ອີຣານຍ້າຍທ່ານ ຢາຕໍເລາະ ໄປຢູ່ບ່ອນທີ່ປອດໄພ ພາຍຫລັງອິດສະລາແອນສັງຫານຫົວໜ້າກຸ່ມແຮັດໂບລາ

      ມີລາຍງານກ່ຽວກັບການຍ້າຍຜູ້ນໍາສູງສຸດຂອງອີຣານໃຫ້ເຂົ້າໄປອາໄສຢູ່ສະຖານທີ່ປອດໄພສູງສຸດ ພາຍຫລັງອິດສະລາແອນສັງຫານຜູ້ນໍາກຸ່ມແຮັດໂບລາ.

      ໂດຍອ້າງຂໍ້ມູນຈາກແຫລ່ງຂ່າວລະດັບສູງດ້ານຄວາມໝັ້ນຄົງຢູ່ອີຣານວ່າ: ມີການຍ້າຍທ່ານ ຢາຕໍເລາະ ອາລີ ຄາເມເນອີ ຜູ້ນໍາສູງສຸດ ໄປອາໄສຢູ່ສະຖານທີ່ປອດໄພ ແລະ ມີມາດຕະການຮັກສາຄວາມປອດໄພລະດັບສູງສຸດພາຍໃນອີຣານ ພາຍຫລັງອິດສະລາແອນໂຈມຕີທາງອາກາດສັງຫານທ່ານ ຮໍາຊັນ ນາສຣາລເລາະ ຜູ້ນໍາສູງສຸດຂອງກຸ່ມແຮັດໂບລາ ຢູ່ນະຄອນຫລວງເບຣຸດຂອງລີບັງ ໃນວັນທີ 27 ກັນຍາຜ່ານມາ.

      ຂະນະດຽວກັນ, ກອງກໍາລັງພິທັກປະຕິວັດອີຣານ (IRGC) ມີຄໍາສັ່ງໃຫ້ເຈົ້າໜ້າທີ່ທຸກຄົນຢຸດການໃຊ້ເພຈເຈີ ແລະ ວິທະຍຸສື່ສານ ພາຍຫລັງເກີດເຫດອຸປະກອນດັ່ງກ່າວລະເບີດພ້ອມກັນຈໍານວນຫລາຍ ຢູ່ລີບັງໃນເດືອນນີ້ ສົ່ງຜົນເຮັດໃຫ້ມີຜູ້ເສຍຊີວິດ ແລະ ໄດ້ຮັບບາດເຈັບຈໍານວນຫລາຍ ເຊິ່ງລັດຖະບານລີບັງ, ກຸ່ມແຮັດໂບລາ ແລະ ລັດຖະບານອີຣານ ເຊື່ອວ່າອິດສະລາແອນຢູ່ເບື້ອງຫລັງເລື່ອງນີ້.

      ທັງນີ້, ການເສຍຊີວິດຂອງທ່ານ ນາສຣາລເລາະ ເອີ້ນໄດ້ວ່າ: ສ້າງແຮງສັ່ນສະເທືອນມະຫາສານໃຫ້ອີຣານ ເນື່ອງຈາກເປັນການສູນເສຍໜຶ່ງໃນພັນທະມິດຄົນສໍາຄັນຂອງການລວມຕົວແນວຮ່ວມໃນຕາເວັນອອກກາງ ເພື່ອຕໍ່ຕ້ານອິດສະລາແອນ ແລະ ອາເມລິກາ.

      ສ່ວນປະທານາທິບໍດີ ມາຊູດ ເປເຊຄຽນ ຜູ້ນໍາອີຣານ ກ່າວວ່າ: ເຖິງວ່າອາເມລິກາຢືນຢັນວ່າ: ບໍ່ໄດ້ຮັບແຈ້ງລ່ວງໜ້າກ່ຽວກັບປະຕິບັດການສັງຫານທ່ານ ນາສຣາລເລາະ, ແຕ່ລັດຖະບານວໍຊິງຕັນບໍ່ສາມາດປະຕິເສດໄດ້ໃນເລື່ອງການສົມຮູ້ຮ່ວມຄິດກັບທ່ານ ໄຊອໍນິສ.