ສະພາບນ້ຳຖ້ວມບ້ານໜອງບົວພີ່ນ້ອງ ເມືອງພຽງ ໄຊຍະບູລີ ໄດ້ຮັບຜົນເສຍຫາຍ

ເນື່ອງຈາກຝົນຕົກໜັກແຕ່ວັນທີ 23 ກັນຍາ ຈົນເຖິງຕອນເຊົ້າຂອງວັນທີ 24 ກັນຍາ 2024 ນີ້ ໄດ້ສົ່ງຜົນໃຫ້ປະລິມານນ້ຳຝົນ ແລະ ນ້ຳພຽງ ມີລະດັບນ້ຳສູງຂຶ້ນ ໄດ້ໄຫລເຂົ້າຖ້ວມບ້ານເຮືອນ ໄຮ່ນາຮົ້ວສວນເສັ້ນທາງການສັນຈອນ ແລະ ທາງເຂົ້າ ບ້ານໜອງບົວພີ່ນ້ອງ ເມືອງພຽງ ແຂວງໄຊຍະບູລີ ໂດຍສະເພາະແມ່ນເຂດບ່ອນຮາບພຽງ, ຈຸດຮັບນ້ຳຂອບເຂດທີ່ຕໍ່າສົ່ງຜົນເຮັດໃຫ້ສັດລ້ຽງ, ເຄື່ອງໃຊ້ສອຍ, ເຮືອນຊານບ້ານຊ່ອງ, ໄຮ່ນາຮົ້ວສວນ ແລະ ຖະໜົນຫົນທາງໄດ້ຮັບຄວາມເສຍຫາຍຈຳນວນໜຶ່ງ.

ຕໍ່ສະພາບການດັ່ງກ່າວທາງຄະນະພັກອຳນາດການປົກຄອງເມືອງ ພ້ອມດ້ວຍຄະນະສະເພາະກິດຕ້ານໄພພິບັດຂັ້ນເມືອງ ເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງໄດ້ລົງຕິດຕາມເຝົ້າລະວັງ ໃຫ້ການຊ່ວຍເຫລືອຂົນຍ້າຍເຄຶ່ອງຂອງ ແລະ ສັດລ້ຽງອອກຈາກເຂດທີ່ໄດ້ຮັບຜົນກະທົບດັ່ງກ່າວໄປໄວ້ເຂດທີ່ປອດໄພພ້ອມທັງເກັບກຳຂໍ້ມູນເພື່ອໃຫ້ການຊ່ວຍເຫລືອໃນເບື້ອງຕົ້ນເປັນທີ່ຮຽບຮ້ອຍແລ້ວ, ພ້ອມນີ້ຄະນະພັກອຳນາດການປົກຄອງເມືອງໄດ້ ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງ ແລະ ປະຊາຊົນທີ່ຢູ່ໃນຂອບເຂດທີ່ມີຄວາມສ່ຽງທີ່ໄດ້ຮັບຜົນກະທົບຈົ່ງໄດ້ມີສະຕິພ້ອມກັນເຝົ້າລະວັງສະພາບການດັ່ງກ່າວເພຶ່ອຫລີກລ່ຽງຜົນກະທົບຜົນເສຍຫາຍທີ່ຈະສົ່ງຜົນສະທ້ອນຕໍ່ຊີວິດ ແລະ ສັບສິນຂອງຕົນໃຫ້ໄດ້ຮັບຜົນກະທົບໜ້ອຍທີ່ສຸດ.