ເປີດງານວາງສະແດງຜະລິດຕະພັນລາວ ປະຈໍາປີ 2024 ພາຍໃຕ້ຫົວຂໍ້ “ຊຸກຍູ້ເສດຖະກິດ ຜະລິດຕະພັນລາວ ກ້າວສູ່ສາກົນ”

ວັນທີ 1 ຕຸລາ 2024, ສະພາການຄ້າ ແລະ ອຸດສາຫະກໍາ ແຫ່ງຊາດ ໄດ້ເປີດງານວາງສະແດງຜະລິດຕະພັນລາວ ປະຈໍາປີ 2024 (Made in Laos 2024) ຢ່າງເປັນທາງການ ຢູ່ສູນການຄ້າລາວ-ໄອເຕັກ ນະຄອນຫລວງວຽງຈັນ, ເຂົ້າຮ່ວມໂດຍ ທ່ານ ສອນໄຊ ສີພັນດອນ ນາຍົກລັດຖະມົນຕີ. ເຊິ່ງງານປີນີ້ເລີ່ມເປີດໃຫ້ເຂົ້າທ່ຽວ-ຊົມ-ຊື້-ຊິມ, ອາຫານ ແລະ ສິນຄ້າພາຍໃນງານ ຕັ້ງແຕ່ວັນທີ 28 ກັນຍາ ຮອດວັນທີ 7 ຕຸລາ 2024 ນີ້.

ທ່ານ ນາງ ຈັນທະຈອນ ວົງໄຊ ຮອງປະທານ ສະພາການຄ້າ ແລະ ອຸດສາຫະກໍາ ແຫ່ງຊາດລາວ (ສຄອຊ) ກ່າວວ່າ: ງານຜະລິດຕະພັນລາວ ປີນີ້ຈັດຂຶ້ນເປັນປີທີ 10 ໂດຍເລີ່ມແຕ່ປີ 2011 ເປັນຕົ້ນມາ ເພື່ອເປັນການສ້າງກິດຈະກຳໜຶ່ງຂອງພາກທຸລະກິດ, ປະກອບສ່ວນໃນການສ້າງເວທີ ແລະ ເປັນການໂຄສະນາສົ່ງເສີມຜະລິດຕະພັນທີ່ຜະລິດໃນລາວ, ພ້ອມທັງຊຸກຍູ້ສົ່ງເສີມໃຫ້ຜູ້ປະກອບການທີ່ເຮັດການຜະລິດທັງພາຍໃນ ແລະ ຕ່າງປະເທດ, ໂດຍສະເພາະ ສ້າງຍີ່ຫໍ້ສິນຄ້າທີ່ຜະລິດໃນລາວໃຫ້ມີມາດຕະຖານ ແລະ ຄຸນນະພາບ, ສາມາດແຂ່ງຂັນຈຳໜ່າຍພາຍໃນ ແລະ ສົ່ງອອກຕ່າງປະເທດໃຫ້ນັບມື້ນັບຫລາຍຂຶ້ນ, ທັງເປັນການສ້າງຄວາມພາກພູມໃຈ, ຊຸກຍູ້ສົ່ງເສີມໃຫ້ນໍາໃຊ້ຜະລິດຕະພັນລາວ ແລະ ເພື່ອເປັນການຫລຸດຜ່ອນການນໍາເຂົ້າສິນຄ້າຈາກຕ່າງປະເທດ ພາຍໃຕ້ຫົວຂໍ້: “ຊຸກຍູ້ພັກດັນເສດຖະກິດ ຜະລິດຕະພັນລາວ ກ້າວສູ່ສາກົນ”.

ງານຄັ້ງນີ້ ມີຜູ້ປະກອບການໃນທົ່ວປະເທດເຂົ້າຮ່ວມລວມໝົດມີ 150 ບໍລິສັດ ຈາກ 17 ແຂວງ ແລະ ນະຄອນຫລວງວຽງຈັນ ແລະ ມີທັງໝົດ 201 ຫ້ອງວາງສະແດງ, ຜະລິດຕະພັນຕົ້ນຕໍທີ່ນໍາມາວາງສະແດງໃນຄັ້ງນີ້ ລວມມີຈາກຫລາຍຫລາຍຂະແໜງການເຊັ່ນ:

1. ຂະແໜງ ຜະລິດຕະພັນ ສິນຄ້າທີ່ຈົດກາໝາຍ Made in Laos

2. ຂະແໜງ ຜະລິດຕະພັນ ຫັດຖະກຳແຜນແຜ່, ຜ້າຝ້າຍ, ຜ້າໃໝ

3. ຂະແໜງ ຜະລິດຕະພັນ ເຟີນີເຈີ ແລະ ເຄື່ອງຕົບແຕ່ງພາຍໃນພາຍ

4. ຂະແໜງ ຜະລິດຕະພັນ ກະສີກຳ ( ເຂົ້າ, ຊາ, ກາເຟ )

5. ຂະແໜງ ຜະລິດຕະພັນ ອາຫານ ແລະ ເຄື່ອງດື່ມ

6. ຂະແໜງ ຜະລິດຕະພັນອຸດສາຫະກໍາໜັກ-ເບົາ

7. ຂະແໜງ ຜະລິດຕະພັນ ຂົນສົ່ງ, ທະນາຄານ, ຄຣີນິກ

8. ຂະແໜງ ຜະລິດຕະພັນລາວ ຫັດຖະກຳໄມ້ປ່ອງ

9. ຂະແຫນງ ຜະລິດຕະພັນ ໜືງເມື່ອງໜື່ງຜະລິດພັນ (ODOP)ຈາກຄອບຄົວຕົວແບບ 10. ຂະແໜງ ຜະລິດຕະພັນ ສິນຄ້າຂອງບັນປະເທດອາຊຽນ + ສປ ຈີນ.