ໂກຕ້າ 3.000 ຄົນ ໃຜຈະໄດ້ຫລາຍໄດ້ໜ້ອຍ

- 23131840 1969034016702861 9211895708273879134 n - ໂກຕ້າ 3.000 ຄົນ ໃຜຈະໄດ້ຫລາຍໄດ້ໜ້ອຍ
- AGL banner - ໂກຕ້າ 3.000 ຄົນ ໃຜຈະໄດ້ຫລາຍໄດ້ໜ້ອຍ

ໂດຍ: ກ້ອງສ່ອງ ອິດສະຫລະ

ສຳລັບ​ອາທິດ​ນີ້, ຜູ້​ຂຽນກໍ​ຍັງ​ກ້ຽວ​ກອດ​ວົນວຽນ​ຢູ່​ໃນ​ບັນຍາກາດ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 4 ຂອງ​ສະພາ​ແຫ່ງ​ຊາດ​ຊຸ​ດທີ 8. ອັນ​ສາ​ເຫດ​ກໍ​ຍ້ອນ​ວ່າ, ຜ່ານ​ກອງ​ປະຊຸມ​ຄັ້ງນີ້​ໄດ້​ມີ​ຫລາຍ​ເນື້ອ​ໃນ, ຫລາຍ​ບັນຫາ​ທີ່​ພົ້ນ​ເດັ່ນ ນັບ​ທັງ​ການ​ປະກອບ​ຄຳ​ຄິດ​ຄຳ​ເຫັນ ​ແລະ ຄຳ​ຊັກ​ຖາມ​ຂອງ​ບັນດາ​ຜູ້​ແທນ​ໃນ​ແຕ່ລະ​ເຂດ​ກໍ​ເຫັນ​ວ່າ​ມັນ​ເຂົ້າ​ແກັບ​ເຂົ້າ​ເກ​ຍ ​ແລະ ທັງ​ມີ​ເນື້ອຫາ​ສາລະ​ທີ່​ພົ້ນ​ເດັ່ນ ​ເຊິ່ງພວກ​ເຮົາ​ຈະ​ຕ້ອງ​ໄດ້​ຮັບ​ຮູ້ ​ແລະ ​ເຂົ້າ​ໃຈ​ຢ່າງ​ຖີ່​ຖ້ວນ​ເລິກ​ເຊິ່ງ ​ເພາະ​ມັນ​ພົວພັນ​ເຖິງ​ພາລະກິດ​ຂອງ​ພວກ​ເຮົາ​ໂດຍ​ທາງ​ກົງ ​ແລະ ທາງ​ອ້ອມ. ຕົວຢ່າງ​ບັນຫາ​ທີ່​ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ​ໄດ້​ຕອບ​ຄຳ​ຊັກ​ຖາມ​ສະມາຊິກ​ສະພາ​ແຫ່ງ​ຊາດ​ຊຸດ​ທີ 8 ຄັ້ງວັນ​ທີ 23 ຕຸລາ 2017 ​ໄດ້​ມີ​ຫລາຍ​ຂໍ້​ຫລາຍ​ເນື້ອ​ໃນ​ທີ່​ສຳຄັນ ​ເຊິ່ງໜຶ່ງ​ໃນ​ຫລາຍ​ບັນຫາ​ທີ່​ສຳຄັນ​ນັ້ນກໍ​ແມ່ນ​ໂກ​ຕ້າ​ລັດຖະກອນ​ໃໝ່​ໃນ​ປີ 2018 ຈຳນວນ 3.000 ຄົນ​ທີ່​ລັດຖະບານ​ໄດ້​ສະ​ເໜີ​ຕໍ່​ສະພາ ​ໂດຍ​ຈຳນວນ​ດັ່ງກ່າວ​ຈະ​ສຸມ​ໃສ່​ຈັດ​ແບ່ງ​ໃຫ້​ບັນດາ​ຂະ​ແໜງ​ການ ​ແລະ ທ້ອງ​ຖິ່ນ​ຄື​ແນວ​ໃດ ​ເພື່ອ​ຮັບປະກັນ​ໃຫ້​ວຽກ​ງານ​ມີ​ປະສິດທິ​ຜົນ.

