ປະກາດແຕ່ງຕັ້ງ ທ່ານ ພັນໂທ ກອງແກ້ວ ພົມພິທັກ ເປັນຫົວໜ້າຄະນະຄຸ້ມຄອງດ່ານສາກົນບ້ານວັງ ເມືອງໝື່ນ
ວັນທີ 14 ຕຸລາ 2024ນີ້ ແຂວງວຽງຈັນ ໄດ້ມີພິທີປະກາດການຈັດຕັ້ງຄະນະຄຸ້ມຄອງດ່ານສາກົນບ້ານວັງ ເມືອງໝື່ນ, ໂດຍແຕ່ງຕັ້ງ ທ່ານ ພັນໂທ ກອງແກ້ວ ພົມພິທັກ ເປັນຫົວໜ້າຄະນະຄຸ້ມຄອງດ່ານສາກົນບ້ານວັງ ເມືອງໝື່ນ. ໂດຍການເປັນປະທານຂອງທ່ານ ດາວເຮືອງ ນັນທະວົງ, ມີການນຳແຂວງ, ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ຈັນທະບູນ ໂພສະລາດ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງວຽງຈັນ ໄດ້ຜ່ານຂໍ້ຕົກລົງຂອງທ່ານເຈົ້າແຂວງວຽງຈັນ ສະບັບເລກທີ 2377/ຈຂ.ວຈ ລົງວັນທີ25 ກັນຍາ 2024 ວ່າດ້ວຍການແຕ່ງຕັ້ງຄະນະຄຸ້ມຄອງດ່ານສາກົນບ້ານວັງ ເມືອງໝື່ນຄື:
- ແຕ່ງຕັ້ງທ່ານພັນໂທ ກອງແກ້ວ ພົມພິທັກ ຮອງຫ້ອງສັນຕິບານ ກອງບັນຊາການ ປກສ ແຂວງວຽງຈັນ ເປັນຫົວໜ້າຄະນະຄຸ້ມຄອງດ່ານສາກົນບ້ານວັງ ເມືອງໝື່ນ.
- ທ່ານ ແສງມະນີ ໄຊຍະກອນ ຫົວຫນ້າພາສີປະຈຳດ່ານສາກົນບ້ານວັງ ເປັນຮອງ.
- ທ່ານ ພັນໂທ ຄຳແດງ ທຳມະສິດ ຫົວໜ້າ ຕມ ປະຈຳດ່ານສາກົນບ້ານວັງ ເປັນຮອງ.
- ທ່ານ ບຸນສວນ ສີພັນດອນ ຮອງຫົວໜ້າຂະແໜງກໍ່ສ້າງຮາກຖານການເມືອງຫ້ອງວ່າການແຂວງ ເປັນຮອງ.
- ທ່ານ ຄຳເສົາ ຈັນທະວົງ ວິຊາການສັດຕະວະແພດພະແນກກະສິກຳແລະປ່າໄມ້ແຂວງ ເປັນຄະນະ.
- ທ່ານ ຈອນນີ່ ຄູນລ້ຳປະເສີດ ຮອງຫົວໜ້າຂະແໜງກົງສູນ ພະແນກການຕ່າງປະເທດແຂວງ ເປັນຄະນະ.
- ທ່ານ ສຸບັນ ພັນທະວົງ ວິຊາການຂະແໜງທາງນ້ຳ ພະແນກໂຍທາທິການແລະຂົນສົ່ງແຂວງ ເປັນຄະນະ.
ພ້ອມນີ້ຍັງໄດ້ຜ່ານມະຕິຕົກລົງວ່າດ້ວຍການແຕ່ງຕັ້ງໜ່ວຍພັກຮາກຖານສາກົນບ້ານວັງ ເມືອງໝື່ນ, ຄະນະປະຈຳພັກແຂວງວຽງຈັນ ຕົກລົງແຕ່ງຕັ້ງ ສະຫາຍ ພັນໂທ ກອງແກ້ວ ພົມພິທັກ ເປັນເລຂາໜ່ວຍພັກຮາກຖານ, ສະຫາຍ ແສງມະນີ ໄຊຍະກອນ ເປັນຮອງເລຂາ ແລະ ສະຫາຍ ພັນໂທ ຄຳແດງ ທຳມະສິດ ເປັນຄະນະ.
ທ່ານ ດາວເຮືອງ ນັນທະວົງ ຮອງເຈົ້າແຂວງວຽງຈັນ ໄດ້ເນັ້ນໜັກໃຫ້ຄະນະດ່ານ ແລະ ບຸກຄະລາກອນດ່ານແຕ່ລະສະຫາຍ ຕ້ອງພ້ອມກັນເປັນເຈົ້າການເອົາໃຈໃສ່ເຮັດວຽກງານການເມືອງແນວຄິດ, ເຊີດຊູຄຸນທາດການເມືອງ ຄຸນສົມບັດ ສິນທຳປະຕິວັດຂອງຕົນຢ່າງຫນັກແຫນ້ນ, ມີຄວາມຕັດສິນໃຈ ແລະ ເສຍສະຫຼະສູງ, ມີຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ແລະ ພ້ອມກັນຮັກສາຄວາມສາມັກຄີ ຄວາມເປັນປຶກແຜນແໜ້ນໜ້າ ແລະ ຮັກແພງຊ່ວຍເຫຼືອເຊິ່ງກັນ ແລະ ກັນ ໃນທຸກດ້ານເພື່ອພ້ອມກັນກ້າວໜ້າ ແລະ ກາຍເປັນພະນັກງານທີ່ດີເດັ່ນຂອງພັກ, ຂອງດ່ານ, ຂອງປະຊາຊົນ. ເອົາໃຈໃສ່ຄຸ້ມຄອງດ່ານໃຫ້ເປັນລະບຽບຮຽບຮ້ອຍ, ຮັກສາໄດ້ຄວາມສະຫງົບປອດໄພ, ລວມເຖິງການບໍລິການສິນຄ້າເຂົ້າ-ອອກໃຫ້ມີຄວາມສະດວກວ່ອງໄວ; ປັບປຸງແບບແຜນວິທີເຮັດວຽກຂອງວຽກງານແຕ່ລະຂົງເຂດດ່ານ ໃຫ້ເຂົ້າສູ່ລະບຽບຫຼັກການລວມສູນປະຊາທິປະໄຕຂອງພັກນຳພາເປັນໝູ່ຄະນະ ສຽງສ່ວນໜ້ອຍຂຶ້ນກັບສຽງສ່ວນຫຼາຍ ບຸກຄົນຂຶ້ນກັບການຈັດຕັ້ງ ມີການແບ່ງຄວາມຮັບຜິດຊອບໃຫ້ແຕ່ລະສະຫາຍຮັບຜິດຊອບຢ່າງຄັກແນ່ ແລະ ມີການສະຫຼຸບຖອດຖອນບົດຮຽນແຕ່ລະໄລຍະຢ່າງເປັນປົກກະຕິ, ຕິດຕາມ, ກວດກາ ການປະຕິບັດໜ້າທີ່ຂອງພະນັກງານດ່ານແຕ່ລະສະຫາຍເພື່ອຫລີກລ້ຽງບໍ່ໃຫ້ມີການສວຍໃຊ້ໜ້າທີ່ຫາຜົນປະໂຍດສ່ວນຕົວຢ່າງເດັດຂາດ.
