ນາຍົກລັດຖະມົນຕີ ທອງລຸນ ສີສຸລິດ ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 31 ແລະ ກອງປະຊຸມສຸດ​ຍອດ​ກ່ຽວຂ້ອງ​ອື່ນໆທີ່ຟີລິບປິນ

- advert banner 728 90 728x90 - ນາຍົກລັດຖະມົນຕີ ທອງລຸນ ສີສຸລິດ ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 31 ແລະ ກອງປະຊຸມສຸດ​ຍອດ​ກ່ຽວຂ້ອງ​ອື່ນໆທີ່ຟີລິບປິນ

ຕອນເຊົ້າວັນທີ 13 ພະຈິກນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມຄະນະ, ໄດ້ເຂົ້າຮ່ວມພິທີເປີດກອງປະຊຸມສຸດຍອດອາຊຽນຄັ້ງທີ 31 ພາຍໃຕ້ຄໍາຂວັນ: “ຮ່ວມມືເພື່ອການປ່ຽນແປງ, ຜູກພັນກັບສາກົນ” ໂດຍການເປັນເຈົ້າພາບ ແລະ ປະທານຂອງຟີລິບປິນ, ຊຶ່ງມີບັນດາປະມຸກລັດ, ຫົວໜ້າລັດຖະບານປະເທດອາຊຽນ, ລັດຖະມົນຕີຕ່າງປະເທດອາຊຽນ ແລະ ແຂກຖືກເຊີນເຂົ້າຮ່ວມ.

- new3 - ນາຍົກລັດຖະມົນຕີ ທອງລຸນ ສີສຸລິດ ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 31 ແລະ ກອງປະຊຸມສຸດ​ຍອດ​ກ່ຽວຂ້ອງ​ອື່ນໆທີ່ຟີລິບປິນ

ພາຍຫລັງພິທີເປີດກອງປະຊຸມສຸດຍອດອາຊຽນຄັ້ງທີ 31, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ສືບຕໍ່ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 31 ແບບຄົບຄະນະ, ເຊິ່ງ​ຜູ້ນຳ​ອາ​ຊຽນໄດ້ປຶກສາຫາລື ແລະ ທົບທວນຄືນກ່ຽວກັບການຈັດ​ຕັ້ງ​ປະຕິບັດວິໄສທັດປະຊາຄົມອາຊຽນ 2025 ກໍຄືບັນດາ​​ແຜນ​ແມ່​ບົດ​ສໍາລັບ​ສາມ​ເສົາ​ຄ້ຳ​ປະຊາ​ຄົມ​ອາ​ຊຽນ ແລະ ທິດທາງໃນຕໍ່ໜ້າ ເພື່ອຮັດແໜ້ນປະຊາຄົມອາຊຽນ, ໂດຍໄດ້ຊຸກຍູ້ໃຫ້ທຸກຂະແໜງການອາຊຽນສືບຕໍ່ຈັດຕັ້ງປະຕິບັດບັນດາແຜນແມ່ບົດ ແລະ ແຜນວຽກຂອງຕົນໃຫ້ສໍາເລັດ ແລະ ມີປະສິດທິພາບ ເພື່ອປະກອບສ່ວນເຂົ້າໃນການຈັດຕັ້ງປະຕິບັດວິໄສທັດປະຊາຄົມອາຊຽນ 2025.

