ຫວຽດນາມປະເມີນ ພາຍຸຢາກິເຮັດໃຫ້ເສດຖະກິດເສຍຫາຍ 81.5 ພັນຕື້ດົງ
ລັດຖະບານຫວຽດນາມ ເພີ່ມຄາດຄະເນຄວາມເສຍຫາຍທີ່ເກີດຂຶ້ນຕໍ່ເສດຖະກິດຂອງປະເທດຈາກອິດທິພົນຂອງພາຍຸຢາກິເປັນ 81.5 ພັນຕື້ດົງ.
ສໍານັກຂ່າວແຫ່ງຊາດຫວຽດນາມ (VNA) ລາຍງານໂດຍອ້າງເປັນຂໍ້ມູນຈາກກະຊວງກະສິກໍາຂອງປະເທດວ່າ: ອິດທິພົນຂອງພາຍຸໄຕ້ຝຸ່ນຢາກິ ທີ່ພັດຜ່ານພາກເໜືອຂອງຫວຽດນາມໃນຕົ້ນເດືອນນີ້ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 299 ຄົນ ແຕ່ຍັງສູນຫາຍອີກ 34 ຄົນ.
ຂະນະທີ່ເນື້ອທີ່ອຸດສາຫະກໍາ ແລະ ກະສິກໍາຢູ່ພາກເໜືອຂອງປະເທດ ໄດ້ຮັບຄວາມເສຍຫາຍເປັນວົງກວ້າງຈາກຜົນກະທົບທາງທໍາມະຊາດ ບໍ່ວ່າຈະເປັນນໍ້າຖ້ວມກະທັນຫັນ ຫລື ດິນເຈື່ອນ ສ້າງຄວາມເສຍຫາຍທາງເສດຖະກິດໃຫ້ຫວຽດນາມ ເປັນມູນຄ່າສູງເຖິງ 81.5 ພັນຕື້ດົງ ຫລື ປະມານ 3,310 ລ້ານໂດລາສະຫະລັດ.
ການປະເມີນດັ່ງກ່າວເພີ່ມຂຶ້ນສອງເທົ່າ ເມື່ອທຽບໃສ່ຂໍ້ມູນຊ່ວງຕົ້ນເດືອນກັນຍາ ເຊິ່ງຕອນນັ້ນ ລັດຖະບານຫວຽດນາມກ່າວວ່າ: ອາດເຮັດໃຫ້ລວມຍອດຜະລິດຕະພັນພາຍໃນ (GDP) ຫລຸດລົງ 0.15% ຈາກການຄາດຄະເນເສດຖະກິດຂອງປະເທດວ່າຈະເຕີບໃຫຍ່ລະຫວ່າງ 6.8-7.0% ໃນປີນີ້.
