ທະນາຄານໂລກຍິນດີ ເສດຖະກິດສີລັງຫາຟື້ນຕົວໄວກວ່າຄາດຄະເນໄວ້

      ທະນາຄານໂລກ (World Bank) ລະບຸວ່າ: ເສດຖະກິດຂອງສີລັງກາຟື້ນຕົວໄວກວ່າການຄາດຄະເນໄວ້ ໂດຍປັບເພີ່ມຄາດຄະເນການເຕີບໃຫຍ່ທາງເສດຖະກິດຂອງປະເທດໃນປີນີ້ ເປັນ 4.4%.

      ນອກຈາກເສດຖະກິດ, ການທ່ອງທ່ຽວ ແລະ ບໍລິການທາງການເງິນຂອງສີລັງກາກໍຟື້ນຕົວເຊັ່ນກັນ, ຄຽງຄູ່ກັບການປັບປຸງພາກສ່ວນການກໍ່ສ້າງ ສົ່ງຜົນເຮັດໃຫ້ທະນາຄານໂລກປັບເພີ່ມຄາດຄະເນການເຕີບໃຫຍ່ຈາກ 2.2% ໃນເດືອນເມສາຜ່ານມາ ເປັນ 4.4%.

     ເຖິງຢ່າງໃດກໍຕາມ, ທະນາຄານໂລກລະບຸວ່າ: ການເຕີບໃຫຍ່ທາງເສດຖະກິດຂອງສີລັງກາ ຄາດວ່າຈະຫລຸດລົງໃນປີໜ້າ ເປັນ 3.5% ແລະ ຫລຸດເຫລືອ 3.1% ໃນປີ 2026. ອີກທັງການຄາດຄະເນການເຕີບໃຫຍ່ທາງເສດຖະກິດປີ 2024 ຢູ່ລະດັບ 4.4% ຍັງຕໍ່າກວ່າຕົວເລກຂອງພາກພື້ນອາຊີ ເຊິ່ງຢູ່ລະດັບ 6.4%.

     ນອກຈາກນີ້, ທະນາຄານໂລກຍັງເຕືອນວ່າ: ການຟື້ນຕົວທາງເສດຖະກິດຂອງສີລັງກາຍັງບອບບາງ ແລະ ຂຶ້ນຢູ່ກັບການຮັກສາສະຖຽນລະພາບ ລວມທັງຮຽກຮ້ອງໃຫ້ລັດຖະບານໂກລໍາໂບ ປັບໂຄງສ້າງໜີ້ຕ່າງປະເທດໃຫ້ສໍາເລັດ ແລະ ດໍາເນີນການປະຕິຮູບຢ່າງຕໍ່ເນື່ອງ ເພື່ອເພີ່ມການເຕີບໃຫຍ່ທາງເສດຖະກິດໃນໄລຍະກາງ ແລະ ຫລຸດຄວາມທຸກຍາກ.

      ທະນາຄານໂລກມອບເງິນກູ້ກ້ອນໃໝ່ ມູນຄ່າ 200 ລ້ານໂດລາສະຫະລັດ ໃຫ້ສີລັງກາ ໃນວັນທີ 7 ຕຸລາຜ່ານມາ ເພື່ອກະຕຸ້ນການຟື້ນຕົວທາງເສດຖະກິດ ເຊິ່ງຖືເປັນເງິນທຶນຈາກຕ່າງປະເທດຈໍານວນທໍາອິດ ນັບແຕ່ປະທານາທິບໍດີ ອານຸຣາ ກຸມານ ດິບນາຢາເກ ຜູ້ນໍາສີລັງກາ ຊະນະການເລືອກຕັ້ງໃນເດືອນຜ່ານມາ.