ຊີຣີປະນາມອິດສະລາແອນ ໂຈມຕີທາງອາກາດຢູ່ດາມັດກັດ ມີພົນລະເຮືອນເສຍຊີວິດ
ກອງທັບອິດສະລາແອນໂຈມຕີທາງອາກາດຢູ່ເມືອງຫລວງຂອງຊີຣີ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 9 ຄົນ ມີພົນລະເຮືອນລວມຢູ່ນໍາ.
ອົງການສັງເຫດການດ້ານສິດທິມະນຸດຊີຣີ (SOHR) ລາຍງານວ່າ: ກອງທັບອິດສະລາແອນປະຕິບັດການໂຈມຕີທາງອາກາດ ສ້າງຄວາມເສຍຫາຍຢ່າງໜັກໃຫ້ອາຄານຫລັງໜຶ່ງ ໃນເຂດເມສເຊ ຂອງນະຄອນຫລວງດາມັດກັດ ເຊິ່ງຂໍ້ມູນຂ່າວຂອງອິດສະລາແອນລະບຸວ່າ: ເປັນຖານປະຕິບັດການຂອງກຸ່ມແຮັດໂບລາ ແລະ ກອງກໍາລັງພິທັກປະຕິວັດອີຣານ (IRGC).
ທັງນີ້, SOHR ຢືນຢັນຜູ້ເສຍຊີວິດຈາກເຫດການດັ່ງກ່າວຢ່າງໜ້ອຍ 9 ຄົນ ໃນຈໍານວນນີ້ຢ່າງໜ້ອຍ 5 ຄົນເປັນພົນລະເຮືອນ ແລະ ຜູ້ເສຍຊີວິດຢ່າງໜ້ອຍ 2 ຄົນ ເປັນຊາວຕ່າງປະເທດ ເຊິ່ງແຫລ່ງຂ່າວໃນສະຖານເອກອັກຄະລັດຖະທູດອີຣານກ່າວວ່າ: ບໍ່ມີຜູ້ເສຍຊີວິດຄົນໃດຈາກເຫດການໂຈມຕີຄັ້ງນີ້ທີ່ເປັນຊາວອີຣານ.
ສ່ວນອິດສະລາແອນຍັງບໍ່ມີຄວາມເຫັນຢ່າງເປັນທາງການກ່ຽວກັບເຫດການທີ່ເກີດຂຶ້ນ. ຂະນະທີ່ກະຊວງການຕ່າງປະເທດຊີຣີອອກຖະແຫລງການປະນາມອິດສະລາແອນ ແລະ ຮຽກຮ້ອງປະຊາຄົມສາກົນຮ່ວມກັນຫາທາງຢຸດຢັ້ງອິດສະລາແອນຈາກການດຶງພາກພື້ນຕາເວັນອອກກາງຜະເຊີນການຜະເຊີນໜ້າ ແລະ ຈະມີຜົນກະທົບຮ້າຍແຮງ.
ໃນອາທິດຜ່ານມາ, SOHR ລາຍງານວ່າ: ກອງທັບອິດສະລາແອນໂຈມຕີທາງອາກາດຢູ່ເຂດເມສເຊ ຂອງນະຄອນຫລວງດາມັດກັດ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 4 ຄົນ ລວມທັງລູກເຂີຍຂອງທ່ານ ຮໍາຊັນ ນາສຣາລເລາະ ຜູ້ນໍາສູງສຸດຂອງກຸ່ມແຮັດໂບລາ ເຊິ່ງເສຍຊີວິດຈາກການໂຈມຕີທາງອາກາດຂອງອິດສະລາແອນ ໃນວັນທີ 27 ກັນຍາຜ່ານມາ.
