ອີຣານຫ້າມນໍາໃຊ້ເພຈເຈີ-ວິທະຍຸສື່ສານໃນຖ້ຽວບິນການຄ້າ ຢ້ານຊໍ້າຮອຍກຸ່ມແຮັດໂບລາ

      ໜ່ວຍງານການບິນພົນລະເຮືອນອີຣານອອກຄໍາສັ່ງ ຫ້າມການນໍາເອົາເພຈເຈີ ແລະ ວິທະຍຸສື່ສານເຂົ້າສູ່ຖ້ຽວບິນການຄ້າ ພາຍຫລັງເກີດເຫດການອຸປະກອນສື່ສານຂອງກຸ່ມແຮັດໂບລາລະເບີດ.

      ສື່ທ້ອງຖິ່ນຫລາຍແຫ່ງຂອງອີຣານລາຍງານ ໂດຍອ້າງເປັນຂໍ້ມູນຈາກສໍານັກງານການບິນພົນລະເຮືອນແຫ່ງຊາດວ່າມີການອອກຄໍາສັ່ງຫ້າມນໍາເອົາເພຈເຈີ ແລະ ວິທະຍຸສື່ສານເຂົ້າສູ່ຫ້ອງໂດຍສານ ແລະ ການໂຫລດໃຕ້ທ້ອງເຮືອບິນໃນແບບກະເປົາທີ່ບໍ່ມີເຈົ້າຂອງຍ່າງໄປນໍາ. ມາດຕະການດັ່ງກ່າວມີຜົນບັງຄັບໃຊ້ທັນທີຕໍ່ສາຍການບິນການຄ້າທຸກແຫ່ງຂອງອີຣານ.

       ການເຄື່ອນໄຫວນີ້ເກີດຂຶ້ນປະມານ 3 ອາທິດ ພາຍຫລັງເກີດເຫດເພຈເຈີ ແລະ ວິທະຍຸສື່ສານຈໍານວນຫລາຍລະເບີດຕໍ່ເນື່ອງກັນຢູ່ລີບັງ ສົ່ງຜົນເຮັດໃຫ້ມີຜູ້ເສຍຊີວິດລວມກັນຢ່າງໜ້ອຍ 39 ຄົນ ຈາກການລະເບີດຂອງອຸປະກອນສື່ສານທັງສອງຊະນິດ ແລະ ມີຜູ້ໄດ້ຮັບບາດເຈັບອີກເກືອບ 3,000 ຄົນ ສ່ວນຫລາຍເປັນສະມາຊິກກຸ່ມແຮັດໂບລາ ເຊິ່ງໃຊ້ອຸປະກອນສື່ສານທັງສອງປະເພດນີ້ເປັນຫລັກ.

      ພາຍຫລັງເກີດເຫດ ຍັງບໍ່ມີບຸກຄົນກຸ່ມໃດອອກມາຍອມຮັບວ່າມີການກ່ຽວຂ້ອງ. ເຖິງຢ່າງໃດກໍຕາມ, ຫລາຍຝ່າຍຕັ້ງເປົ້າໃສ່ອິດສະລາແອນ.

      ທັງນີ້, ເຫດການດັ່ງກ່າວທີ່ເກີດຂຶ້ນຕໍ່ກຸ່ມແຮັດໂບລາເປັນພຽງໜຶ່ງໃນເຫດການຮຸນແຮງຢູ່ລີບັງ ທີ່ເກີດຂຶ້ນຄຽງຄູ່ກັບສົງຄາມຢູ່ເຂດກາຊາ ເຊິ່ງເລີ່ມຂຶ້ນໃນວັນທີ 7 ຕຸລາ 2023 ໂດຍອິດສະລາແອນ ແລະ ກຸ່ມແຮັດໂບລາ ທີ່ມີຖານຢູ່ທາງໃຕ້ຂອງລີບັງ ປະທະກັນຂ້າມຊາຍແດນບໍ່ເວັ້ນແຕ່ລະວັນ ແລະ ອິດສະລາແອນສັງຫານແກນນໍາລະດັບສູງຫລາຍຄົນຂອງກຸ່ມແຮັດໂບລາ ລວມທັງທ່ານ ຮໍາຊັນ ນາສຣາລເລາະ ຜູ້ນໍາສູງສຸດ.