ນາຍົກລັດຖະມົນຕີ ແຫ່ງອົດສະຕຣາລີ ຈະເດີນທາງມາ ຢ້ຽມຢາມ ສປປ ລາວ ເພື່ອເຂົ້າຮ່ວມກອງປະຊຸມສຸດຍອດອາຊຽນ-ອົດສະຕຣາລີ ແລະ ກອງປະຊຸມສຸດຍອດອາຊີຕາເວັນອອກ

ທ່ານ ແອນໂທນີ ອາບານີຊີ ນາຍົກລັດຖະມົນຕີ ແຫ່ງອົດສະຕຣາລີ ຈະເດີນທາງມານະຄອນຫລວງວຽງຈັນ, ສປປ ລາວ ໃນລະຫວ່າງວັນທີ 9 – 11 ຕຸລາ 2024 ເພື່ອເຂົ້າຮ່ວມກອງປະຊຸມສຸດຍອດອາຊຽນ-ອົດສະຕຣາລີ ຄັ້ງທີ 4 ແລະ ກອງປະຊຸມສຸດຍອດອາຊີຕາເວັນອອກ ຄັ້ງທີ 19.

ການຢ້ຽມຢາມຄັ້ງນີ້ ມີຄວາມສຳຄັນຫລາຍຕໍ່ການສະໜັບສະໜູນນະໂຍບາຍຂອງອົດສະຕຣາລີ ໃນພາກພື້ນດ້ານເພື່ອເສີມສ້າງຄວາມຈະເລີນຮຸ່ງເຮືອງ ແລະ ສະຖຽນລະພາບໃຫ້ນັບມື້ສູງຂື້ນ ໄປພ້ອມກັບຜົນສຳເລັດຂອງກອງປະຊຸມສຸດຍອດອາຊຽນ-ອົດສະຕຣາລີ ທີ່ໄດ້ຈັດຂື້ນທີ່ນະຄອນເມວເບີນ ໃນເດືອນມີນາ 2024 ຜ່ານມາ ເຊິ່ງໃນກອງປະຊຸມດັ່ງກ່າວ ບັນດາການນຳໄດ້ຮ່ວມກັນຢັ້ງຢືນຄຳໝັ້ນສັນຍາ ຮັບປະກັນການສ້າງສັນຕິພາບ ແລະ ຄວາມຢືນຍົງຂອງອະນາຄົດໃນພາກພື້ນ.

ການຮ່ວມມືທາງເລິກກັບພາກພື້ນອາຊີຕາເວັນອອກສ່ຽງໃຕ້ ແມ່ນ ບູລິມະສິດ ຂອງລັດຖະບານອົດສະຕຣາລີ ແລະ ສະຖຽນລະພາບຂອງພາກພື້ນ ແມ່ນສຳຄັນຫລາຍ ສຳລັບອະນາຄົດຂອງອົດສະຕຣາລີ.

ອາຊຽນແມ່ນຄູ່ຮ່ວມມືການຄ້າສອງຝ່າຍ ລຳດັບທີສອງ ຂອງອົດສະຕຣາລີ ການຄ້າທີ່ສະໜອງວຽກເຮັດງານທຳ 1 ໃນ 4 ໃຫ້ຄົນອົດສະຕຣາລີ, ເຊິ່ງວຽກສຳລັບຄົນເຄິ່ງລ້ານຢູ່ໃນອົດສະຕຣາລີ ແມ່ນຕິດພັນກັບການຄ້າຂອງພວກເຮົາກັບພາກພື້ນອາຊີຕາເວັນອອກສ່ຽງໃຕ້ ຄົນອົດສະຕຣາລີ ຫລາຍກວ່າໜຶ່ງລ້ານ ມີເຊື້ອສາຍມາຈາກອາຊີຕາເວັນອອກສ່ຽງໃຕ້, ເຊິ່ງສະທ້ອນໃຫ້ເຫັນເຖິງສາຍພົວພັນຂອງລະດັບບຸກຄົນໃນພາກພື້ນ.

ຢູ່ນະຄອນຫຼວງວຽງຈັນ, ທ່ານນາຍົກ ອາບານີຊີ ຈະພົບປະກັບບັນດາການນຳ ແລະ ນັກທຸລະກິດແຖວໜ້າ ເພື່ອປຶກສາຫາລືກ່ຽວກັບວຽກງານຕ່າງໆທີ່ຊຸກຍູ້ການຄ້າ ແລະ ການລົງທຶນສອງຝ່າຍ ຕາມທິດທາງ ການລົງທຶນເພື່ອການພັດທະນາ: ຍຸດທະສາດເສດຖະກິດ ຂອງອົດສະຕຣາລີໃນພາກພື້ນອາຊີຕາເວັນອອກສຽງໃຕ້ຮອດປີ 2040.

ນາຍົກລັດຖະມົນຕີແຫ່ງ ອົດສະຕຣາລີ ພະນະທ່ານ ແອນໂທນີ ອາບານີຊີ ໄດ້ກ່າວວ່າ:

“ຂ້າພະເຈົ້າຕັ້ງໜ້າສືບຕໍ່ເສີມສ້າງຜົນສຳເລັດ ຈາກກອງປະຊຸມສຸດຍອດອາຊຽນ-ອົດສະຕຣາລີໃນຕົ້ນປີນີ້ ແລະ ຂໍຂອບໃຈ ທ່ານ ນາຍົກລັດຖະມົນຕີແຫ່ງ ສປປ ລາວ ທ່ານ ສອນໄຊ ສີພັນດອນ ສຳລັບການເປັນເຈົ້າພາບຈັດບັນດາກອງປະຊຸມທີ່ສຳຄັນໆນີ້.

ພວກເຮົາໄດ້ໃຫ້ຄຳໝັ້ນສັນຍາກັນ ຈະເຮັດວຽກຮ່ວມກັບຄູ່ຮ່ວມມືຂອງພວກເຮົາ ເພື່ອສົ່ງເສີມສັນຕິພາບ ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ ໂດຍມີອາຊຽນເປັນສູນກາງ.

ນອກຈາກນັ້ນ ພວກເຮົາຈະສ້າງ ແລະ ສົ່ງເສີມກາລະໂອກາດດ້ານເສດຖະກິດໃນພາກພື້ນທີ່ມີຄວາມສຳຄັນນີ້ ຕາມຄຳໝັ້ນສັນຍາໃຫ້ເປັນຈິງ. ການຄ້າທີ່ໄດ້ສ້າງວຽກເຮັດງານທຳ ແລະ ຊ່ວຍສ້າງອານາຄົດຂອງພວກເຮົາ ຕາມວາລະໃນການສ້າງອະນາຄົດຂອງອົດສະຕຣາລີ.

ລັດຖະບານຂອງຂ້າພະເຈົ້າ ຈະສືບຕໍ່ເຮັດວຽກຢ່າງໃກ້ຊິດ ກັບຄູ່ຮ່ວມມືຂອງພວກເຮົາ ເພື່ອສ້າງກາລະໂອກາດໃຫ້ນັກທຸລະກິດຂອງອົດສະຕຣາລີ ແລະ ສ້າງວຽກເຮັດງານທຳໃຫ້ໄດ້ຫລາຍທີ່ສຸດໃນພາກພື້ນນີ້”