ອິດສະລາແອນໂຈມຕີເມືອງຫລວງລີບັງຮອບໃໝ່ ມີຜູ້ເສຍຊີວິດອີກຢ່າງໜ້ອຍ 55 ຄົນ
ມີຜູ້ເສຍຊີວິດເພີ່ມອີກຢ່າງໜ້ອຍ 55 ຄົນ ຈາກການໂຈມຕີຂອງກອງທັບອິດສະລາແອນ ຢູ່ນະຄອນຫລວງເບຣຸດຂອງລີບັງ.
ກະຊວງສາທາລະນະສຸກລີບັງລາຍງານວ່າ: ມີຜູ້ເສຍຊີວິດອີກຢ່າງໜ້ອຍ 55 ຄົນ ແລະ ໄດ້ຮັບບາດເຈັບອີກຢ່າງໜ້ອຍ 156 ຄົນ ຈາກປະຕິບັດການໂຈມຕີຂອງກອງທັບອິດສະລາແອນທີ່ເກີດຂຶ້ນໃນຫລາຍພາກຂອງປະເທດ ໃນວັນທີ 24 ກັນຍາຜ່ານມາ.
ຈໍານວນຜູ້ເສຍຊີວິດດັ່ງກ່າວເພີ່ມສະຖິຕິຜູ້ເສຍຊີວິດຈາກການໂຈມຕີຕອບໂຕ້ກັນແຕ່ລະວັນ ລະຫວ່າງກອງທັບອິດສະລາແອນກັບກຸ່ມແຮັດໂບລາຢູ່ລີບັງ ເຊິ່ງເກີດຂຶ້ນຄູ່ຂະໜານກັບສົງຄາມຢູ່ເຂດກາຊາ ເຊິ່ງເລີ່ມຂຶ້ນໃນວັນທີ 7 ຕຸລາ 2023 ເພີ່ມເປັນຢ່າງໜ້ອຍ 1,873 ຄົນ.
ຂະນະທີ່ແຫລ່ງຂ່າວດ້ານຄວາມໝັ້ນຄົງຢູ່ລີບັງກ່າວວ່າ: ກອງທັບອິດສະລາແອນໂຈມຕີທາງພາກໃຕ້ຂອງນະຄອນຫລວງເບຣຸດຢ່າງໜ້ອຍ 5 ຄັ້ງ ໃນຕອນເຊົ້າຂອງວັນທີ 25 ກັນຍາຜ່ານມາ ຕາມເວລາທ້ອງຖິ່ນ, ສ່ວນກອງທັບອິດສະລາແອນກ່າວພຽງວ່າ: ເປັນປະຕິບັດການເດີນໜ້າໂຈມຕີຖານທີ່ໝັ້ນຂອງກຸ່ມແຮັດໂບລາຢູ່ເມືອງຫລວງຂອງລີບັງ.
ທ່ານ ນາອິມ ກັສເຊັມ ຮອງຜູ້ນໍາກຸ່ມແຮັດໂບລາ ກ່າວວ່າ: ກຸ່ມແຮັດໂບລາຈະຍຶດໝັ້ນຜະເຊີນກັບອິດສະລາແອນຕໍ່ໄປ ເພື່ອສະແດງຄວາມເປັນນໍ້າໜຶ່ງໃຈດຽວກັບຊາວປາແລັສຕິນ ແລະ ຊາວລີບັງໃນການຕອບໂຕ້ການລອບສັງຫານພົນລະເຮືອນຜູ້ບໍລິສຸດຢ່າງໂຫດຮ້າຍ. ພ້ອມຢືນຢັນວ່າ: ກຸ່ມແຮັດໂບລາພ້ອມຮັບມືການໂຈມຕີທຸກຮູບແບບຂອງອິດສະລາແອນ ບໍ່ວ່າຈະມາຈາກທາງບົກ, ທາງທະເລ ຫລື ທາງອາກາດ ແລະ ເຊື່ອວ່າ: ການສູ້ຮົບຄັ້ງນີ້ຈະຍັງຍືດເຍື້ອ.
ນອກຈາກນີ້, ທ່ານ ກໍາເຊັມ ຢືນຢັນວ່າ: ຂະບວນການຄົ້ນຫາຜູ້ນໍາຄົນໃໝ່ແທນທ່ານ ຮໍາຊັນ ນາສຣາລເລາະ ຜູ້ນໍາສູງສຸດ ທີ່ເສຍຊີວິດຈາກການໂຈມຕີຂອງກອງທັບອິດສະລາແອນຢູ່ນະຄອນຫລວງເບຣຸດ ຂອງລີບັງ ໃນວັນທີ 27 ກັນຍາຜ່ານມາ ຈະເກີດຂຶ້ນພາຍໃນອະນາຄົດອັນໃກ້ນີ້.
