ນາຍົກລັດຖະມົນຕີ ຕ້ອນຮັບ ປະທານທະນາຄານການລົງທຶນໂຄງລ່າງພື້ນຖານອາຊີ ເຂົ້າຢ້ຽມຂໍ່ານັບ
ວັນທີ 9 ຕຸລາ 2024, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບ ທ່ານ ຈິນລີ່ຊຸນ ປະທານທະນາຄານການລົງທຶນໂຄງລ່າງພື້ນຖານ ອາຊີ (AIIB) ເຂົ້າຢ້ຽມຂໍ່ານັບ ເນື່ອງໃນໂອກາດ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 44-45 ແລະ ກອງປະຊຸມທີ່ປິ່ນອ້ອມອື່ນໆ ໃນລະຫວ່າງວັນທີ 8-11 ຕຸລາ 2024 ທີ່ນະຄອນຫລວງວຽງຈັນ.
ສອງຝ່າຍ ໄດ້ປຶກສາຫາລືກ່ຽວກັບໂອກາດໃນການຮ່ວມມື ລະຫວ່າງ AIIB ແລະ ສປປ ລາວ ກໍຄື ອາຊຽນ ໂດຍສະເພາະການເຊື່ອມໂຍງ-ເຊື່ອມຈອດໂຄງລ່າງພື້ນຖານ ແລະ ຂົງເຂດວຽກບູລິມະສິດອື່ນໆ ທີ່ເປັນທ່າແຮງໃນການສືບຕໍ່ຮ່ວມມືກັນໃນຕໍ່ໜ້າ.
ທະນາຄານລົງທຶນໂຄ່ງລ່າງພື້ນຖານອາຊີ (AIIB) ແມ່ນສະຖາບັນການເງິນລະດັບສາກົນ ໂດຍແມ່ນຂໍ້ລິເລີ່ມຂອງ ທ່ານ ສີ ຈິ້ນຜິງ, ປະທານປະເທດ ແຫ່ງ ສປ ຈີນ ຕາມວິໄສທັດການສ້າງເສດຖະກິດເສັ້ນທາງສາຍໄໝ ແລະ ເສັ້ນທາງສາຍໄໝທາງທະເລໃນສະຕະວັດທີ 21 (Silk Road). ປັດຈຸບັນສະມາຊິກຂອງ AIIB ມີທັງໝົດ 80 ປະເທດ ແລະ ສປປ ລາວ ກໍແມ່ນໜຶ່ງໃນປະເທດສະມາຊິກດັ່ງກ່າວ.
ໂອກາດນີ້, ທ່ານ ນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ທ່ານ ຈິ່ນ ຫລີຊຸ່ນ ຕໍ່ການເດີນທາງເຂົ້າຮ່ວມກອງປະຊຸມໃນຄັ້ງນີ້. ພ້ອມທັງສະແດງຄວາມຊົມເຊີຍ ແລະ ຂອບໃຈຕໍ່ທະນາຄານການລົງທຶນເພື່ອການພັດທະນາໂຄງລ່າງພື້ນຖານອາຊີ (AIIB) ທີ່ໄດ້ປະກອບສ່ວນອັນສຳຄັນ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ຕະຫລອດມາ ໂດຍສະເພາະ ການສະໜັບສະໜູນ ແລະ ຊ່ວຍເຫລືອທາງດ້ານການເງິນ ໃນການປັບປຸງດ້ານໂຄງລ່າງພື້ນຖານຕ່າງໆ.
ຂ່າວ: ປະຊາຊົນ