ໃນໂອກາດຂຶ້ນກ່າວຄໍາເຫັນໃນກອງປະຊຸມຄັ້ງນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ຢໍ້າເຖິງຜົນສຳ​ເລັດ​ຂອງ​ອາ​ຊຽນ​ໃນ​ໄລຍະ 50 ປີຜ່າ​ນມາ,  ການ​ຮັດ​ແໜ້ນຄວາມ​ເປັນ​ແກນ​ກາງຂອງ​ອາ​ຊຽນ ​ແລະ ການ​ສົ່ງ​ເສີມ​ການ​ເຂົ້າ​ເຖິງ​ແຫລ່ງທຶນ​ຂອງ​ຈຸນ​ລະທຸ​ລະ​ກິດ, ທຸ​ລະ​ກິດ​ຂະໜາດ​ນ້ອຍ ​ແລະ ກາງ ​ແລະ ການຮັດແຄບຄວາມແຕກໂຕນດ້ານການພັດທະນາ ແລະ ການເຊື່ອມຈອດອາຊຽນ, ໂດຍຜ່ານການຈັດຕັ້ງປະຕິບັດແຜນວຽກຂໍ້ລິເລີ່ມເພື່ອການເຊື່ອມໂຍງອາຊຽນສະບັບທີ 3 ແລະ ຈັດຕັ້ງແຜນແມ່ບົດເພື່ອການເຊື່ອມຈອດອາຊຽນ 2025. ນອກ​ນີ້, ກອງ​ປະຊຸມຍັງໄດ້ແລກປ່ຽນຄໍາຄິດຄໍາເຫັນກ່ຽວກັບການຮ່ວມມືອາຊຽນກັບພາຍນອກ ແລະ ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເປັນຕົ້ນ: ສະພາບ​ການຢູ່ຕາເວັນອອກກາງ, ແຫລມເກົາຫລີ, ການກໍ່ການຮ້າຍ, ວິກິດການຊາວອົບພະຍົບ, ທະເລຈີນໃຕ້ ແລະອື່ນໆ. ກອງປະຊຸມໄດ້ແຕ່ງຕັ້ງທ່ານ ດາໂຕ ປາດຸກາ ລິມ ຈອກ ຮອຍ ຈາກ ບຣູ​ໄນ ດາຣູສະ​ລາມ ເປັນ​ເລຂາທິການ​ໃຫຍ່ອາ​ຊຽນຄົນ​ຕໍ່​ໄປສຳລັບປີ 2018-2022.

ໃນ​ຕອນ​ບ່າຍ​ຂອງ​ວັນດຽວກັນ, ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ກໍໄດ້​ນຳພາ​ຄະນະ​ຜູ້​ແທນ​ລາວ​ເຂົ້າຮ່ວມ​​ກອງ​ປະຊຸມ​ສຸດ​ຍອດຕ່າງໆລະຫວ່າງ​ອາຊຽນກັບບັນດາຄູ່​ເຈລະ​ຈາ​ ເຊັ່ນ: ກອງປະຊຸມສຸດຍອດອາຊຽນ-ຈີນຄັ້ງທີ 20, ກອງປະຊຸມສຸດຍອດສະເຫລີມສະຫລອງການພົວພັນອາຊຽນ-ສະຫະລັດຄົບຮອບ 40 ປີ, ກອງປະຊຸມສຸດຍອດອາຊຽນ-ສ.ເກົາຫລີຄັ້ງທີ 19, ກອງປະຊຸມສຸດຍອດອາຊຽນ-ຍີ່ປຸ່ນຄັ້ງທີ 20 ​ແລະ ກອງປະຊຸມສຸດຍອດອາຊຽນ-ສະຫະປະຊາຊາດຄັ້ງທີ 9.

