ຄະນະປະຈຳສະພາແຫ່ງຊາດ ຫາລື-ພິຈາລະນາບັນຫາສໍາຄັນພື້ນຖານຂອງ ຊາດ ປະຈຳເດືອນກັນຍາ 2024
ວັນທີ 23-24 ກັນຍາ 2024, ຄະນະປະຈຳສະພາແຫ່ງຊາດ ໄດ້ຈັດກອງປະຊຸມ ປະຈໍາເດືອນ ກັນຍາ 2024, ເປັນປະທານຂອງທ່ານ ໄຊສົມພອນ ພົມວິຫານ ປະທານຄະນະປະຈໍາສະພາແຫ່ງຊາດ.
ກອງປະຊຸມໄດ້ພິຈາລະນາບັນຫາສໍາຄັນພື້ນຖານຂອງປະເທດຊາດ ຕາມຂອບເຂດສິດ ແລະ ໜ້າທີ່ຂອງຄະນະປະຈໍາສະພາແຫ່ງຊາດ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ; ພ້ອມທັງທິດທາງແຜນການວຽກງານຈຸດສຸມໃນຕໍ່ໜ້າ ຄື: ບົດລາຍງານຜົນການປັບປຸງເນື້ອໃນຮ່າງກົດໝາຍວ່າດ້ວຍການຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ (ສະບັບປັບປຸງ) ຕາມການສະເໜີຂອງນາຍົກລັດຖະມົນຕີ ແລະ ການປະກອບຄໍາເຫັນຂອງກອງປະຊຸມຄະນະປະຈໍາສະພາແຫ່ງຊາດ ຄັ້ງວັນທີ 8 ສິງຫາ 2024; ບົດລາຍງານການກະກຽມຄວາມພ້ອມຂອງຮ່າງກົດໝາຍທີ່ຈະນໍາເຂົ້າພິຈາລະນາຢູ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX; ການສະເໜີແຕ່ງຕັ້ງ, ຍົກຍ້າຍ ບຸກຄະລາກອນຂອງສານປະຊາຊົນ ຈໍານວນໜຶ່ງ; ຮ່າງແຜນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX; ການປະເມີນຜົນການຈັດຕັ້ງປະຕິບັດກົດໝາຍ 4 ສະບັບ ໃນຂົງເຂດວັດທະນະທໍາ-ສັງຄົມ; ບົດລາຍງານການຕິດຕາມກວດກາການຈັດຕັ້ງປະຕິບັດ ຍຸດທະສາດການປະຕິຮູບລະບົບການສຶກສາ ແລະ ພັດທະນາຊັບພະຍາກອນມະນຸດແຫ່ງຊາດ; ການຄົ້ນຄວ້າ ແລະ ມີຄໍາເຫັນຕໍ່ຮ່າງຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກໍາ ຮອດປີ 2030 ແລະ ວິໄສທັດຮອດປີ 2040; ຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍຫັນປ່ຽນປະເພດທີ່ດິນປ່າໄມ້ ໄປເປັນດິນອຸດສາຫະກໍາ ເພື່ອນໍາໃຊ້ເຂົ້າໃນໂຄງການຂຸດຄົ້ນ ແລະ ປຸງແຕ່ງຖ່ານຫີນ ຂອງບໍລິສັດ ຜົ້ງສາລີ ຈຽງເຊິນຟູໄຮ ບໍ່ແຮ່ ຈໍາກັດ; ຜົນການລົງຕິດຕາມກວດກາ ແລະ ການປະເມີນຄືນການຈັດຕັ້ງປະຕິບັດ, ການດໍາເນີນງານຂອງບັນດາໂຄງການລົງທຶນພັດທະນາເຂື່ອນໄຟຟ້າພະລັງງານນໍ້າ ຢູ່ແຂວງສະຫວັນນະເຂດ ແລະ ແຂວງຄໍາມ່ວນ; ຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍການພິຈາລະນາອອກມະຕິຮັບຮອງການຍົກເວັ້ນພາສີ, ອາກອນ ແລະ ຄ່າທໍານຽມຕ່າງໆ ໃນການຈັດຊື້ນໍ້າມັນເຊື້ອໄຟຮັບໃຊ້ວຽກງານປ້ອງກັນຊາດ ແລະ ການນໍາພັກ-ລັດ ປະຈໍາປີ 2024; ຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍໃຫ້ຄະນະປະຈໍາສະພາແຫ່ງຊາດ ພິຈາລະນາໃຫ້ສືບຕໍ່ປະຕິບັດມະຕິຂອງຄະນະປະຈໍາສະພາແຫ່ງຊາດ ສະບັບເລກທີ 238/ຄປຈ, ລົງວັນທີ 03 ສິງຫາ 2023 ກ່ຽວກັບການປັບຫລຸດອັດຕາພາສີຂາເຂົ້ານໍ້າມັນ Naphtha ຈາກ 20% ມາເປັນ 5% ໃຫ້ບໍລິສັດຍອດງື່ມ ພາວເວີມະຫາຊົນ; ຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການພິຈາລະນາຮັບຮອງ ແລະ ຍົກເວັ້ນການປະຕິບັດບາງມາດຕາຂອງກົດໝາຍ ທີ່ຕິດພັນກັບໂຄງການເຂື່ອນໄຟຟ້ານໍ້າເນີນ 1 ຂອງບໍລິສັດ ໄຟຟ້ານໍ້າຕົກນໍ້າເນີນ 1 ຈໍາກັດຜູ້ດຽວ; ຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການສະເໜີຂໍຍົກເວັ້ນການປະຕິບັດບາງເນື້ອໃນຂອງກົດໝາຍທີ່ພົວພັນກັບໂຄງການພະລັງງານໄຟຟ້າແສງຕາເວັນ ແມ່ໂຂງ ພາວເວີ ຈໍາກັດ.
ຂ່າວ: ສະພາແຫ່ງຊາດ
