ອິດສະລາແອນເຕືອນລີບັງ ສ່ຽງເໝືອນກາຊາ ຖ້າຍັງເປັນຖານໃຫ້ກຸ່ມແຮັດໂບລາ
ຜູ້ນໍາອິດສະລາແອນກ່າວວ່າ: ລີບັງຢູ່ໃນຄວາມສ່ຽງຂອງການຖືກທໍາລາຍແບບດຽວກັບເຂດກາຊາ ຖ້າຍັງໃຫ້ກຸ່ມແຮັດໂບລາໃຊ້ເປັນຖານທີ່ໝັ້ນ.
ທໍານຽບນາຍົກລັດຖະມົນຕີອິດສະລາແອນເຜີຍແຜ່ວິດີໂອຂອງນາຍົກລັດຖະມົນຕີ ເບນຈາມິນ ເນທັນຢາຮູ ເຊິ່ງເປັນການຖະແຫລງໂດຍກົງເຖິງຊາວລີບັງວ່າ: ຍັງມີໂອກາດປົກປ້ອງບ້ານເມືອງເພື່ອບໍ່ໃຫ້ຕົກໄປໃນຂຸມນາຮົກຂອງສົງຄາມ ຫລື ການສູ້ຮົບທີ່ຍືດເຍື້ອ ເຊິ່ງນໍາໄປສູ່ການທໍາລາຍລ້າງ ແລະ ຄວາມເຈັບປວດແບບດຽວກັບກໍາລັງເກີດຂຶ້ນຢູ່ເຂດກາຊາ.
ທັງນີ້, ຜູ້ນໍາອິດສະລາແອນຮຽກຮ້ອງໃຫ້ຊາວລີບັງຮ່ວມກັນເຮັດໃຫ້ປະເທດຂອງຕົນເອງປາສະຈາກກຸ່ມແຮັດໂບລາ ເພື່ອເຮັດໃຫ້ສົງຄາມຄັ້ງນີ້ຢຸດລົງ.
ທ່ານ ນາຈິບ ມິກາຕີ ນາຍົກລັດຖະມົນຕີລີບັງ ຮຽກຮ້ອງປະຊາຄົມສາກົນ ຮ່ວມກັນກົດດັນອິດສະລາແອນໃຫ້ຢຸດປະຕິບັດການທາງທະຫານຢູ່ລີບັງ.
ຂະນະທີ່ທ່ານ ນາອິມ ກໍາເຊັມ ຮອງຜູ້ນໍາກຸ່ມແຮັດໂບລາ ກ່າວວ່າ: ສະມາຊິກທັງໝົດຂອງກຸ່ມແຮັດໂບລາສາມາດກ້າວຂ້າມຜ່ານລົມແຫ່ງຄວາມເຈັບປວດລູກໃຫຍ່ຈາກອິດສະລາແອນ ແລະ ຢືນຢັນວ່າ: ໂຄງສ້າງອໍານາດ ແລະ ປະຕິບັດການທັງໝົດຂອງກຸ່ມແຮັດໂບລາຍັງແຂງແຮງ. ພ້ອມທັງເຕືອນອິດສະລາແອນວ່າ: ຕາບໃດທີ່ຍັງບໍ່ຢຸດໂຈມຕີລີບັງ ການຍິງລູກສອນຈະຍັງດໍາເນີນຕໍ່ໄປ.
ໃນເວລາດຽວກັນ, ກຸ່ມແຮັດໂບລາຍິງລູກສອນໄຟປະມານ 100 ລູກ ໂຈມຕີເມືອງໄຮຟາ ເຊິ່ງເປັນເມືອງໃຫຍ່ອັນດັບສາມຂອງອິດສະລາແອນ ເຖິງວ່າລະບົບປ້ອງກັນສາມາດສະກັດກັ້ນລູກສອນໄຟໄວ້ໄດ້ເກືອບທັງໝົດ, ແຕ່ມີລາຍງານອາຄານບາງແຫ່ງໄດ້ຮັບຄວາມເສຍຫາຍ.
ສ່ວນກອງທັບອິດສະລາແອນອອກຖະແຫລງການວ່າ: ຂະຫຍາຍຂອບເຂດຂອງປະຕິບັດການທາງທະຫານຢ່າງຈໍາກັດໄປພາກຕາເວັນຕົກສຽງໃຕ້ຂອງລີບັງເປັນຄັ້ງທໍາອິດ.
ອີກດ້ານໜຶ່ງ, ທ່ານ ອັບບາສ ອາຣັກຊີ ລັດຖະມົນຕີວ່າການກະຊວງການຕ່າງປະເທດອີຣານ ກ່າວວ່າ: ຖ້າອິດສະລາແອນຕອບໂຕ້ການຍິງລູກສອນໄຟຂອງອີຣານ ໃນວັນທີ 1 ຕຸລາຜ່ານມາ ດ້ວຍການໂຈມຕີໂຄງລ່າງພື້ນຖານໃນອີຣານ ບໍ່ວ່າຈະກ່ຽວຂ້ອງກັບນິວເຄຼຍ ຫລື ນໍ້າມັນ ຈະເຮັດໃຫ້ສະຖານະການຍິ່ງທະວີຄວາມຮຸນແຮງ ແລະ ການຕອບສະໜອງຄັ້ງຕໍ່ໄປຂອງອີຣານຈະຍິ່ງໜັກໜ່ວງກວ່າເກົ່າ.
ເຖິງຢ່າງໃດກໍຕາມ, ອິດສະລາແອນຍັງບໍ່ມີທ່າທີກ່ຽວກັບເລື່ອງນີ້ ນັບແຕ່ການຍິງລູກສອນໄຟຄັ້ງດັ່ງກ່າວຂອງອີຣານ ເຊິ່ງເປັນຄັ້ງທີສອງຕໍ່ຈາກເດືອນເມສາຜ່ານມາ ໂດຍທ່ານ ເນທັນຢາຮູ ຢືນຢັນວ່າ: ອິດສະລາແອນມີຄວາມຖືກຕ້ອງທີ່ຈະຕອບໂຕ້ພາຍໃນໄລຍະເວລາທີ່ເໝາະສົມ, ສ່ວນປະທານາທິບໍດີ ໂຈ ໄບເດນ ຜູ້ນໍາອາເມລິກາ ເຕືອນວ່າ: ອິດສະລາແອນບໍ່ຄວນໂຈມຕີໂຄງລ່າງພື້ນຖານທີ່ກ່ຽວຂ້ອງກັບນໍ້າມັນ ແລະ ແກັສທໍາມະຊາດຂອງອີຣານ.
