ເຂັ້ມແຂງ, ໂດຍສະເພາະການເຊື່ອມໂຍງດ້ານສາຍສົ່ງລະບົບ 115 ກິໂລໂວນ ແລະ 35 ກິໂລໂວນນັບຕັ້ງແຕ່ປີ 2003 ເປັນຕົ້ນມາຢູ່ຕາມຊາຍແດນ ເຊັ່ນ: ເມືອງຫລາ-ນາໝໍ້, ເມືອງສິງແຂວງຫລວງນ້ຳທາ, ເມືອງຍອດອູແຂວງຜົ້ງສາລີ ແລະ ປັດ
ຈຸບັນ, ໄດ້ປຶກສາຫາລືເພື່ອຍົກລະດັບແຮງດັນຂຶ້ນເປັນ 500 ກິໂລໂວນ, ພ້ອມທັງເພີ່ມທະວີປະລິມານການຊື້-ຂາຍໃຫ້ຫລາຍກວ່າເກົ່າລະຫວ່າງມົນທົນຢູໜານ ແລະ ລະບົບຂອງໄຟຟ້າລາວ. ນອກນີ້, ໄດ້ມີຫລາຍໂຄງການພັດທະນາສາຍສົ່ງໄຟຟ້າ, ໂຄງການກໍ່ສ້າງເຂື່ອນໄຟຟ້ານ້ຳຕົກຕ່າງໆ ແມ່ນໄດ້ຮັບການຮ່ວມມື ແລະ ສະໜອງທຶນຈາກບັນດາທະນາຄານຈີນ ເຊັ່ນ: EXIM Chaina, CDB, ICBC ແລະ ອື່ນໆ. ນອກນັ້ນ, ບັນດາລັດວິສາຫະກິດດ້ານໄຟຟ້າຈາກ ສປ ຈີນ ກໍໄດ້ປະກອບສ່ວນສະໜອງທຶນໃນການພັດທະນາດ້ານວິຊາການ ແລະ ດ້ານບຸກຄະລາກອນໃຫ້ກັບຂະແໜງພະລັງງານ ແລະ ບໍ່ແຮ່ໃນແຕ່ລະປີ.
ພ້ອມນີ້, ຍັງມີບັນດາໂຄງການໄຟຟ້າທີ່ເປັນການລົງທຶນຈາກນັກທຸລະກິດຈີນຄື: ໂຄງການໄຟຟ້າທີ່ໄດ້ຜະລິດແລ້ວມີເຂື່ອນນ້ຳລີກ 1-2, ນ້ຳງື່ມ 5, ນ້ຳງຽບ 2, ນ້ຳອູໄລຍະ I (2, 5, 6), ໂຄງການນ້ຳແບງ, ນ້ຳມັງ 1. ສໍາລັບໂຄງການໄຟຟ້າທີ່ຢູ່ໃນໄລຍະກໍ່ສ້າງມີ: ນ້ຳທາ 1, ນ້ຳອູໄລຍະ II (1, 3, 4, 7), ໂຮງໄຟຟ້າຄວາມຮ້ອນຖ່ານຫີນຫົວເມືອງແຂວງຫົວພັນ ແລະ ໂຄງການທີ່ຢູ່ໃນໄລຍະກະກຽມມີ: ເຂື່ອນນ້ຳຂອງຈຸດປາກແບງ, ຊະນະຄາມ, ເຊລະນອງ 1. ນອກນີ້, ຍັງມີການຮ່ວມມືລາວ-ຈີນ ໃນໂຄງການກໍ່ສ້າງສາຍສົ່ງໄຟຟ້າ 230 ກິໂລໂວນ ແລະ 500 ກິໂລໂວນອີກ 8 ໂຄງການ. ສໍາລັບດ້ານບໍ່ແຮ່ ແລະ ທໍລະນີສາດນັ້ນ, ໃນປີ 2016 ຜ່ານມາ, ໄດ້ເຊັນບົດບັນທຶກຮ່ວມມືກັບແຂວງກວາງຊີ ເພື່ອເພີ່ມທະວີແລກປ່ຽນຂໍ້ມູນ-ຂ່າວສານຊ່ວຍເຫລືອເຊິ່ງກັນ ແລະ ກັນໃນດ້ານແຮ່ທາດ, ໂດຍມີຫລາຍບໍລິສັດຈາກຈີນໄດ້ເຂົ້າມາສຳຫລວດ ແລະ ຂຸດຄົ້ນປຸງແຕ່ງແຮ່ທາດເຊັ່ນ: ເກືອກາລີ, ຊີລີຄອນ, ແຮ່ກົ່ວ ແລະ ຊືນເປັນຕົ້ນ, ພ້ອມທັງ ມີການຮ່ວມມືສ້າງແຜນທີ່ທໍລະນີສາດມາດຕາສ່ວນ 1/200.000 ຢູ່ເຂດໄຊຍະບູລີ-ຫລວງພະບາງ, ພ້ອມທັງແຜນທີ່ທໍລະນີສາດເຄມີໃນມາດຕາສ່ວນ 1/100.000 ໃນທົ່ວປະເທດ, ຊຶ່ງເປັນເງິນຊ່ວຍເຫລືອລ້າຈາກຈີນຈໍານວນ 21 ກວ່າລ້ານຢວນ (ສະກຸນເງິນຈີນ) ແຕ່ປີ 2012-2017.
