ສປປ ລາວ ແລະ ຝຣັ່ງ ສືບຕໍ່ຮ່ວມມືດ້ານການຄ້າ-ການລົງທຶນ

ໂອກາດເຂົ້າຮ່ວມກອງປະຊຸມສຸດຍອດຝຣັງໂກໂຟນີ ຄັ້ງທີ 19 ທີ່ນະຄອນຫລວງປາຣີ ສ. ຝຣັ່ງ ໃນວັນທີ 4 ຕຸລາ 2024 ຜ່ານມາ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ພ້ອມຄະນະ ໄດ້ພົບປະສອງຝ່າຍ ກັບ ທ່ານ ເອັມມາ ນຸຍແອນ ມາຄຣົງ ປະທານາທິບໍດີ ແຫ່ງ ສາທາລະນະລັດ ຝຣັ່ງ ແລະ ຄະນະ.

ທ່ານ ປະທານາທິບໍດີ ເອັມມາ ນຸຍແອນ ມາຄຣົງ ໄດ້ສະແດງຄວາມຍິນດີຕ້ອນຮັບ ແລະ ຂອບໃຈ ຕໍ່ ທ່ານປະທານປະເທດ ແຫ່ງ ສປປ ລາວ ທີ່ໄດ້ຕອບຮັບການເຊື່ອເຊີນ ແລະ ນຳພາຄະນະ ເຂົ້າຮ່ວມກອງປະຊຸມສຸດຍອດ ຝຣັງໂກໂຟນີ ຄັ້ງທີ 19 ທີ່ນະຄອນຫລວງປາຣີ ຄັ້ງນີ້, ເຖິງວ່າ ສປປ ລາວ ຈະຢູ່ໃນໄລ ຍະກະກຽມກອງປະຊຸມສຸດຍອດອາຊຽນໃນເວລາອັນໃກ້ນີ້. ພ້ອມທັງຕີລາຄາສູງ ແລະ ຊົມເຊີຍການເປັນເຈົ້າພາບຈັດກອງປະຊຸມດັ່ງກ່າວ ຂອງ ສປປ ລາວ ແລະ ການສະໜັບສະໜູນ ການເຊື່ອມໂຍງ-ເຊື່ອມຈອດພາກພື້ນ ທີ່ ສປປ ລາວ ຖືເປັນບຸລິມະສິດ ໃນກອງປະຊຸມ.

ໂອກາດນີ້, ທ່ານປະທານປະເທດ ແຫ່ງ ສປປ ລາວ ໄດ້ສະແດງຄວາມຂອບໃຈ ຕໍ່ ທ່ານປະທານາທິ ບໍດີ ເອັມມາ ນຸຍແອນ ມາຄຣົງ ທີ່ໄດ້ເຊື້ອເຊີນຄະນະຜູ້ແທນລາວເຂົ້າຮ່ວມກອງປະຊຸມສຸດຍອດ ຝຣັງໂກໂຟນີ ຄັ້ງທີ 19 ທີ່ຝຣັ່ງ ເປັນເຈົ້າພາບ ແລະ ຊົມເຊີຍ ຝຣັ່ງ ໃນການເປັນເຈົ້າພາບຈັດກອງປະຊຸມສຸດຍອດ ຄັ້ງນີ້, ເຊິ່ງເປັນກອງປະຊຸມສໍາຄັນ ເພື່ອສົ່ງເສີມການພັດທະນາ ແລະ ການນໍາໃຊ້ ພາສາຝຣັ່ງ ໃນທົ່ວໂລກ. ພ້ອມນີ້, ທ່ານປະທານປະເທດ ຍັງໄດ້ແຈ້ງສະພາບການພັດທະນາເສດຖະກິດ-ສັງຄົມ ຢູ່ ສປປ ລາວ ໂດຍລວມສັງຄົມມີສະຖຽນລະພາບ, ມີຄວາມສະຫງົບ, ເສດຖະກິດມີການຂະຫຍາຍ ຕົວຢ່າງຕໍ່ເນື່ອງ ແລະ ການກະກຽມຈັດກອງປະຊຸມສຸດຍອດອາຊຽນ ຄັ້ງທີ 44-45 ທີ່ ສປປ ລາວ ເປັນເຈົ້າພາບ ໃນອັນໃກ້ນີ້.

ໃນການພົບປະສອງຝ່າຍຍັງໄດ້ຕີລາຄາສູງຕໍ່ການພົວພັນຮ່ວມມືກັນໃນໄລຍະຜ່ານມາ ແລະ ມີຄວາມປິຕິຍິນດີທີ່ເຫັນວ່າການພົວພັນຮ່ວມມື ລະຫວ່າງ ລາວ-ຝຣັ່ງ, ຝຣັ່ງ-ລາວ ໄດ້ຮັບການເສີມຂະຫຍາຍຢ່າງຕໍ່ເນື່ອງ ຕະຫລອດຫລາຍທົດສະວັດຜ່ານມາ, ສະແດງອອກສອງຝ່າຍ ໄດ້ມີການສະເຫລີມສະຫລອງ 70 ປີ ແຫ່ງການສ້າງ ຕັ້ງສາຍພົວພັນການທູດ ລາວ-ຝຣັ່ງ, ຝຣັ່ງ-ລາວ ໃນປີ 2023 ຜ່ານມາ. ການຮ່ວມມືດ້ານການເມືອງສືບຕໍ່ເປັນປົກກະຕິ, ຮັກສາການແລກປ່ຽນຢ້ຽມຢາມຂອງການນໍາຂັ້ນສູງ ກໍຄື ປະຊາຊົນຂອງສອງປະເທດ; ດ້ານເສດຖະກິດ, ສອງຝ່າຍໄດ້ຮ່ວມກັນຊຸກຍູ້ສົ່ງເສີມຢ່າງຕັ້ງໜ້າ ໂດຍສະເພາະ ການຮ່ວມມືດ້ານການຄ້າ ແລະ ການລົງທຶນ, ເຊິ່ງ ຝຣັ່ງ ເປັນປະເທດອັນດັບຕົ້ນໆໃນຂົງເຂດເອີຣົບ ທີ່ລົງທຶນຢູ່ ສປປ ລາວ ໂດຍມູນຄ່າການລົງທຶນ 558 ລ້ານໂດລາສະຫະລັດ ໃນ 227 ໂຄງການ.

ຂ່າວ: ຂ່າວສານປະເທດລາວ