ຕໍ່​ຄຳ​ສົນ​ໃຈ ​ແລະ ຊັກ​ຖາມ​ຂອງ​ບັນດາ​ຜູ້​ແທນ​ສະພາ, ທ່ານ​ນາຍົກ​ເຮົາ​ກໍ​ໄດ້​ຕອບ​ໂດຍ​ສັງ​ເຂ​ບ​ສັ້ນໆ​ວ່າ: ກ່ຽວ​ກັບ​ການຈັດ​ສັນ​ໂກ​ຕ້າ​ພະນັກງານ​ລະອຽດ​ແມ່ນ​ລັດຖະບານ​ມອບ​ໃຫ້​ກະຊວງ​ພາຍ​ໃນ​ຈັດ​ແບ່ງ​ລະອຽດ​ແລ້ວ​ລາຍ​ງານ​ໃຫ້​ສະພາ​ແຫ່ງ​ຊາດ​ຕື່ມ, ​ແຕ່​ຕາມ​ທິດ​ຂອງ​ລັດຖະບານ​ແມ່ນ​ຈະ​ໃຫ້​ບູລິ​ມະ​ສິດ​ແກ່​ຂະ​ແໜງ​ການ​ສຶກສາ (ຄູ​ສອນ), ຂະ​ແໜງ​ສາທາລະນະ​ສຸກ (​ແພດ) ​ແລະ ວິຊາ​ການ​ດ້ານ​ເຕັກນິກ​ຂອງ​ຂະ​ແໜງ​ກະສິກຳ​ຢູ່​ໃນ​ເຂດ​ຊົນນະບົດ ​ແລະ ​ເຂດ​ຫ່າງ​ໄກ​ສອກຫລີກ. ​ເມື່ອ​ໄດ້​ເຫັນ ​ແລະ ຮັບ​ຮູ້​ກ່ຽວ​ກັບ​ທິດ​ຊີ້​ນຳ ​ແລະ ການ​ໃຫ້​ບູລິ​ມະ​ສິດ​ຂອງ​ລັດຖະບານ​ແລ້ວ, ຜູ້​ຈັດຕັ້ງປະຕິບັດ​ໃນ​ຂັ້ນຕໍ່​ໄປ ກໍ​ຄື​ຜູ້​ທີ່​ມີໜ້າ​ທີ​່ກ່ຽວຂ້ອງ. ​ໃນ​ຄວາມ​ເປັນ​ຈິງ​ແລ້ວ ການ​ໃຫ້​ໂກ​ຕ້າ​ຮັບ​ເອົາ​ພະນັກງານ-ລັດຖະກອນ​ໃໝ່​ໃນ​ແຕ່ລະ​ປີ ລັດຖະບານ​ກໍ​ມີ​ແຜນ​ຮັບ​ຢູ່​ທຸກ​ປີ, ​ແຕ່​ຜ່ານ​ການຈັດຕັ້ງປະຕິບັດ ​ແລະ ​ໄດ້​ຕົວ​ເລກ​ໄປ​​ແລ້ວ ​ເຫັນ​ວ່າ​ຂະ​ແໜງ​ການ​ທີ່​ກ່ຽວຂ້ອງ​ສ່ວນ​ໜຶ່ງ​ຍັງ​ບໍ່​ທັນ​ປະຕິບັດ​ຕາມ​ຫລັກການ​ຂອງ​ກົດໝາຍ ​ແລະ ການ​ຊີ້​ນຳ​ຢ່າງ​ເຄັ່ງ​ຂັດ ​ແລະ ​ເດັດຂາດ, ຍັງ​ມີ​ສະພາບ​ເຫັນ​ແກ່​ຄົນ​ເພິ່ນ​ຄົນ​ໂຕ, ພະນັກງານ​ແກນ​ນຳ​ຈຳນວນ​ໜຶ່ງ​ສວຍ​ໂອກາດ​ຮັບ​ເອົາ​ຄົນ​ທີ່​ບໍ່​ຄົບ​ຕາມ​ເງື່ອນ​ໄຂ, ບໍ່​ໄດ້​ມາດຕະຖານ​ຂອງ​ງານ ​ແລະ ທັງ​ບໍ່​ຖືກ​ເປົ້າ.

