6 ສັນຍານບົ່ງບອກວ່າທ່ານເຮັດວຽກໜັກເກີນໄປ
– ເວລາວ່າງກາຍເປັນເລື່ອງໄກໂຕ : ເຖິງວ່າທ່ານຕ້ອງວຸ້ນຢູ່ກັບວຽກຈົນເກືອບບໍ່ມີເວລາວ່າງ ແຕ່ທ່ານກໍບໍ່ຄວນເຮັດວຽກຈົນບໍ່ເຫລືອເວລາວ່າງໃຫ້ເຮັດຢ່າງອື່ນເລີຍ ຖ້າທ່ານຈື່ບໍ່ໄດ້ວ່າພົບກັບໝູ່ ຫລື ຄອບຄົວເທື່ອສຸດທ້າຍເມື່ອໃດ, ເບິ່ງຮູບເງົາເລື່ອງຫຍັງ, ໄປຍ່າງເລາະຫ້າງ ຫລື ເຮັດກິດຈະກຳທີ່ບໍ່ກ່ຽວກັບວຽກຕອນໃດ ນີ້ເປັນສັນຍານບົ່ງບອກວ່າຊີວິດທ່ານກຳລັງຖືກວຽກດູດກືນຢູ່.
– ແບກວຽກໜັກໄວ້ຄົນດຽວ : ຫາກທ່ານເປັນຄົນຮັກຄວາມສົມບູນແບບທີ່ມັກຈະກວດສອບລາຍລະອຽດທຸກຢ່າງ ແມ່ນແຕ່ວຽກຂອງຜູ້ອື່ນ ທ່ານບໍ່ຄວນເອົາວຽກທັງໝົດມາແບກຮບໄວ້ພຽງຄົນດຽວ ຕ້ອງຈື່ໄວ້ວ່າທ່ານບໍ່ໄດ້ມີພະລັງພິເສດທີ່ຈະເຮັດວຽກທັງໝົດຄົນດຽວ ແລະ ເຖິງວ່າທ່ານຈະເຮັດໄດ້ ນັ້ນກໍໍບໍ່ແມ່ນໜ້າທີ່ຂອງທ່ານທັງໝົດ ເພາະມັນເປັນໜ້າທີ່ຂອງພະນັກງານທີ່ທ່ານໄດ້ຈ້າງມາ.
– ຄວາມທະເຍີທະຍານໃນຊີວິດກ່ຽວຂ້ອງກັບວຽກໄປທັງໝົດ : ເຖິງວ່າການຝັນເຖິງເປົ້າໝາຍສູງສຸດໃນສາຍອາຊີບເປັນເລື່ອງໜ້າຍ້ອງຍໍໍກໍແມ່ນ ແຕ່ທ່ານບໍ່ຄວນລືມວ່າມັນບໍ່ແມ່ນຄວາມມຸ່ງຫວັງຢ່າງດຽວຂອງຊີວິດ ລອງສ້າງຄວາມດຸ່ນດ່ຽງໃຫ້ກັບເລື່ອງອື່ນໆນຳ ເຊັ່ນ : ຄອບຄົວ, ໝູ່, ກິດຈະກຳຍາມວ່າງ ຫລື ວຽກຊ່ວຍເຫລືອສັງຄົມ ເພາະອະນາຄົດບໍ່ຄວນມີໄວ້ມຸ່ງຫວັງພຽງແຕ່ເລື່ອງວຽກເທົ່ານັ້ນ ຫາກມີຄົນຖາມທ່ານເລື່ອງອະນາຄົດ ແລະ ຄຳຕອບເປັນເລື່ອງທີ່ກ່ຽວຂ້ອງກັບວຽກເທົ່ານັ້ນ ສິ່ງນີ້ບົ່ງບອກວ່າທ່ານກຳລັງໃຫ້ເວລາກັບວຽກຫລາຍຈົນເກີນໄປ.
