ຫວຽດນາມກຽມສ້າງທາງລົດໄຟຄວາມໄວສູງແຕ່ເໜືອຮອດໃຕ້

     ຫວຽດນາມວາງແຜນກໍ່ສ້າງທາງລົດໄຟຄວາມໄວສູງແຕ່ເໜືອຮອດໃຕ້ ໄລຍະທາງ 1,540 ກິໂລແມັດ ດ້ວຍເງິນລົງທຶນປະມານ 67,300 ລ້ານໂດລາສະຫະລັດ.

     ກະຊວງຄົມມະນາຄົມຫວຽດນາມ ລະບຸວ່າ: ເສັ້ນທາງລົດໄຟສາຍນີ້ຈະມີຄວາມໄວອອກແບບ 350 ກິໂລແມັດຕໍ່ຊົ່ວໂມງ, ສະຖານີຂົນສົ່ງຜູ້ໂດຍສານ 23 ແຫ່ງ ແລະ ສະຖານີຂົນສົ່ງສິນຄ້າ 5 ແຫ່ງ ເຊິ່ງເຊື່ອມຕໍ່ສູນກາງຂົນສົ່ງສິນຄ້າທີ່ສໍາຄັນ.

     ຈຸດເລີ່ມຕົ້ນຂອງທາງລົດໄຟຄວາມໄວສູງສາຍນີ້ຈະຢູ່ນະຄອນຫລວງຮ່າໂນ້ຍ ຕັດຜ່ານເມືອງ ແລະ ແຂວງຕ່າງໆ ຈໍານວນ 20 ແຫ່ງ ໂດຍມີປາຍທາງຢູ່ເມືອງໂຮ່ຈີມິງ ທາງພາກໃຕ້ຂອງປະເທດ.

     ຕໍ່ຈາກນີ້, ກະຊວງຄົມມະນາຄົມຫວຽດນາມ ຈະສະເໜີນະໂຍບາຍການລົງທຶນໂຄງການທາງລົດໄຟຄວາມໄວສູງເສັ້ນທາງດັ່ງກ່າວ ເຊິ່ງຄາດວ່າຈະກໍ່ສ້າງສໍາເລັດພາຍໃນປີ 2035 ຕໍ່ກອງປະຊຸມທົ່ວໄປຂອງສະພາແຫ່ງຊາດ ເພື່ອໃຫ້ມີການອະພິປາຍໃນເດືອນຕຸລານີ້.