ກອງ​ປະຊຸມ​ສຸດ​ຍອດ​ອາຊຽນ-ຈີນຄັ້ງທີ 20 ໄດ້ເຫັນ​ດີ​​ໃຫ້​ເພີ່ມ​ທະວີ​​ການຮ່ວມ​ມື​​ໃນ​ດ້ານ​ຕ່າງໆ ​ເພື່ອ​ຮັດ​ແໜ້ນການ​ພົວພັນ​ອາຊຽນ-ຈີນ​ໃຫ້​ນັບ​ມື້ຂະຫຍາຍຕົວ​ຍິ່ງ​ຂຶ້ນ ເປັນຕົ້ນ: ການ​ຈັດຕັ້ງຜັນ​ຂະຫຍາຍ​ສັນຍາການ​ຄ້າ​ເສລີອາຊຽນ-ຈີນ ຢ່າງ​ເຕັມ​ສ່ວນ,​ ​​ແນ​ໃສ່​ປະກອບສ່ວນ​ເຮັດ​ໃຫ້​ບັນລຸ​​ເປົ້າໝາຍການ​ຄ້າອາຊຽນ-ຈີນ ມູນ​ຄ່າ 1.000 ຕື້​ໂດ​ລາ​ສະຫະລັດໃນ​ປີ 2020, ​ເສີມ​ຂະຫຍາຍ​ການ​ຮ່ວມ​ມື​ດ້ານ​ການ​ເຊື່ອມ​ຈອດ​ໂດຍ​ການ​ເຊື່ອມ​ສານລະຫວ່າງ​ຂໍ້​ລິ​ເລີ່​ມໜຶ່ງ​ແລວໜຶ່ງ​ເສັ້ນທາງຂອງ ສປຈີນ ​ແລະ ​ແຜນ​ແມ່​ບົດ​ວ່າ​ດ້ວຍ​ການ​ເຊື່ອມ​ຈອດ 2025, ​ສົ່ງ​ເສີມ​ການທ່ອງ​ທ່ຽວ ​ແລະ ການ​ໄປມາຫາສູ່ລະຫວ່າງ​ປະຊາຊົນ​​. ບັນດາ​ຜູ້ນຳ​ອາຊຽນ-ຈີນ ໄດ້​ຕົກ​ລົງຫລາຍ​ບັນ​ຫາ​ສຳ​ຄັນ​ຄື: (1) ​ກຳ​ນົດ​ເອົາ​ຂົງ​ເຂດ​ນະ​ວັດ​ຕະ​ກຳເປັນ​ຫົວ​ຂໍ້​ຈຸດ​ສຸມ​ການ​ຮ່ວມ​ມື​ອາ​ຊຽນ-ຈີນໃນ​ປີ 2018. (2) ​ເຫັນ​ດີ​ຮ່າງວິໄສທັດການເປັນຄູ່ຮ່ວມຍຸດທະສາດອາ​ຊຽນ-ຈີນຮອດ​ປີ 2030 ​ແລະ (3) ປະກາດ​ເລີ່​ມການ​ປຶກສາ​ຫາລືກ່ຽວກັບ​ກົດ​ແຫ່ງ​ການ​ປະ​ພຶດ​ຂອງ​ບັນ​ດາ​ຝ່າຍ​ໃນ​ທະ​ເລ​ຈີນ​ໃຕ້ຢ່າງ​ເປັນ​ທາງ​ການ. ນອກ​ນັ້ນ, ກໍໄດ້ຕົກ​ລົງ​ຮັບຮອງ​ເອົາຫລາຍ​ເອກະສານ​​ເຊັ່ນ: (1) ຖະ​ແຫຼງ​ການ​ຮ່ວມອາຊຽນ-ຈີນວ່າດ້ວຍ​ການ​ຮ່ວມ​ມື​ດ້ານ​ການ​ທ່ອງ​ທ່ຽວ ​ແລະ (2) ຖະແຫລງການຮ່ວມອາຊຽນ-ຈີນວ່າດ້ວຍການຮັດແໜ້ນການຮ່ວມມືດ້ານການຕ້ານການສໍ້ລາດບັງຫລວງແບບຮອບດ້ານ.