- Wave100S AD to Website 2020 0 - ໂກຕ້າ 3.000 ຄົນ ໃຜຈະໄດ້ຫລາຍໄດ້ໜ້ອຍ

​ໃນ​ສະພາບ​ສັງຄົມ​ບ້ານ​ເຮົາ​ປັດຈຸບັນ​ນີ້ ບໍ່​ວ່າ​ຢູ່​ຂະ​ແໜງ​ການ​ໃດ​ກໍ​ເກີດ​ມີ​ພະນັກງານ​ອາສາ​ສະໝັກ ຍ້ອນ​ເຫັນ​ວ່າ​ໃນ​ກົມ​ກອງ ​ແລະ ຂະ​ແໜງ​ການ​ຂອງ​ຕົນ​ຂາດ​ພະນັກງານ​ທີ່​ຈຳ​ເປັນ​ເຊັ່ນ​ວ່າ: ມີ​ພະນັກງານ​ຂັ້ນນຳ​ແລ້ວ​ພັດ​ຍັງ​ຂາດ​ພະນັກງານ​ວິຊາການ, ​ໄດ້​ຫົວໜ້າ​ແລ້ວ​ພັດ​ຍັງ​ລູກ​ນ້ອງ, ຍັງ​ຜູ້​ຮູ້​ພາສາ​ຝຣັ່ງ-ອັງກິດ​, ຍັງ​ຜູ້​ຮູ້​ໄອ​ທີ, ຍັງ​ຜູ້​ຂັບ​ລົດ​ໃຫ້, ຍັງ​ຜູ້​ຮັບ​ເອົາ​ເອກະສານ​ໄປ​ໃຫ້​ຫົວໜ້າ​ເຊັນ, ຫລາຍ​ຜູ້​ຫລາຍ​ຄົນ​ມັນ​ກໍ​ເລີຍ​ເປັນ​ການຈັດຕັ້ງທີ່​ບໍ່​ກະທັດ​ລັດ​ຮັດກຸມ​ເທົ່າ​ທີ່​ຄວນ. ບັນຫາ​ການ​ສ້າງ​ພະນັກງານ​ໃນ​ຫລາຍ​ປີຜ່ານມາ ພວກ​ເຮົາ​ຍັງ​ບໍ່​ທັນ​ເຮັດ​ໄດ້​ຢ່າງຮອບດ້ານ ​ເປັນຕົ້ນສ້າງ​ຄົນ ຫລື ສ້າງ​ພະນັກງານ​ວິຊາ​ການ​ຕ້ອງ​ໃຫ້​ເຮັດ​ໄດ້​ຫລາຍ​ວຽກ​ເຊັ່ນ: ພາສາ​ຝຣັ່ງ-ອັງກິດ​ກໍ​ຢູ່​ຫັ້ນ, ຂັບ​ລົດ​ກໍ​ຢູ່​ຫັ້ນ, ພະນັກງານ​ວິຊາ​ການ-ວິຊາ​ສະ​ເພາະ​ກໍ​ຢູ່​ຫັ້ນ ​ແລ້ວ​ຜົນ​ໄດ້​ຮັບ​ກໍ​ຄື​ປະສິດທິພາບ, ປະສິດທິ​ຜົນ​ຂອງ​ງານ​ມັນ​ຄົບ​ເຄື່ອງ​ໄດ້​ມາດຕະຖານ, ຄວາມສິ້ນ​ເປືອງ​ໃນ​ການ​ໃຊ້​ຈ່າຍ​ບໍລິຫານ​ມັນ​ກໍ​ປະຢັດ. ​ໃນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 4 ຂອງ​ສະພາ​ແຫ່ງ​ຊາດ​ຊຸດ​ທີ 8 ທາງ​ຜູ້​ແທນ​ສະພາ​ຫລາຍ​ທ່ານ​ກໍ​ໄດ້​ຍົກ​ເລື່ອງ​ຄູ​ອາສາ​ສະໝັກ​ທີ່​ເຮັດ​ໜ້າ​ທີ່​ສິດສອນ​ມາ​ຫລາຍ​ຟ້າ​ຫລາຍ​ປີ, ບາງ​ຄົນ​ກໍ​ຜູ້​ລະ​ສີ່​ຫ້າ​ປີ ​ໂດຍ​ສະ​ເພາະ​ແມ່ນ​ຄູ​ອາສາ​ທີ່​ສິດສອນ​ຢູ່​ເຂດ​ຊົນນະບົດ​ຫ່າງ​ໄກ​ສອກຫລີກ ​ເຫັນ​ວ່າ​ມີ​ຄວາມ​ຈຳ​ເປັນ​ແທ້, ສ່ວນວ່າ​ຈະ​ຫລາຍ ຫລື ໜ້ອຍ​ຊໍ່າ​ໃດ​ນັ້ນກໍ​ເປັນ​ເລື່ອງ​ຂອງ​ຄວາມ​ຮຽກຮ້ອງ​ຕ້ອງການ​ ​ແລະ ​ເງື່ອນ​ໄຂ​ໃນ​ຂະ​ແໜງ​ການ​ທີ່​ກ່ຽວຂ້ອງ, ​ແຕ່​ກໍ​ເຊື່ອ​ໝັ້ນວ່າ​ຕົວ​ເລກ​ຄູ​ອາສາ​ໃນ​ປີ​ຕໍ່​ໄປ​ຈະ​ໄດ້​ຖືກ​ຮັບ​ເອົາ​ເຂົ້າ​ເປັນ​ລັດຖະກອນ​ຕາມ​ຂັ້ນຕອນ​ທີ່​ໂປ່​ງ​ໃສ ​ແລະ ຫລາຍ​ກວ່າ​ປີ​ທີ່​ຜ່ານ​ໆ​ມາ​ແນ່ນອນ.

- WhatsApp Image 2020 05 27 at 5 - ໂກຕ້າ 3.000 ຄົນ ໃຜຈະໄດ້ຫລາຍໄດ້ໜ້ອຍ
- WhatsApp Image 2020 05 27 at 5 - ໂກຕ້າ 3.000 ຄົນ ໃຜຈະໄດ້ຫລາຍໄດ້ໜ້ອຍ
- WhatsApp Image 2020 05 27 at 5 - ໂກຕ້າ 3.000 ຄົນ ໃຜຈະໄດ້ຫລາຍໄດ້ໜ້ອຍ
- WhatsApp Image 2020 05 27 at 5 - ໂກຕ້າ 3.000 ຄົນ ໃຜຈະໄດ້ຫລາຍໄດ້ໜ້ອຍ
error: Alert: Content is protected !!