– ຄິດແຕ່ເລື່ອງວຽກຕະຫລອດເວລາ : ເຮົາຍ້າຍຄົນອອກຫ່າງຈາກບ່ອນເຮັດວຽກໄດ້ ແຕ່ເປັນຫຍັງເຮົາຈຶ່ງຍ້າຍບ່ອນເຮັດວຽກອອກຫ່າງຈາກຄົນບໍ່ໄດ້ ? ການຫອບວຽກເມືອເຮັດຢູ່ເຮືອນກາຍເປັນສິ່ງທີ່ເຮັດໃຫ້ວຽກ ແລະ ຄົນບໍ່ຫ່າງອອກຈາກກັນເລີຍ ເພາະຫາກເວລາທີ່ຢູ່ເຮືອນທ່ານເມົາແຕ່ຄິດເຖິງເລື່ອງເຮັດລາຍງານໃຫ້ແລ້ວ ກຽມນຳສະເໜີກອງປະຊຸມ ຫລື ວາງແຜນໂຄງການທີ່ກຳລັງຈະມາເຖິງ ຮ່າງກາຍ ແລະ ຈິດໃຈຈະໝົກໝຸ້ນຢູ່ກັບການຄິດເລື່ອງວຽກຕະຫລອດເວລາ ນັ້ນເປັນສັນຍານວ່າທ່ານເຮັດວຽກເກີນຂອບເຂດໄປແລ້ວ.
– ເວົ້າແຕ່ເລື່ອງວຽກ : ການເວົ້າເລື່ອງວຽກເປັນບາງເທື່ອເປັນເລື່ອງທີ່ຮັບໄດ້ ແຕ່ຫາກເລື່ອງວຽກກາຍເປັນຫົວຂໍ້ດຽວທີ່ທ່ານ ເວົ້າເຖິງຕະຫລອດ ນັ້ນຈະເລີ່ມເປັນບັນຫາແລ້ວ ດັ່ງປະໂຫຍກທີ່ວ່າ : “ການເຮັດແຕ່ວຽກ ແລະ ບໍ່ຫລິ້ນມ່ວນຊື່ນເຮຮາເລີຍ ເຮັດໃຫ້ເປັນຄົນໜ້າເບື່ອ” ຫາກທ່ານລົມແຕ່ເລື່ອງວຽກກັບຄອບຄົວ ແລະ ໝູ່ເພື່ອນນັ້ນເປັນສັນຍານບົ່ງບອກຈະແຈ້ງວ່າທ່ານອຸທິດຕົນກັບເລື່ອງວຽກຫລາຍເກີນພໍດີແລ້ວ.
– ວຽກມີຜົນຕໍ່ຊີວິດທັງຊີວິດ : ເຖິງວ່າວຽກງານຈະເປັນພາກສ່ວນຫລັກໃນການປະກອບສ້າງໂຕຕົນຂອງທ່ານຂຶ້ນມາ ແຕ່ມັນບໍ່ຄວນເປັນສິ່ງດຽວທີ່ມານິຍາມຊີວິດທ່ານ ທ່ານບໍ່ຄວນຜູກຄວາມສົນໃຈໄວ້ແຕ່ກັບເລື່ອງວຽກພຽງຢ່າງດຽວ ລອງຫາກິດຈະກຳ ຫລື ເລື່ອງອື່ນທີ່ນອກເໜືອຈາກເລື່ອງວຽກໄວ້ເຮັດແດ່ ຫາກວຽກກາຍເປັນສິ່ງທີ່ທ່ານໃຊ້ຕັດສິນໃຈກັບທຸກເລື່ອງ ຫລື ເປັນໂຕກຳນົດທ່າທີຕໍ່ເຫດການທຸກຢ່າງ ຄົງເຖິງເວລາແລ້ວທີ່ທ່ານຕ້ອງກັບມາທົບທວນວ່າທ່ານຄວນອຸທິດໂຕເອງໃຫ້ກັບວຽກຫລາຍເກີນໄປຫລືບໍ່? ມີຫລາຍທ່ານທີ່ພົບວ່າວຽກກຳລັງກືນຊີວິດຕົນເອງໄປ ຫາກທ່ານກຳລັງຢູ່ໃນຈຸດນີ້ ທ່ານຄວນແບ່ງເບົາ ແລະ ຖ່າຍເທວຽກໃຫ້ຄົນອື່ນແດ່ ຫລື ຈ້າງຄົນມາຊ່ວຍ ແລ້ວທ່ານຈະພົບວ່າຊີວິດມີຄວາມສຸກ ແລະ ມີສຸຂະພາບດີຫລາຍຂຶ້ນເມື່ອໄດ້ໃຊ້ຊີວິດນອກເໜືອຈາກການເຮັດວຽກແດ່.