​ໃນກອງປະຊຸມສຸດຍອດສະເຫລີມສະຫລອງການ​ພົວພັນອາຊຽນ-ສະຫະລັດ ຄົບຮອບ 40 ປີ, ຜູ້​ນຳອາ​ຊຽນ​ ​ແລະ ​ສ​ະ​ຫະ​ລັດ​ ໄດ້​ຢືນ​ຢັນຄືນຄວາ​ມໝາຍໝັ້ນທີ່​ຈະ​ສືບ​ຕໍ່​ຮັດ​ແໜ້ນ​ການ​ຮ່ວມ​ມື​ໃນ​ຂົງ​ເຂດ​ຕ່າງໆ​ທີ່​ມີ​ຜົນ​ປະ​ໂຫຍດ​ຮ່ວມ​ກັນ​ ເປັນ​ຕົ້ນ: ​ດ້ານ​ຄວາມ​ໝັ້ນ​ຄົງ, ການ​ຄ້າ, ​ການ​ສຶກ​ສາ, ການ​ແລກ​ປ່ຽນ​ຊາວ​ໜຸ່ມ ແລະ ອື່ນໆ. ອາ​ຊຽນໄດ້​ສະ​ແດງ​ຄວາມ​ຍິນ​ດີ​ທີ່​ເຫັນ​ວ່າສະ​ຫະ​ລັດພາຍ​ໃຕ້​ລັດ​ຖະ​ບານ​ໃໝ່ ຍັງ​ສືບ​ຕໍ່​ໃຫ້​ຄວາມ​ສຳ​ຄັນ​ຕໍ່​ການ​ພົວ​ພັນ​ອາ​ຊຽນ-ສະ​ຫະ​ລັດ ແລະ ຖື​ອາ​ຊຽນ​ເປັນ​ບູ​ລິ​ມະ​ສິດ​ໃນ​ນະ​ໂຍ​ບາຍ​ການ​ຕ່າງ​ປະ​ເທດ​ຂອງ​ຕົນ. ໃນ​​ໂອກາດ​ນີ້, ຜູ້ນຳ​ອາຊຽນ ​ແລະ ສະຫະລັດ ກໍ​ໄດ້​ຮັບ​ຮອງ​ເອົາຖະ​ແຫລງ​ການຮ່ວມວ່າດ້ວຍ ກອງ​ປະຊຸມ​ສຸດ​ຍອດ​ສະເຫລີມສະຫລອງການ​ພົວພັນ​ອາຊຽນ-ສະຫະລັດຄົບຮອບ 40 ປີ.

​ ກອງ​ປະ​ຊຸມ​ສຸດຍອດອາ​ຊຽນ-ສ​.ເກົ​າຫລີຄັ້ງທີ 19 ​ໄດ້​ສະ​ແດງຄວາມຍິນດີຕໍ່ຄວາມ​ຄືບ​ໜ້າ​ຂອງ​ການ​ຮ່ວມ​ມືອາ​ຊຽນ-ສ.ເກົາຫລີ ໃນ​ໄລ​ຍະ 1 ປີຜ່ານ​ມາ, ລວມ​ທັງ​ການ​ຈັດ​ຕັ້ງ​ປະ​ຕິ​ບັດ​ປີ​ແລກ​ປ່ຽນ​ວັດ​ທະ​ນະ​ທຳ​ອາ​ຊຽນ-ສ.ເກົາຫລີ ໃນ​ປີ 2017 ​ແລະ ການສ້າງຕັ້ງສູນວັດທະນະທໍາອາຊຽນຢູ່ແຂວງປູຊານ ສ​.ເກົາຫລີ, ຊຶ່ງໄດ້ເປີດໂຕຢ່າງເປັນທາງການໃນເດືອນກັນຍາ 2017 ຜ່ານມານີ້, ແນໃສ່ສົ່ງເສີມການ​ແລກ​ປ່ຽນ​ດ້ານ​ວັດ​ທະ​ນະ​ທຳ, ຍົກ​ສູງ​ຄວາມ​ຮັບ​ຮູ້ ແລະ ຄວາມ​ອົກ​ເຂົ້າ​ໃຈ ແລະ ການໄປມາຫາສູ່ກັນລະຫວ່າງປະຊາຊົນຂອງສອງພາກພື້ນໃຫ້ນັບມື້ນັບຫລາຍຂຶ້ນ. ບັນດາ​ຜູ້ນຳ​ຍັງ​ໄດ້ຕີ​ລາຄາ​ສູງ​ຕໍ່ການ​ຮ່ວມ​ມື​ດ້ານການ​ຄ້າ ​ແລະ ການ​ລົງທຶນລະຫວ່າງ​ອາຊຽນ ​ແລະ ສ.​ເກົາຫລີ ​ແລະ ໄດ້ຢໍ້າ​ເຖິງ​ຄວາມ​ສຳຄັນ​ໃນ​ການ​ຮ່ວມ​ມືລະຫວ່າງ​ພາກ​ທຸລະ​ກິດ​, ໂດຍ​ສະ​ເພາະ​ແມ່ນ​ຈຸນ​ລະວິ​ສາ​ຫະກິດ ​ແລະ ວິ​ສາ​ຫະກິດຂະໜາດນ້ອຍ ​ແລະ ກາງ, ລວມທັງ​ການສ້າງ​ຂີດ​ຄວາມ​ສາມາດ​​​ໃຫ້​​ແກ່ພາກທຸລະກິດ​ຂອງອາຊຽນ, ການ​ຮ່ວມ​ມື​ເພື່ອຮັດແຄບຄວາມແຕກໂຕນດ້ານການພັດທະນາ, ການ​ເຊື່ອມ​ຈອດ ​ແລະ ອື່ນໆ​.

