ທ່ານ ເນທັນຢາຮູ ກ່າວວ່າ ເອົາຄືນກຸ່ມແຮັດໂບລາ ເຫດໂດຣນໂຈມຕີທະຫານອິດສະລາແອນເສຍຊີວິດ 4 ຄົນ

      ນາຍົກລັດຖະມົນຕີອິດສະລາແອນປະກາດ ຕອບໂຕ້ຢ່າງສາສົມທີ່ສຸດກັບກຸ່ມແຮັດໂບລາ ເຊິ່ງຍິງໂດຣນຂ້າມແດນສັງຫານທະຫານອິດສະລາແອນ 4 ຄົນ.

      ນາຍົກລັດຖະມົນຕີ ເບນຈາມິນ ເນທັນຢາຮູ ຜູ້ນໍາອິດສະລາແອນ ກ່າວວ່າ: ກອງທັບອິດສະລາແອນຈະເດີນໜ້າປະຕິບັດການທາງທະຫານທີ່ໄຮ້ຄວາມປານີກັບກຸ່ມແຮັດໂບລາ ແລະ ຢືນຢັນວ່າ: ເປົ້າໝາຍຂອງການໂຈມຕີຈະລວມທັງນະຄອນຫລວງເບຣຸດ.

      ທັງນີ້, ກຸ່ມແຮັດໂບລາຍິງຈະຫລວດຈໍານວນໜຶ່ງໂຈມຕີຖານທັບເຮືອໃກ້ເມືອງໄຮຟາ ເຊິ່ງເປັນເມືອງໃຫຍ່ອັນດັບສາມ ແລະ ຕັ້ງຢູ່ທາງເໜືອຂອງອິດສະລາແອນ ໃນວັນທີ 14 ຕຸລາຜ່ານມາ ໂດຍກ່າວວ່າ: ການຍິງລູກສອນໄຟຄັ້ງນີ້ເພື່ອອຸທິດໃຫ້ທ່ານ ຮໍາຊັນ ນາສຣາລເລາະ ຜູ້ນໍາສູງສຸດ ເຊິ່ງເສຍຊີວິດຈາກປະຕິບັດການໂຈມຕີທາງອາກາດຂອງອິດສະລາແອນ ໃນນະຄອນຫລວງເບຣຸດ ໃນວັນທີ 27 ກັນຍາຜ່ານມາ.

      ຂະນະດຽວກັນ, ກຸ່ມແຮັດໂບລາປະກາດວ່າ: ຈະຍັງຍິງຈະຫລວດ ແລະ ລູກສອນໄຟໂຈມຕີອິດສະລາແອນຕໍ່ໄປ ຕາບໃດທີ່ອີກຝ່າຍຍັງບໍ່ຢຸດປະຕິບັດການທາງທະຫານຢູ່ລີບັງ ພາຍຫລັງກະຊວງສາທາລະນະສຸກລີບັງລາຍງານວ່າ: ປະຕິບັດການໂຈມຕີທາງອາກາດຂອງກອງທັບອິດສະລາແອນ ໃນວັນທີ 12 ຕຸລາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 51 ຄົນ.

      ສ່ວນກອງທັບອິດສະລາແອນກ່າວວ່າ: ສາມາດສະກັດລູກສອນໄຟຂອງກຸ່ມແຮັດໂບລາ ເຊິ່ງມຸ້ງເປົ້າໃສ່ສູນຝຶກທາງທະຫານ ໃກ້ກັບເມືອງບິນຢາມິນາ ບໍ່ຫ່າງຈາກເມືອງໄຮຟາ ໂດຍຍັງບໍ່ມີການຢືນຢັນກ່ຽວກັບຂອບເຂດຄວາມເສຍຫາຍ.

      ເຖິງຢ່າງໃດກໍຕາມ, ໃນວັນທີ 13 ຕຸລາຜ່ານມາ, ກຸ່ມແຮັດໂບລາຍິງລູກສອນໄຟໂຈມຕີຄ້າຍທະຫານຂອງກອງທັບອິດສະລາແອນ ຢູ່ເມືອງບິນຢາມິນາ ເຊິ່ງກອງທັບອິດສະລາແອນຢືນຢັນວ່າ: ເຫດການດັ່ງກ່າວສົ່ງຜົນເຮັດໃຫ້ທະຫານເສຍຊີວິດຢ່າງໜ້ອຍ 4 ຄົນ ແລະ ມີຜູ້ໄດ້ຮັບບາດເຈັບອີກ 60 ກວ່າຄົນ.

      ຄວາມຂັດແຍ່ງທີ່ທະວີຄວາມຮຸນແຮງຂຶ້ນ ລະຫວ່າງອິດສະລາແອນກັບກຸ່ມແຮັດໂບລາ ເຮັດໃຫ້ຫລາຍຝ່າຍກັງວົນວ່າ: ລີບັງ ເຊິ່ງເປັນຖານທີ່ໝັ້ນຂອງກຸ່ມແຮັດໂບລາຈະກາຍເປັນແນວຮົບໃໝ່ຂອງອິດສະລາແອນຕໍ່ຈາກເຂດກາຊາ.

      ນອກຈາກນີ້, ກໍາລັງມີການຕິດຕາມຢ່າງໃກ້ຊິດອີກວ່າ: ອິດສະລາແອນຈະຕອບໂຕ້ອີຣານໃນຮູບແບບໃດ ພາຍຫລັງກອງກໍາລັງພິທັກປະຕິວັດອີຣານ (IRGC) ຍິງລູກສອນໄຟໃສ່ອິດສະລາແອນ ໃນວັນທີ 1 ຕຸລາຜ່ານມາ ເພື່ອຕອບໂຕ້ອີກຝ່າຍສັງຫານທະຫານລະດັບສູງຂອງອີຣານຫລາຍຄົນ ແລະ ແກນນໍາໃນພັນທະມິດແຫ່ງການຕໍ່ຕ້ານ ລວມທັງທ່ານ ນາສຣາລເລາະ ແລະ ທ່ານ ອິສມາອິລ ຮານິເຢ ຜູ້ນໍາສູງສຸດຂອງກຸ່ມຮາມັດ.