​ໃນກອງ​ປະ​ຊຸມສຸດຍອດ​ອາ​ຊຽນ-ຍີ່​ປຸ່ນຄັ້ງທີ 20, ບັນດາ​ຜູ້ນຳ​ອາຊຽນ ​ແລະ ຍີ່ປຸ່ນ ໄດ້ຢໍ້າຄືນ​ຄວາມໝາຍໝັ້ນທີ່​ຈະ​ເພີ່ມ​ທະວີ​ການ​ຮ່ວມ​ມື​ໃນ​ດ້ານ​ການ​ເຊື່ອມ​ຈອດ, ການ​ຮັດ​ແຄບ​ຄວາມ​ແຕກ​ໂຕນ​ດ້ານ​ການ​ພັດທະນາ, ການ​ສ້າງ​ຂີດ​ຄວາມ​ສາມາດ ​ແລະ ພັດທະນາ​ຊັບພະຍາກອນ​ມະນຸດ, ການ​ແລກປ່ຽນຊາວໜຸ່ມ, ວຽກງານ​ສາທາລະນະ​ສຸກ, ການບັນ​ເທົາ​ທຸກ​ໄພພິບັດ ​ແລະ ອື່ນໆ. ກອງ​ປະຊຸມຍັງ​ໄດ້​ສະ​ແດງ​ຄວາມ​ຍິນ​ດີ​ຕໍ່​ຂໍ້​ລິ​ເລີ່​ມຂອງ​ຍີ່ປຸ່ນ​ທີ່​ຈະ​ເພີ່ມ​ທະວີ​ການ​ຮ່ວມ​ມື​ກັບ​ອາຊຽນ​ໃນ​ດ້ານ​ການພັດທະນາ​ພື້ນຖານ​ໂຄງ​ລ່າງທີ່​ມີ​ຄຸນ​ນະພາ​ບ, ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ແມ່ຍິງ, ດ້ານ​ສິ່ງ​ແວດ​ລ້ອມ, ວຽກງານ​ສາທາລະນະ​ສຸກ, ການ​ພັດທະນາ​ວິ​ສາ​ຫະກິດ​ຂະໜາດນ້ອຍ ​ແລະ ກາງ ​ແລະ ຂົງ​ເຂດ​ອື່ນໆ. ​

ກອງ​ປະຊຸມ​ສຸດ​ຍອດ​ອາ​ຊຽນ-ສະຫະປະຊາ​ຊາດ (ສປຊ) ຄັ້ງ​ທີ 9 ໄດ້ສະແດງຄວາມໝາຍໝັ້ນໃນການສືບຕໍ່ຮັດແໜ້ນການຮ່ວມມືລະຫວ່າງອາຊຽນ-ສປຊ, ແນໃສ່ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາພາກພື້ນ ແລະ ໃນໂລກ. ກອງ​ປະຊຸມ​ໄດ້​ເຫັນ​ດີໃຫ້​ເພີ່ມ​ທະວີການປະສານງານລະຫວ່າງສອງກອງ​ເລຂາຢ່າງໃກ້ຊິດ ແລະ ເປັນລະບົບຂຶ້ນຕື່ມ ເພື່ອຮັບປະກັນ​ໃຫ້ການຈັດຕັ້ງຜັນຂະຫຍາຍວິໄສທັດປະຊາຄົມອາຊຽນ 2025 ແລະ ວາລະ 2030 ເພື່ອການພັດທະນາແບບຍືນຍົງມີຄວາມກົມກຽວກັນ ​ແລະ ​ສົ່ງ​ເສີມ​ໃຫ້​ແກ່​ກັນ ​ແລະ ກັນ. ພ້ອນນັ້ນ, ກອງປະຊຸມຍັງໄດ້ແລກປ່ຽນຄວາມ​ຄິດ​ເຫັນ​ຕໍ່ບັນດາເຫດການທີ່ກໍາລັງເກີດຂຶ້ນໃນພາກພຶ້ນ ແລະ ໃນໂລກທີ່​ມີ​ຄວາມ​ສົນ​ໃຈ ​ແລະ ​ເປັນ​ຫ່ວງ​ຮ່ວມ​ກັນ.

​ ນອກນັ້ນ, ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ຍັງ​ໄດ້​ເຂົ້າ​ຮ່ວມ​ກອງ​ປະຊຸມ​ພົບ​ປະລະຫວ່າງຜູ້ນຳ​ອາຊຽນບວກ​ສາມ ​ແລະ ສະພາ​ທຸລະ​ກິດ​ອາຊີ​ຕາ​ເວັນ​ອອກ, ​ໂດຍກອງ​ປະຊຸມ​ໄດ້​ຮັບ​ຟັງ​ຂໍ້​ສະ​ເໜີຂອງຕົວ​ແທນ​ພາກ​ທຸລະ​ກິດ​ຈາກ​ບັນດາ​ປະ​ເທດ​ອາຊຽນບວກ​ສາມກ່ຽວກັບ​ການ​ເພີ່ມ​ທະວີ​ການ​ມີ​ສ່ວນ​ຮ່ວມ​ຂອງ​ພາກ​ທຸລະ​ກິດ​ໃນ​ຂະ​ບວນການ​ເຊື່ອມ​ໂຍງ​ເສດຖະກິດພາກພື້ນ, ​ໂດຍ​ສະ​ເພາະ​ແມ່ນ​​​ໃນ​ຂະ​ບວນການ​ເຈລະຈາສັນຍາການເປັນຄູ່ຮ່ວມເສດຖະກິດແບບຮອບດ້ານລະດັບພາກພື້ນ ຫລື “RCEP”.

​  ໃນ​ໂອກາດ​ເຂົ້າຮ່ວມ​ກອງ​ປະຊຸມຄັ້ງນີ້, ທ່ານ​ນາຍົກ​ລັດຖະມົນຕີຍັງ​ໄດ້​ພົບ​ປະ​ຫາລືການພົວພັນຮ່ວມມືສອງ​ຝ່າຍ​ກັບຄູ່ຮ່ວມຕຳແຫນ່ງຄື: ໃນວັນທີ 12 ພະຈິກນີ້, ໄດ້ພົບປະກັບ​ທ່ານ ສົມເດັດ ຮຸນແຊນ ນາຍົກລັດຖະມົນຕີແຫ່ງລາຊະອານາຈັກກຳປູເຈຍ ແລະ ທ່ານ ດີມີຕຣີ ເມັດເວເດັບ ນາຍົກລັດຖະມົນຕີແຫ່ງ ສະຫະພັນລັດເຊຍ ແລະ ໃນວັນທີ 13 ພະຈິກ ໄດ້ພົບປະຫາລືແບບບໍ່ເປັນທາງການກັບທ່ານ ຫງວຽນ ຊວນ ຟູກ ນາຍົກລັດຖະມົນຕີແຫ່ງ ສສ.ຫວຽດນາມ ແລະ ທ່ານ ​​ແອນ​ໂຕ​ນີ​ໂອ ກູ​ເຕີ​ເຣັດສ໌ ເລຂາທິການ​ໃຫຍ່​ອົງ​ການສະຫະ​ປະຊາ​ຊາດ, ເຊິ່ງສອງຝ່າຍໄດ້ແລກປ່ຽນຄຳຄິດຄຳເຫັນກ່ຽວກັບການເຊື່ອມສານລະຫວ່າງວິໄສທັດອາຊຽນ 2025 ກັບວາລະການພັດທະນາແບບຍືນຍົງ 2030 ແລະ ບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈຮ່ວມກັນ.

+ກອງປະຊຸມຄະນະກຳມະການຄຸ້ມຄອງໄພພິບັດອາຊຽນ ຄັ້ງທີ 31 ໄດ້ຫາລືຫລາຍບັນຫາ

error: Content is protected !!